ഞാൻ സന്തോഷവാനാണ്, ഇപ്പോഴത്തെ എന്റെ ജീവിതം, ആരോ​ഗ്യകരമായ പ്രണയമാണ് വേണ്ടത്: നാ​ഗ ചൈതന്യ

സ്വകാര്യ ജീവിതം ഇഷ്ടപ്പെടുന്ന നടനാണ് നാ​ഗ ചൈതന്യ. സിനിമകളുടെ പ്രെമോഷനും മറ്റുമല്ലാതെ അഭിമുഖങ്ങളിലോ സോഷ്യൽ മീഡിയയിലോ നാ​ഗ ചൈതന്യയെ കാണാറില്ല. കഴിഞ്ഞ വർഷം ഡിസംബർ മാസത്തിലാണ് ചൈതന്യയും ശോഭിത ധുലിപാലയുമായുള്ള വിവാഹം നടന്നത്. രണ്ട് വർഷത്തോളം നീണ്ട പ്രണയത്തിനൊടുവിലായിരുന്നു താര വിവാഹം. വിവാഹത്തിന് പിന്നാലെ നാ​ഗ ചൈതന്യക്ക് കേൾക്കേണ്ടി വന്നത് മുൻ ഭാര്യ നടി സമാന്തയുടെ ആരാധകരുടെ കുറ്റപ്പെടുത്തലാണ്.

കടുത്ത സൈബർ ആക്രമണമാണ് നാ​ഗ ചൈതന്യക്കും ശോഭിതയ്ക്കും നേരിടേണ്ടി വന്നത്. സമാന്തയെ നാ​ഗ ചൈതന്യ ചതിച്ചെന്നും വിവാഹ ബന്ധം തകരാൻ കാരണം ശോഭിതയാണെന്നുമായിരുന്നു ആക്ഷേപം. എന്നാൽ സമാന്തയുമായി പിരിഞ്ഞതിന് ശേഷമാണ് നാ​ഗ ചൈതന്യ ശോഭിതയുമായി അടുക്കുന്നത്. സോഷ്യൽ മീഡിയയിലൂടെ തുടങ്ങിയ സൗഹൃദം പിന്നീട് പ്രണയത്തിലെത്തി. നാ​ഗ ചെെതന്യയ പോലെ സ്വകാര്യതയ്ക്ക് പ്രാധാന്യം നൽകുന്നയാളാണ് ശോഭിതയും.

കടുത്ത സൈബർ ആക്രമണം നേരിടേണ്ടി വന്നിട്ടും ഇതേക്കുറിച്ച് ഒരു വാക്ക് പോലും പ്രതികരിക്കാൻ ശോഭിത തയ്യാറായിട്ടില്ല. വിവാഹ ജീവിതത്തെക്കുറിച്ച് സംസാരിക്കുകയാണിപ്പോൾ നാ​ഗ ചൈതന്യ. പ്രണയം എല്ലാമാണ്. ആരോ​ഗ്യകരമായ പ്രണയം ഉണ്ടാകണമെന്ന് ഞാൻ വിശ്വസിക്കുന്നു. അതെങ്ങനെ പറയണം എന്നറിയില്ല. നിങ്ങളെ സന്തോഷവാനും ആരോ​ഗ്യവാനും ആയി കാത്ത് സൂക്ഷിക്കുന്ന സ്വാധീനം ജീവിതത്തിലുണ്ടാകണമെന്ന് ഞാൻ കരുതുന്നു.

തന്റെ ഇപ്പോഴത്തെ ജീവിതത്തിൽ നടന്ന് കൊണ്ടിരിക്കുന്ന കാര്യങ്ങളിൽ സന്തോഷവാനാണെന്നും നാ​ഗ ചൈതന്യ വ്യക്തമാക്കി. നേരത്തെ നൽകിയ അഭിമുഖത്തിൽ ശോഭിത നേരിടേണ്ടി വരുന്ന ആക്രമണങ്ങളെക്കുറിച്ച് നാ​ഗ ചൈതന്യ സംസാരിച്ചിരുന്നു. ശോഭിതയുടെ കാര്യത്തിൽ വിഷമമുണ്ട്. തന്റെ കഴിഞ്ഞ കാലവുമായി ഒരു ബന്ധവും ശോഭിതയ്ക്കില്ല. ഞങ്ങളുടേത് സ്വാഭാവികമായുണ്ടായ പ്രണയമാണ്. ശോഭിത തന്റെ ജീവിതത്തിലെ യഥാർത്ഥ ഹീറോ ആണെന്നും നാ​ഗ ചൈതന്യ പറഞ്ഞു.

സമാന്തയുമായി പിരിയേണ്ടി വന്നതിനെക്കുറിച്ചും നടൻ സംസാരിക്കുന്നുണ്ട്. ഞങ്ങൾ ഞങ്ങളുടെ വഴി തെരഞ്ഞെടുത്തു. ഏറെ ആലോചിച്ച് പരസ്പര ബഹുമാനത്തോടെ എടുത്ത തീരുമാനമാണിത്. രണ്ട് പേരും ​ഗ്രേസ്ഫുളായി മുന്നോട്ട് നീങ്ങി. തന്നെ ക്രിമിനലിനെ പോലെ കാണുന്നതെന്തിനാണ്. തകർന്ന കുടുംബത്തിൽ വളർന്നയാളാണ് ഞാൻ. ഒരു ബന്ധം അവസാനിപ്പിക്കുന്നതിന് മുമ്പ് ആയിരം തവണ ആലോചിക്കും. വേർപിരിയൽ ഒറ്റ രാത്രി കൊണ്ട് സംഭവിച്ചതല്ലെന്നും നാ​ഗ ചെെതന്യ വ്യക്തമാക്കി.

വേർപിരിയലിനെക്കുറിച്ച് നേരത്തെ സമാന്തയും സംസാരിച്ചിട്ടുണ്ട്. വിവാഹ ജീവിതത്തിൽ 100 ശതമാനം നൽകിയിരുന്നു. എന്നാൽ അത് മുന്നോട്ട് പോയില്ലെന്ന് സമാന്ത വ്യക്തമാക്കി. കരിയറിലെ തിരക്കുകളിലാണ് സമാന്തയിപ്പോൾ. സിതാഡെൽ ആണ് ഒടുവിൽ പുറത്തിറങ്ങിയ സീരീസ്. മറുവശത്ത് നാ​ഗ ചൈതന്യയും കരിയറിലെ തിരക്കുകളിലാണ്. തണ്ടെൽ ആണ് നടന്റെ പുതിയ സിനിമ. കഴിഞ്ഞ ദിവസമാണ് ചിത്രം റിലീസ് ചെയ്തത്. സായ് പല്ലവിയാണ് നായിക. ഇരുവരും ഒരുമിച്ചെത്തിയ രണ്ടാമത്തെ സിനിമയാണ് തണ്ടെൽ. മികച്ച പ്രതികരണമാണ് സിനിമയ്ക്ക് ലഭിക്കുന്നത്. താരങ്ങളുടെ പുതിയ സിനിമകൾക്കായി കാത്തിരിക്കുകയാണ് ആരാധകർ.