അച്ഛനെ പോലെ അമ്മയും മറ്റൊരു പങ്കാളിയെ കണ്ടെത്തി; കോടികളുടെ അനന്തരാവകാശി; നാ​ഗ ചൈതന്യയുടെ ജീവിതം

തെലുങ്ക് സിനിമാ ലോകത്ത് താരപുത്രനാണ് നാ​ഗ ചൈതന്യ. നാ​ഗാർജുനയ്ക്കും ആ​ദ്യ ഭാര്യ ലക്ഷ്മി ​ദഗുബതിക്കും പിറന്ന നാ​ഗ ചൈതന്യക്ക് വളരെ പെട്ടെന്ന് ടോളിവുഡിൽ പേരെടുക്കാനായി.കഴിഞ്ഞ ദിവസമാണ് നാ​ഗ ചൈതന്യക്ക് 37 വയസ് പൂർത്തിയായത്. പിറന്നാൾ ദിനത്തിൽ നടന് നിരവധി പേർ ആശംസകൾ അറിയിച്ചു. മാസ് റോളുകൾക്കപ്പുറം റൊമാന്റിക് ഹീറോയായാണ് നാ​ഗ ചൈതന്യയെ പ്രേക്ഷകർ സ്വീകരിച്ചത്. 2009 ൽ ജോഷ് എന്ന സിനിമയിലൂടെയാണ് നാ​ഗ ചൈതന്യ അഭിനയ രം​ഗത്ത് തുടക്കം കുറിക്കുന്നത്.

2010 ൽ പുറത്തിറങ്ങിയ യെ മ ചെസവ എന്ന സിനിമ കരിയറിൽ വഴിത്തിരിവായി. വിണ്ണെെത്താണ്ടി വരുവായ എന്ന തമിഴ് ചിത്രത്തിന്റെ തെലുങ്ക് പതിപ്പാണ് യെ മ ചെസവ. സമാന്തയാണ് ചിത്രത്തിൽ നായികയായെത്തിയത്. കരിയറിൽ ഉയർച്ചകളും താഴ്ചകളും നാ​ഗ ചൈതന്യക്ക് ഒരുപോലെ വന്നിട്ടുണ്ട്. പിതാവ് നാ​ഗാർജുനയുടെ അത്രയും ഉയരത്തിലേക്ക് നാ​ഗ ചൈതന്യയുടെ കരിയർ ​ഗ്രാഫ് വളർന്നില്ലെന്ന വിമർശനവും വരാറുണ്ട്.

എന്നാൽ സിനിമകളുടെ പരാജയങ്ങളൊന്നും ബാധിക്കാത്ത തരത്തിൽ സമ്പന്നനാണ് നാ​ഗ ചൈതന്യ. പിതാവ് നാ​ഗാർജുന ടോളിവുഡിലെ ഏറ്റവും ധനികനായ നടൻമാരിൽ ഒരാളാണ്. റിപ്പോർട്ടുകൾ പ്രകാരം 3000 കോടിയുടെ സ്വത്തുക്കൾ നാ​ഗാർജുനയ്ക്കുണ്ട്. രണ്ടാമത്തെ ഭാര്യ അമലയിൽ അഖിൽ അക്കിനേനി എന്ന മകനാണ് നാ​ഗാർജുനയ്ക്കുള്ളത്. പിതാവിന്റെ കോടികളുടെ സ്വത്തിന്റെ അവകാശികളാണ് നാ​​ഗ ചൈതന്യയും അഖിൽ അക്കിനേനിയും.

അച്ഛനെ പോലെ നാ​ഗ ചൈതന്യയുടെ അമ്മ ലക്ഷ്മി ദ​​ഗുബതിയും ധനികയാണ്. ടോളിവുഡിലെ പ്രബല കുടുംബത്തിലെ അം​ഗമാണ് ലക്ഷ്മി ദ​ഗുബതി. പ്രമുഖ നിർമാതാവ് ആ രാമ നായ്ഡുവിന്റെ മകൾ. രാമ നായ്ഡുവിന്റെ കുടുംബത്തിന് തെലുങ്ക് സിനിമാ ലോകത്ത് വലിയ സ്വാധീനമാണുള്ളത്. നാ​​ഗാർജുനയുമായി വേർപിരിഞ്ഞ ശേഷം ലക്ഷ്മി ദ​ഗുബതിയും മറ്റൊരു വിവാഹം ചെയ്തിട്ടുണ്ട്. ശരത് വിജയരാഘവൻ എന്നാണ് ലക്ഷ്മിയുടെ രണ്ടാം ഭർത്താവിന്റെ പേര്.

മാതാപിതാക്കളുടെ സമ്പത്തിന് പുറമെ സിനിമാ കരിയറിൽ നിന്നുമുള്ള വരുമാനവും നാ​ഗ ചൈതന്യയുടെ സമ്പത്തിന് ശക്തി പകരുന്നു. 10 കോ‌‌ടി രൂപയ്ക്ക് മുകളിലാണ് ഒരു സിനിമയ്ക്ക് നാ​ഗ ചൈതന്യ വാങ്ങുന്ന പ്രതിഫലമെന്നാണ് വിവരം. ടോളിവുഡിലെ പ്രമുഖർ താമസിക്കുന്ന ജൂബിലി ഹിൽസിലാണ് നാ​ഗ ചൈതന്യയുടെ വീട്. അടുത്തിടെ വാങ്ങിയതാണ് ഈ വസതി. 27 കോടി രൂപയാണ് വീടിന്റെ വിലയെന്നാണ് വിവരം.

കരിയറിനേക്കാളും നാ​ഗ ചൈതന്യയുടെ വിവാഹ ജീവിതവും പലപ്പോഴും ചർച്ചയായിട്ടുണ്ട്. ന‌ടി സമാന്തയുമായുള്ള വിവാഹവും വേർപിരിയലും വലിയ തോതിൽ വാർത്താ പ്രാധാന്യം നേടി. 2017 ലാണ് സമാന്തയും നാ​ഗ ചൈതന്യയും വിവാ​ഹം കഴിക്കുന്നത്. ഏറെ നാളത്തെ പ്രണയത്തിനൊടുവിലായിരുന്നു വിവാഹം.

എന്നാൽ നാല് വർഷത്തിനുള്ളിൽ ഇവർക്കിടയിൽ അസ്വാരസ്യം ഉടലെടുത്തു. 2021 ൽ വേർപിരിയുകയാണെന്ന് താരങ്ങൾ ആരാധകരെ അറിയിക്കുകയും ചെയ്തു. വിവാഹമോചന സമയത്ത് സമാന്തയ്ക്ക് വലിയ തുക ജീവനാംശമായി നാ​ഗാർജുന വാ​ഗ്ദാനം ചെയ്തിരുന്നു. എന്നാൽ ഒരു രൂപ പോലും വേണ്ടെന്നാണ് സമാന്ത വ്യക്തമാക്കിയത്.