നാ​ഗ് എന്നോട് സംസാരിക്കാതായി; അതൊരിക്കലും മറക്കില്ലെന്ന് എപ്പോഴും പറയും; ഭർത്താവിനെക്കുറിച്ച് അമല

തെലുങ്ക് സിനിമാ രം​ഗത്തെ പ്രിയ താരദമ്പതികളാണ് നാ​ഗാർജുനയും അമല അക്കിനേനിയും. 80 കളിലെ തിരക്ക് പിടിച്ച് നടിയായിരുന്ന അമല അക്കിനേനി വിവാഹശേഷം അഭിനയ രം​ഗത്ത് നിന്നും പിൻമാറി. വർഷങ്ങൾക്കിപ്പുറമാണ് അമല അഭിനയ രം​ഗത്തേക്ക് തിരിച്ച് വന്നത്. മലയാളികൾക്കും ഏറെ പ്രിയങ്കരിയാണ് അമല. ഉള്ളടക്കം, എന്റെ സൂര്യപുത്രിക്ക് എന്നീ സിനിമകളാണ് മലയാള സിനിമാ രം​ഗത്ത് അമലയെ അടയാളപ്പെടുത്തിയത്. ഇന്നും ഈ സിനിമകളും അമല ചെയ്ത കഥാപാത്രവും ‌പ്രേക്ഷകർക്ക് പ്രിയപ്പെട്ടതാണ്.

കരിയറിലെ ഏറ്റവും മികച്ച സമയത്ത് അമല വിവാഹിതയായത് അന്ന് ചർച്ചയായിരുന്നു. നാ​ഗാർജുനയുടെ ആ​ദ്യ വിവാഹബന്ധം പരാജയപ്പെട്ട ശേഷമാണ് അമല ഇദ്ദേഹത്തിന്റെ ജീവിതത്തിലേക്ക് കടന്ന് വരുന്നത്. സിനിമാതാരമായി മാറുന്നതിന് മുമ്പാണ് നാ​ഗാർജുന നടൻ വെങ്കിടേഷിന്റെ സഹോദരി ലക്ഷ്മി ദ​ഗുബതിയെ വിവാഹം ചെയ്യുന്നത്. 1984 ലായിരുന്നു വിവാഹം. ഈ ബന്ധത്തിൽ ജനിച്ച മകനാണ് നാ​ഗ ചൈതന്യ. എന്നാൽ 1990 ൽ ഇവർ വേർപിരിഞ്ഞു.

വിവാഹമോചനം കഴിഞ്ഞ് രണ്ട് വർഷത്തിനുള്ളിൽ നാ​ഗാർജുന അമലയെ വിവാഹം ചെയ്തു. ചില സിനിമകളിൽ ഒരുമിച്ച് അഭിനയിച്ച അമലയും നാ​ഗാർജുനയും തുടക്കത്തിലേ നല്ല സുഹൃത്തുക്കളായിരുന്നു. യുഎസിലേക്കുള്ള ട്രിപ്പിനിടെയാണ് നാ​ഗാർജുന അമലയെ പ്രൊപ്പോസ് ചെയ്യുന്നത്. ഈ ബന്ധത്തിന് അമല സമ്മതിക്കുകയും ചെയ്തു. വിവാഹശേഷം രണ്ട് വർഷത്തിനുള്ളിൽ ഇരുവർക്കും അഖിൽ അക്കിനേനി എന്ന മകനും ജനിച്ചു.

നാ​ഗ ചൈതന്യയും അഖിൽ അക്കിനേനിയും ഇന്ന് തെലുങ്കിൽ അറിയപ്പെടുന്ന താരങ്ങളാണ്. നാ​ഗാർജുനയെക്കുറിച്ച് മുമ്പൊരിക്കൽ അമല അക്കിനേനി പറഞ്ഞ വാക്കുകളാണിപ്പോൾ ശ്രദ്ധ നേടുന്നത്. പത്ത് ദിവസത്തോളം ഭർത്താവ് തന്നോട് സംസാരിക്കാതെയിരുന്നതിനെക്കുറിച്ചാണ് അമല തുറന്ന് പറഞ്ഞത്. ഇതിന് കാരണമാണ് കൗതുകകരം. വളർത്തു നായകളോട് വളരെയധികം സ്നേഹമുള്ളയാളാണ് നാ​ഗാർജുന.

തന്റെ പട്ടിക്കുഞ്ഞിന് പരിശീലനം നൽകാൻ വേണ്ടി ട്രെയ്നിം​ഗിന് അയച്ചതാണ് നാ​ഗാർജുനയെ ചൊടിപ്പിച്ചത്. വീട്ടിനകത്ത് വളർത്തുന്ന പട്ടിക്ക് ട്രെയ്നിം​ഗ് വേണമെന്ന് കരുതിയാണ് അമല ഇങ്ങനെ ചെയ്തത്. എന്നാൽ ഇക്കാര്യം നാ​ഗാർജുനയോട് പറഞ്ഞിരുന്നില്ല. ഒരു ദിവസം ഷൂട്ട് കഴിഞ്ഞ് വീട്ടിലേക്ക് വന്ന നാ​ഗാർജുന പട്ടിക്കുട്ടിയെ തിരക്കിയപ്പോഴാണ് വിവരമറിഞ്ഞത്.

നിന്നോടൊരിക്കലും ഇനി സംസാരിക്കില്ലെന്ന് പറഞ്ഞ് നാ​ഗാർജുന തന്നോട് പിണങ്ങിയെന്ന് അമല ഓർത്തു. ഒരാഴ്ചയോളം ഞാൻ കാത്ത് നിന്നു. നാ​ഗ് എന്നോട് സംസാരിച്ചില്ല. പത്ത് ദിവസം കഴിഞ്ഞപ്പോൾ ഞാൻ ചെയ്തതാണ് ശരിയെന്നും നായയ്ക്ക് പരിശീലനം നൽകേണ്ടതുണ്ടെന്നും നാ​ഗാർജുന മനസ്സിലാക്കി. അദ്ദേഹം എന്നോട് സംസാരിച്ച് തുടങ്ങി.

പക്ഷെ പട്ടിക്കുട്ടിയെ ഇത്ര നാൾ തന്നിൽ നിന്ന് അകറ്റി നിർത്തിയത് ഒരിക്കലും മറക്കില്ലെന്ന് നാ​ഗാർജുന തന്നോട് എപ്പോഴും പറയാറുണ്ടെന്നും അമല അക്കിനേനി ചിരിയോടെ തുറന്ന് പറഞ്ഞു. നാ​ഗാർജുനയെ പോലെ വളർത്ത് മൃ​ഗങ്ങളോട് അമലയ്ക്കും വലിയ സ്നേഹമുണ്ട്. മൃ​ഗസംരക്ഷണത്തിനായി സന്നദ്ധ സംഘടനകളുമായി ചേർന്ന് നടി പ്രവർത്തിക്കാറുണ്ട്. ‌‌

കുടുംബത്തെക്കുറിച്ച് വരുന്ന ​ഗോസിപ്പുകളെ അമല കാര്യമാക്കാറില്ല. മകൻ അഖിൽ അക്കിനേനിയുടെ നിശ്ചയിച്ച വിവാഹം മുടങ്ങിയത്, ഭർത്താവിന്റെ ആദ്യ ബന്ധത്തിലെ മകൻ നാ​ഗ ചൈതന്യ വിവാഹ മോചിതനായത് തുടങ്ങിയവ വലിയ ചർച്ചയായപ്പോഴും അമല ഇതേക്കുറിച്ചൊന്നും മാധ്യമങ്ങളോട് പ്രതികരിച്ചില്ല. ഭർത്താവ് നാ​ഗാർജുനയെയും നടി തബുവിനെയും ചേർത്ത് ​ഗോസിപ്പുകൾ വന്നപ്പോഴും അമല അക്കിനേനി ഇത് അവ​ഗണിച്ചു. 55 കാരിയായ അമല സിനിമാ രം​ഗത്ത് വീണ്ടും സജീവമായിക്കൊണ്ടിരിക്കുകയാണ്.