ദിലീപിനെ അമ്മയിൽ നിന്നും പുറത്താക്കിയ സംഭവം, വേദനയുണ്ടെന്ന് ദേവൻ

അമ്മ സംഘടന ദിലീപിനെ പുറത്താക്കിയ സംഭവം ഓർക്കുമ്പോൾ ഇപ്പോഴും വേദനയുണ്ടെന്ന് നടൻ ദേവൻ. അന്ന് രാഷ്ട്രീയ പാർട്ടികളും മാധ്യമങ്ങളും ചേർന്ന് സമ്മർദ്ദമുണ്ടാക്കിയെന്നും ദേവൻ പറയുന്നു. മമ്മൂട്ടിയുടെ വീടിന്റെ മുന്നിൽ റീത്ത് വെച്ച് പ്രതിഷേധിച്ച സംഭവങ്ങൾ ഉണ്ടായി. അന്ന് ആർട്ടിസ്റ്റുകൾ നിസ്സഹായരായിരുന്നുവെന്നും അദ്ദേഹം കൂട്ടിച്ചേർത്തു.

ഓരോ ആർട്ടിസ്റ്റിന്റെ പേരിലും ആരോപണം വന്നാൽ ഉടൻ തന്നെ സംഘടനയിൽ നിന്ന് പുറത്താക്കാൻ പാടില്ല. ഇതിനൊരു നടപടിക്രമമുണ്ട്. ഒരു നോട്ടീസ് നൽകണം. അതിന് ശേഷം വിശദീകരണം ചോദിക്കണം. അതിന് സമയം കൊടുക്കണം. ഇതൊന്നും ചെയ്യാതെയാണ് ദിലീപിനെ പുറത്താക്കിയതെന്നും ദേവൻ പറയുന്നു.

അമ്മയുടെ മീറ്റിംഗ് മമ്മൂട്ടിയുടെ വീട്ടിൽ വെച്ചായിരുന്നു. പുറത്ത് മീഡിയയുടെ ബഹളമായിരുന്നു. ദിലീപിനെ പുറത്താക്കണം എന്നാവശ്യപ്പെട്ട് രാഷ്ട്രീയ പാർട്ടികളുടെ സമരങ്ങളും നടന്നു. ആ സമയത്ത് കോൺഗ്രസുകാരും കമ്മ്യൂണിസ്റ്റുകാരും മമ്മൂട്ടിയുടെ വീടിന് മുന്നിൽ റീത്ത് സമർപ്പിച്ചു.

അന്ന് ദിലീപിനെ പുറത്താക്കുന്നതിന് മുമ്പ് അദ്ദേഹത്തിന് പറയാനുള്ളത് കേൾക്കണമായിരുന്നു. അദ്ദേഹത്തിന് ഒരു ഷോക്കോസ് നോട്ടീസ് കൊടുത്ത് വിശദീകരണം ചോദിക്കണമായിരുന്നു. അതിന് ശേഷം മറുപടി തൃപ്തികരമല്ലെങ്കിൽ സസ്പെൻഡ് ചെയ്യാനേ പാടുള്ളൂവെന്നും ദേവൻ അഭിപ്രായപ്പെട്ടു.

അന്ന് ദിലീപ് കോടതിയെ സമീപിച്ചിരുന്നെങ്കിൽ അമ്മ സംഘടന പ്രതിസന്ധിയിലായേനെ. എന്നാൽ, തന്റെ പേരിൽ അമ്മയ്ക്ക് ഒരു ദോഷവും വരരുതെന്ന് കരുതി അദ്ദേഹം അതിന് പോയില്ല. കുറ്റം ചെയ്തിട്ടില്ലെന്ന് ദിലീപിന് ഉറപ്പുണ്ടായിരുന്നു. ജനങ്ങളെ ബോധിപ്പിക്കാൻ വേണ്ടിയാണ് അന്ന് സംഘടന നടപടിയെടുത്തതെന്നും ദേവൻ പറഞ്ഞു.

അമ്മ എന്ന സംഘടനയുടെ സാമ്പത്തിക ഭദ്രതയ്ക്ക് വലിയ സംഭാവന നൽകിയ വ്യക്തിയാണ് ദിലീപ്. ഒരു സിനിമയുടെ ലാഭത്തിൽ നിന്ന് 25 ലക്ഷം രൂപ അമ്മയ്ക്ക് സംഭാവന ചെയ്ത സംഭവം ഉണ്ടായിട്ടുണ്ട്. അദ്ദേഹത്തിന്റെ ആ നല്ല മനസ് കാണാതെ പോകരുതെന്നും ദേവൻ കൂട്ടിച്ചേർത്തു.