ഭാര്യയെ ചേര്‍ത്ത് നിര്‍ത്തി ആര്യ! വിവാഹ വാര്‍ഷികം വിദേശത്ത് നിന്നും ആഘോഷിച്ച് താരദമ്പതികള്‍

വിദേശത്ത് വെച്ചുമായിരുന്നു ആര്യയും സയേഷയും അവരുടെ ഒന്നാം വിവാഹ വാര്‍ഷികം ആഘോഷിച്ചത്. അടുത്ത സുഹൃത്തുകള്‍ക്കൊപ്പമായിരുന്നു ഇത്തവണ ആഘോഷങ്ങള്‍. ഇതിന്റെ ഭാഗമായി സയേഷ സോഷ്യല്‍ മീഡിയയിലൂടെ പോസ്റ്റ് ചെയ്ത ചിത്രങ്ങള്‍ നിമിഷ നേരം കൊണ്ട് വൈറലായി. നീല നിയോണ്‍ വെട്ടത്തില്‍ ഇരുവരും ചേര്‍ന്ന് നില്‍ക്കുന്ന ചിത്രമായിരുന്നു നടി പുറത്ത് വിട്ടത്.

ഞങ്ങളുടെ ഒന്നാം വിവാഹ വാര്‍ഷികം ആഘോഷിക്കുകയാണെന്നും ഭര്‍ത്താവിന് ആശംസകള്‍ അറിയിക്കുകയാണ്. ഒപ്പം നിങ്ങള്‍ തന്ന സ്‌നേഹത്തിനും അനുഗ്രഹങ്ങള്‍ക്കും നന്ദി എന്നും ഫോട്ടോയ്ക്ക് താഴെ ക്യാപ്ഷനായി സയേഷ പറയുന്നു. 2019 മാര്‍ച്ച് പത്തിനായിരുന്നു ഇരുവരുടെയും വിവാഹം. എന്നാല്‍ ഇത്തവണ മാര്‍ച്ച് പതിനൊന്നിനായിരുന്നു ആഘോഷം നടന്നത്.

വിവാഹശേഷം ആര്യയുടെ നായികയായി സയേഷ അഭിനയിക്കുന്ന ടെഡി എന്ന സിനിമ റിലീസിനൊരുങ്ങുകയാണ്. താരദമ്പതികളുടെ വിവാഹവാര്‍ഷിക ദിനമായ മാര്‍ച്ച് പത്തിന് ടെഡി എന്ന സിനിമയില്‍ നിന്നും ഓഫീഷ്യല്‍ ടീസര്‍ പുറത്ത് വന്നിരുന്നു. ത്രില്ലര്‍ ഗണത്തിലൊരുക്കുന്ന ചിത്രത്തില്‍ ആര്യയ്‌ക്കൊപ്പം ഒരു ടേഡി ബീയറാണ് കേന്ദ്രകഥാപാത്രമായി എത്തുന്നത്. ആക്ഷന് പ്രധാന്യം നല്‍കിയൊരുക്കുന്ന സിനിമയിലെ പ്രധാനപ്പെട്ട രംഗങ്ങളില്‍ ചിലതും ടീസറില്‍ ഉള്‍പ്പെടുത്തിയിരുന്നു. മിറുതന്‍, ടിക് ടിക് ടിക്, എന്നീ ചിത്രങ്ങള്‍ക്ക് ശേഷം ശക്തി സൗന്ദര്‍ രാജന്‍ സംവിധാനം ചെയ്യുന്ന ചിത്രമാണ് ടെഡി.

കെവി ആനന്ദിന്റെ സംവിധാനത്തില്‍ പിറന്ന കാപ്പാന്‍ എന്ന ചിത്രത്തിലും ആര്യയും സയേഷയും അഭിനയിച്ചിരുന്നു. മോഹന്‍ലാലും സൂര്യയുമായിരുന്നു ഈ ചിത്രത്തിലെ മറ്റ് കേന്ദ്രകഥാപാത്രങ്ങള്‍. സാധാരണ വിവാഹശേഷം നടിമാര്‍ കുടുംബ ജീവിതത്തില്‍ ഒതുങ്ങി കഴിയുമ്പോള്‍ ഒന്നിച്ച് അഭിനയിച്ച് ആര്യയും സയേഷയും മാതൃകയാവുകയാണ്. ഗജനികാന്ത് എന്ന സിനിമയില്‍ അഭിനയിച്ചപ്പോഴാണ് ഇരുവരും അടുക്കുന്നത്.

സൗഹൃദം ഇഷ്ടത്തിലേക്ക് എത്തിയതോടെ വിവാഹം കഴിക്കാന്‍ തീരുമാനിക്കുകയായിരുന്നു. ഇരു വീട്ടുകാരുടെയും സമ്മതത്തോടെയായിരുന്നു വിവാഹം. മാര്‍ച്ച് 9, 10 ദിവസങ്ങളിലായി ഹൈദരാബാദിലെ ഫലക്‌നുമ കൊട്ടരത്തില്‍ വെച്ചായിരുന്നു താരവിവാഹം നടന്നത്. പരമ്പരാഗത മുസ്ലീം ആചാരപ്രകാരമായിരുന്നു വിവാഹ ചടങ്ങുകള്‍.