നാ​ഗാർജുനയും ആദ്യ ഭാര്യയും വേർപിരിയാൻ കാരണം; പിതാവിന്റെ വാക്കുകൾക്കിടെ ചർച്ചയായി താരകുടുംബം

തെലുങ്ക് സിനിമാ ലോകത്തെ സൂപ്പർതാരങ്ങളിലൊരാളാണ് നാ​ഗാർജുന. അഭിനയ രം​ഗത്ത് വർഷങ്ങളുടെ അനുഭവ സമ്പത്തുള്ള നാ​ഗാർജുന തമിഴിലും തെലുങ്കിലും ശ്രദ്ധേയ സിനിമകളിൽ അഭിനയിച്ചിട്ടുണ്ട്. നടന്റെ രണ്ട് മക്കളും ഇന്ന് സിനിമാ രം​ഗത്ത് സജീവമാണ്. നാ​ഗ ചൈതന്യ, അഖിൽ അക്കിനേനി എന്നിവരാണ് നാ​ഗാർജുനയുടെ മക്കൾ. ആദ്യ ഭാര്യ ലക്ഷ്മി ദ​ഗുബതിയിൽ നാ​ഗാർജുനയ്ക്ക് പിറന്ന മകനാണ് നാ​ഗ ചൈതന്യ.

ഈ ബന്ധം പിരിഞ്ഞ ശേഷം നടി അമലയെ താരം വിവാഹം ചെയ്തു. ഇവർക്ക് ജനിച്ച മകനാണ് അഖിൽ അക്കിനേനി. മക്കൾ രണ്ട് പേരുടെയും കാര്യത്തിൽ പ്രത്യേക ശ്രദ്ധ നാ​ഗാർജുനയ്ക്കുണ്ട്. 1984 ലാണ് നാ​ഗാർജുന ലക്ഷ്മി ദ​ഗുബതിയെ വിവാഹം ചെയ്യുന്നത്. രണ്ട് വർഷത്തിനുള്ള നാ​ഗ ചൈതന്യ പിറന്നു. എന്നാൽ 1990ൽ ഇരുവരും വേർപിരിയുകയാണുണ്ടായത്.

തെലുങ്ക് സിനിമാ ലോകത്തെ പ്രബലനായ ഡോ. രാമനായ്ഡുവിന്റെ മകളാണ് ലക്ഷ്മി ദ​ഗുബതി. ലക്ഷ്മിയും നാ​ഗാർജുനയും എന്തിനാണ് വേർപിരിഞ്ഞതെന്ന് സംബന്ധിച്ച് ചില അഭ്യൂഹങ്ങൾ അന്ന് വന്നിരുന്നു. എന്നാൽ ഇതേക്കുറിച്ച് രണ്ട് പേരും പ്രതികരിച്ചില്ല.

ഇപ്പോഴിതാ നാ​ഗാർജുനയുടെ പിതാവ് അക്കിനേനി നാ​ഗേശ്വര റാവു മുമ്പൊരിക്കൽ മകനെക്കുറിച്ച് മുമ്പൊരിക്കൽ പറഞ്ഞ വാക്കുകൾ വീണ്ടും ശ്രദ്ധ നേടുകയാണ്. മകന്റെ വിവാഹമോചനത്തെക്കുറിച്ച് പരാമർശിച്ചില്ലെങ്കിലും മകൻ സിനിമാ രം​ഗത്തേക്ക് കടന്ന് വന്ന സാഹചര്യത്തെക്കുറിച്ച് ഇദ്ദേഹം സംസാരിക്കുന്നുണ്ട്.

നാ​ഗാർജുന ഒരു സിനിമാ താരമായി മാറുമെന്ന് താൻ കരുതിയില്ലെന്നും അതിനാൽ മകനെ ബിസിനസിലേക്ക് കൊണ്ട് വരാൻ താൻ ശ്രമിച്ചതെന്നും മുമ്പൊരിക്കൽ നവാ​ഗേശ്വര റാവു തുറന്ന് പറഞ്ഞു. ഇതിനായി യുഎസിൽ ഒരു ബിസിനസ് കോഴ്സിന് നാ​ഗാർജുനയെ ചേർത്തു. പഠനം കഴിഞ്ഞ് ഒരു വർഷത്തിനുള്ളിൽ മകൻ വിവാഹിതനായി.

ബിസനസ് തുടങ്ങാനുള്ള ചർച്ചകൾ നടക്കവെ തനിക്ക് അഭിനയിക്കാനാണ് താൽപര്യമെന്ന് നാ​ഗാർജുന പറഞ്ഞു. എന്നാൽ ആക്ടിം​ഗ് കോഴ്സ് പഠിച്ചിട്ടില്ല. ഇതോടെ ഡയലോ​ഗ് ഡെലിവറിയും കരാട്ടെയും നാ​ഗാർജുന പഠിച്ചു. മുംബൈയിൽ പോയി ആറ് മാസത്തെ ആക്ടിം​ഗ് കോഴ്സും ചെയ്തു. ഇതിന് ശേഷമാണ് മകനെ സിനിമയിലേക്ക് കൊണ്ട് വന്നതെന്ന് നാ​ഗേശ്വര റാവു അന്ന് വ്യക്തമാക്കി.

സിനിമാ രം​ഗത്തേക്ക് വരുന്നതിന് കുറച്ച് വർഷങ്ങൾക്ക് മുമ്പാണ് നാ​ഗാർജുനയും ലക്ഷ്മിയും തമ്മിലുള്ള വിവാഹം നടന്നത്. റിപ്പോർട്ടുകൾ പ്രകാരം നാ​ഗാർജുന അഭിനയ രം​ഗത്തേക്ക് കടക്കുന്നതിൽ ലക്ഷ്മിക്ക് താൽപര്യമുണ്ടായിരുന്നില്ല. ഇതോടെയാണ് ഇരുവരും തമ്മിൽ അകലുന്നതും വിവാഹമോചനം നേടുന്നതും. 1992 ലാണ് നാ​ഗാർജുന അമല അക്കിനേനിയെ വിവാഹം ചെയ്യുന്നത്. പ്രണയ വിവാഹമായിരുന്നു. വിവാഹശേഷം അമല അഭിനയ രം​ഗത്ത് നിന്നും മാറി നിന്നു.

വിവാഹമോചനം അക്കിനേനി കുടുംബത്തിൽ പതിവാണെന്ന് പൊതുവെ സിനിമാ ലോകത്ത് സംസാരമുണ്ട്. നാ​ഗാർജുനയ്ക്ക് പുറമെ ഈ കുടുംബത്തിലെ മറ്റ് ചിലരും വിവാഹമോചിതരായിട്ടുണ്ട്. 2021 ൽ നാ​ഗാർജുനയുടെ മകൻ നാ​ഗ ചൈതന്യയും വിവാഹമോചനം നേടി. നാല് വർഷത്തെ വിവാഹ ജീവിതത്തിന് ശേഷമാണ് നാ​ഗ ചൈതന്യയും സമാന്തയും വേർപിരിഞ്ഞത്. പിരിഞ്ഞതിന് കാരണം എന്തെന്ന് വ്യക്തമല്ല. നാ​ഗാർജുനയുടെ ഇളയ മകൻ അഖിൽ അക്കിനേനിയുടെ വിവാഹ നിശ്ചയം കഴിഞ്ഞെങ്കിലും ഈ വിവാഹം പിന്നീട് വേണ്ടെന്ന് വെക്കുകയാണുണ്ടായത്.