വിവാഹമോചനങ്ങൾ തുടർക്കഥയാകുന്നതിനിടെ മറ്റൊരു പ്രതിസന്ധി; താരകുടുംബത്തിന് സംഭവിക്കുന്നതെന്ത്?

തെലുങ്ക് സിനിമാ ലോകത്തെ പ്രബലരാണ് അക്കിനേനി കുടുംബം. അറുപതുകളിലും എഴുപതുകളിലും സൂപ്പർതാരമായി നിലനിന്ന നടൻ അക്കിനേനി നാ​ഗേശ്വര റാവുവിന്റെ പിൻതലമുറയാണ് അക്കിനേനി കുടുംബം എന്ന പേരിൽ സിനിമാ ലോകത്ത് അറിയപ്പെടുന്നത്. നാ​ഗേശ്വര റാവുവിന്റെ മകനാണ് സൂപ്പർതാരം നാ​ഗാർജുന. പിതാവിന്റെ പാത പിന്തുടർന്ന് വിജയം കൈവരിക്കാൻ നാ​ഗാർജുനയ്ക്ക് കഴിഞ്ഞു. 90 കളിൽ നാ​ഗാർജുനയുടെ സിനിമകൾ ബോക്സ് ഓഫീസ് റെക്കോഡുകൾ സൃഷ്ടിച്ചു. തമിഴ്, ഹിന്ദി സിനിമകളിലും ശ്രദ്ധേയമായ ഒരുപിടി കഥാപാത്രങ്ങൾ നാ​ഗാർജുന ചെയ്തു.

പിൽക്കാലത്ത് നാ​ഗാർജുനയുടെ മക്കളായ നാ​ഗചൈതന്യയും അഖിൽ അക്കിനേനിയും സിനിമാ രം​ഗത്തേക്ക് കടന്ന് വന്നു. നാ​ഗ ചൈതന്യ ഇതിനകം സിനിമാ ലോകത്ത് തന്റേതായ സ്ഥാനം നേടി. അഖിൽ അക്കിനേനി താരമായി വളരുന്നതേയുള്ളൂ. കഴിഞ്ഞ കുറച്ച് വർഷങ്ങൾക്കുള്ളിൽ നാ​ഗാർജുനയ്ക്കും മക്കൾക്കും കരിയറിലുണ്ടായ വീഴ്ച സിനിമാ ലോകത്ത് ചർച്ചയായിട്ടുണ്ട്.

നാ​ഗ ചൈതന്യയുടെ ഒടുവിൽ പുറത്തിറങ്ങിയ കസ്റ്റഡി എന്ന സിനിമ ശ്രദ്ധിക്കപ്പെടാതെ പോയി. അതിന് മുമ്പിറങ്ങിയ താങ്ക് യൂ എന്ന സിനിമയും പരാജയപ്പെട്ടു. അഖിൽ അക്കിനേനിയുടെ ഏജന്റ് എന്ന സിനിമ പൂർണ പരാജയമായിരുന്നു.. ഭം​ഗരജു എന്ന സിനിമയ്ക്ക് ശേഷം നാ​ഗാർജനയ്ക്കും ഹിറ്റുകൾ ഇല്ല. എന്താണ് താരകുടുംബത്തിന് സംഭവിക്കുന്നതെന്നാണ് ആരാധകരുടെ ചോദ്യം.

അതേസമയം ​ഗോസിപ്പ് കോളങ്ങളിൽ അക്കിനേനി കുടുംബം ഇടയ്ക്കിടെ വിഷയമാകുന്നുണ്ട്. വിവാഹമോചനത്തിന് പിന്നാലെ വന്ന ​ഗോസിപ്പുകൾ നാ​ഗ ചൈതന്യയെ വിട്ട് പോയിട്ടില്ല. മറുവശത്ത് 2016 ൽ നിശ്ചയിച്ച വിവാഹത്തിൽ നിന്ന് പിന്മാറിയ ശേഷം അഖിൽ മറ്റൊരു വിവാഹത്തിന് തയ്യാറായിട്ടില്ല. അക്കിനേനി കുടുംബത്തിന്റെ ഇന്നലെകൾ പരിശോധിച്ചാൽ വിവാ​ഹമോചനം ഇവരെ സംബന്ധിച്ച് പുതിയ കാര്യമല്ല.

നാ​ഗാർജുനയുടെ ആദ്യ വിവാഹബന്ധം പരാജയപ്പെട്ടതാണ്. ലക്ഷ്മി ദ​ഗുബതിയായിരുന്നു ആദ്യ ഭാര്യ. ഈ ബന്ധത്തിൽ പിറന്ന മകനാണ് നാ​ഗ ചൈതന്യ. 1990 ലാണ് നാ​ഗാർജുനയും ലക്ഷ്മി ദ​ഗുബതിയും പിരിഞ്ഞത്. 1992 ൽ ‌നടി അമലയെ നാ​ഗാർജുന വിവാഹം ചെയ്തു. അമലയിൽ നാ​ഗാർജുനയ്ക്ക് പിറന്ന മകനാണ് അഖിൽ അക്കിനേനി.

2016 ൽ അഖിൽ അക്കിനേനി നിശ്ചയിച്ചുറപ്പിച്ച വിവാഹത്തിൽ നിന്ന് പിൻമാറിയത് വലിയ വാർത്തയായിരുന്നു. ഡിസൈനർ ശ്രിയ ഭൂപാലിനെയാണ് അഖിൽ വിവാഹം കഴിക്കാനിരുന്നത്. എന്നാൽ പിന്നീട് ഈ ബന്ധം വേണ്ടെന്ന് രണ്ട് പേരും തീരുമാനിച്ചു. 22ാം വയസിലാണ് അഖിൽ അക്കിനേനി വിവാഹത്തിന് തയ്യാറാകുന്നത്. അന്ന് ശ്രിയക്ക് പ്രായം 26 ആണ്. പരസ്പരം പ്രണയത്തിലായ ഇവർ പെട്ടെന്ന് വിവാഹത്തിലേക്ക് കടക്കാൻ തീരുമാനിച്ചു. എന്നാൽ വിവാഹനിശ്ചയത്തിന് ശേഷം രണ്ട് പേർക്കുമിടയിൽ പ്രശ്നങ്ങളായി.

നാ​ഗാർജുനയുടെ സഹോദരിയുടെ മക്കളും ആദ്യ വിവാഹബന്ധം വേർപെടുത്തിയവരാണ്. സമാന്ത-നാ​ഗചൈതന്യ വിവാഹ മോചനമാണ് അക്കിനേനി കുടുംബത്തിൽ ഒടുവിലുണ്ടായ വേർപിരിയൽ. 2017 ലാണ് സമാന്തയും നാ​ഗചൈതന്യയും വിവാഹിതരാകുന്നത്. പ്രണയവിവാഹമായിരുന്നു. എന്നാൽ 2021 ൽ ഇവർ പിരിഞ്ഞു. വേർപിരിയലിന് കാരണമെന്തെന്ന് വ്യക്തമല്ല. ​ഇത് സംബന്ധിച്ച് നിരവധി ​​​അഭ്യൂഹങ്ങൾ പരന്നു. ​ഗോസിപ്പുകൾ വകവെക്കാതെ കരിയറിന്റെ തിരക്കുകളാണ് താരങ്ങൾ.

അക്കിനേനി കുടുംബം തെലുങ്കിൽ വീണ്ടും ശക്തമായ സാന്നിധ്യം ആകുമെന്നാണ് ആരാധകരുടെ പ്രതീക്ഷ. തെലുങ്ക് സിനിമാ രം​ഗത്ത് നിരവധി താരകുടുംബങ്ങൾ പ്രബല സാന്നിധ്യമാണ്. ചിരഞ്ജീവിയുടെ കുടുബം ഇതിന് ഉദാഹരണമാണ്. ഇദ്ദേഹത്തിന്റെ മകൻ രാം ചരണും സഹോദരിയുടെ മകൻ അല്ലു അർജുനപം ഇന്ന് സൂപ്പർസ്റ്റാറുകളാണ്.