Click it and Unblock the Notifications
ഇന്ന് മരുമകളല്ലെങ്കിലും...; അസുഖം ബാധിച്ച സമാന്തയെ ആശ്വസിപ്പിക്കാൻ നാഗാർജുന എത്തുന്നെന്ന് റിപ്പോർട്ട്
നടി സമാന്തയ്ക്ക് പേശികളെ ബാധിക്കുന്ന മയോസിറ്റിസ് എന്ന രോഗം ബാധിച്ചത് സിനിമാ ലോകത്തും ആരാധകർക്കിടയിലും ഏറെ ചർച്ച ആയിരിക്കുകയാണ്. ഏറെ നാളത്തെ അഭ്യൂഹങ്ങൾക്ക് ഒടുവിലാണ് താൻ ഈ അസുഖം ബാധിച്ച് ചികിത്സയിലാണെന്ന് സമാന്ത തുറന്ന് പറഞ്ഞത്. നേരത്തെ നടിക്ക് ചർമ്മ രോഗമാണെന്നത് ഉൾപ്പെടെയുള്ള അഭ്യൂഹങ്ങൾ പരന്നിരുന്നു, ഈ അഭ്യൂഹങ്ങൾക്കെല്ലാം ഇപ്പോൾ അവസാനമായിരിക്കുകയാണ്.
രോഗം ബാധിച്ചിട്ട് കുറച്ച് നാളുകൾ ആയെന്നും അസുഖം ഭേദമായി വരുന്നുണ്ടെന്നും സമാന്ത തുറന്ന് പറഞ്ഞു. പിന്നാലെ സിനിമാ ലോകത്ത് നിന്നുള്ള നിരവധി പേരാണ് സമാന്തയ്ക്ക് ആശ്വാസ വാക്കുകളുമായി എത്തിയത്. സമാന്ത ഒരു പോരാളി ആണെന്നും പൂർവാധികം ശക്തിയോടെ നടി ജീവിതത്തിലേക്ക് തിരിച്ചെത്തുമെന്നും ആരാധകർ പ്രതീക്ഷിക്കുന്നു.
ഇപ്പോഴിതാ താരത്തെ സംബന്ധിച്ചുള്ള പുതിയൊരു വാർത്ത ആണ് പുറത്ത് വരുന്നത്. നടിയുടെ മുൻ ഭർത്താവ് നാഗചൈതന്യയുടെ പിതാവ് ആയ നാഗാർജുന സമാന്തയെ കാണാൻ എത്തുന്നെന്നാണ് റിപ്പോർട്ടുകൾ. ഇക്കാര്യം ഔദ്യോഗികമായി താരങ്ങൾ സ്ഥിരീകരിച്ചിട്ടില്ല. അതേസമയം സമാന്തയോട് വളരെ സ്നേഹമുള്ള ആളാണ് നാഗാർജുന. മകനുമായുള്ള വിവാഹ ബന്ധം വേർപിരിഞ്ഞെങ്കിലും നാഗാർജുന സമാന്തയെക്കുറിച്ച് നല്ല വാക്കുകളേ പറഞ്ഞിട്ടുമുള്ളൂ.
റിപ്പോർട്ടുകൾ പ്രകാരം സമാന്തയെ നേരിട്ട് കാണാൻ നാഗാർജുന ഒരുങ്ങുന്നുണ്ട്. വിവാഹ മോചനത്തിന്റെ വിഷമത്തിൽ നിൽക്കവെ സമാന്തയ്ക്ക് വന്ന ഈ പ്രതിസന്ധിയിൽ നാഗാർജുനയുടെ വരവ് നടിക്ക് ആശ്വാസമാവുമെന്നാണ് ഏവരും പ്രതീക്ഷിക്കുന്നത്. മുൻ ഭർത്താവ് നാഗചൈതന്യ സമാന്തയെ കാണാൻ എത്തുമോയെന്ന് വ്യക്തമല്ല. സോഷ്യൽ മീഡിയയിൽ പങ്കുവെച്ച കുറിപ്പിലാണ് സമാന്ത തനിക്ക് വന്ന അസുഖത്തെക്കുറിച്ച് സംസാരിച്ചത്. പഴയ ജീവിതത്തിലേക്ക് തിരിച്ചെത്തുമെന്ന പ്രതീക്ഷയായിരുന്നു സമാന്തയുടെ വാക്കുകളിൽ.
ജീവിതം എനിക്ക് നേരെ എറിയുന്ന അവസാനിക്കാത്ത വെല്ലുവിളികളെ നേരിടാൻ നിങ്ങളുടെ പിന്തുണ എനിക്ക് ശക്തി തരുന്നു. കുറച്ച് മാസങ്ങൾക്ക് മുമ്പ് എനിക്ക് ഒരു അസുഖം സ്ഥിരീകരിച്ചു' 'മയോസിറ്റിസ് എന്ന രോഗാവസ്ഥ. രോഗം മാറിയ ശേഷം ഇത് നിങ്ങളോട് പറയാമെന്നാണ് ഞാൻ കരുതിയത്.
പക്ഷെ അതിന് ഞാൻ പ്രതീക്ഷിച്ചതിനേക്കാൾ അധികം സമയമെടുക്കുന്നു. എപ്പോഴും ശക്തരായി ഇരിക്കേണ്ടതില്ലെന്ന് ഞാൻ തിരിച്ചറിയുന്നു. ഈ ദുർബലത അംഗീകരിക്കുന്നതിനോടാണ് ഞാൻ പോരാടിക്കൊണ്ടിരിക്കുന്നത്. ഓരോ ദിവസം രോഗമുക്തിയുടെ അടുത്ത പടിയായാണ് കാണുന്നതെന്നും സമാന്ത പറഞ്ഞു.
2017 ലാണ് സമാന്തയും നാഗചൈതന്യയും വിവാഹം കഴിച്ചത്. എന്നാൽ കഴിഞ്ഞ വർഷം നവംബറിൽ ഇരുവരും വേർപിരിഞ്ഞു. പരസ്പരം ആലോചിച്ചെടുത്ത തീരുമാനമാണെന്നും സ്വകാര്യതയെ മാനിക്കണമെന്നും സമാന്തയും നാഗചൈതന്യയും അന്ന് പറഞ്ഞിരുന്നു. വിവാഹ മോചനം ഉണ്ടാക്കിയ വിവാദങ്ങൾ അവസാനിക്കെ ആണ് നടി വീണ്ടും വാർത്തകളിൽ നിറയുന്നത്.
കരിയറിന്റെ തിരക്കുകളിൽ നിൽക്കവെയുമാണ് സമാന്തയ്ക്ക് ഈ പ്രതിസന്ധി വന്നിരിക്കുന്നതും. യശോദ ആണ് സമാന്തയുടെ പുറത്തിറങ്ങാനിരിക്കുന്ന സിനിമ. ചികിത്സയിലായതിനാൽ നടി ഈ സിനിമയുടെ പ്രൊമോഷൻ പരിപാടികളിൽ പങ്കെടുക്കില്ല. ഖുശി, ശാകുന്തളം, അറേഞ്ച്മെന്റ്സ് ഓഫ് ലൗ, സിതാഡെൽ തുടങ്ങിയ പ്രൊജക്ടുകളാണ് നടിയുടേതായി പുറത്തിറങ്ങാനുള്ളത്.
Continue with Google