ആ സിനിമ ചെയ്തിരുന്നുവെങ്കില്‍ ജനം എന്നെ വളഞ്ഞിട്ട് തല്ലുമായിരുന്നു; ഐശ്വര്യയുടെ തുറന്നു പറച്ചില്‍

കുച്ച് കുച്ച് ഹോത്താ ഹേ പോലൊരു സിനിമ ഐശ്വര്യ നിരസിച്ചത് പലരേയും അമ്പരപ്പിച്ചൊരു വാര്‍ത്തയായിരുന്നു. ഫിലിംഫെയറിന് നല്‍കിയ അഭിമുഖത്തിലാണ് എന്തുകൊണ്ടാണ് താന്‍ കുച്ച് കുച്ച് ഹോത്താ ഹേ നിരസിച്ചതെന്ന് ഐശ്വര്യ വ്യക്തമാക്കുന്നുണ്ട്. താരത്തിന്റെ വാക്കുകളിലേക്ക്.

''തുടക്കക്കാരിയായിരുന്നുവെങ്കിലും എന്നെ താരതമ്യം ചെയ്തിരുന്നത് മുതിര്‍ന്ന നടിമാരുമായിട്ടായിരുന്നു. ഞാന്‍ ആ സിനിമ ചെയ്തിരുന്നുവെങ്കില്‍ അതൊക്കെ നഷ്ടമാകുമായിരുന്നു. മോഡലിംഗ് കാലത്ത് ചെയ്തിരുന്നത് തന്നെ ചെയ്യുന്നതിലേക്ക് തിരിച്ചെത്തിയിരിക്കുകയാണ് ഐശ്വര്യ എന്ന് പറയും. മുടി സ്‌ട്രെയിറ്റ് ചെയ്ത്, മിനി സ്്‌കേര്‍ട്ട് ധരിച്ച്, ക്യാമറയെ നോക്കി കണ്ണിറുക്കിയും ചിരിച്ചുമൊക്കെ നടക്കുകയാണ് എന്ന് പറയുമായിരുന്നു. ഒടുവില്‍ ഹീറോ യഥാര്‍ത്ഥ വ്യക്തിയിലേക്ക് തന്നെ തിരിച്ചു പോവുകയും ചെയ്യും. എനിക്കറിയാം കുച്ച് കുച്ച് ഹോത്താ ഹേ ചെയ്തിരുന്നുവെങ്കില്‍ എന്നെ ആളുകള്‍ വട്ടം കൂടി നിന്ന് തല്ലുമായിരുന്നു'' എന്നാണ് ഐശ്വര്യ പറയുന്നത്.

കരണ്‍ ജോഹര്‍ ആദ്യമായി സംവിധാനം ചെയ്ത ചിത്രമായിരുന്നു കുച്ച് കുച്ച് ഹോത്താ ഹേ. ചിത്രം വന്‍ വിജയമായി മാറിയിരുന്നു. അതേസമയം ചിത്രം എഴുതിയിരുന്ന സമയത്ത് ടീന എന്ന കഥാപാത്രമായി കരണ്‍ മനസില്‍ കണ്ടിരുന്നത് തന്റെ അടുത്ത സുഹൃത്തും നടിയുമായ ട്വിങ്കിള്‍ ഖന്നയെയായിരുന്നു. എന്നാല്‍ വലിയ പ്രതീക്ഷയോടെ സിനിമയിലെത്തിയ ട്വിങ്കിളിന് പക്ഷെ തന്റെ അച്ഛന്റേയും അമ്മയുടേയും വിജയം ആവര്‍ത്തിക്കാന്‍ സാധിച്ചില്ല. 13 സിനിമകളില്‍ ആ അഭിനയജീവിതം ട്വിങ്കില്‍ മതിയാക്കുകയും പിന്നീട് മാധ്യമപ്രവര്‍ത്തകയും എഴുത്തുകാരിയുമൊക്കെയായി മാറുകയായിരുന്നു. ടീനയുടെ വേഷം ട്വിങ്കിളും വേണ്ടെന്ന് വച്ചതോടെ കരണ്‍ സമീപിച്ചത് ഉര്‍മിള മണ്ടോദ്കറിനേയും തബുവിനേയുമായിരുന്നു. പിന്നെയാണ് ഐശ്വര്യയിലേക്ക് കരണ്‍ എത്തുന്നത്. എന്നാല്‍ തന്നെ തിരിച്ചുവിളിച്ചത് ഐശ്വര്യ മാത്രമായിരുന്നുവെന്നും പക്ഷെ ഐശ്വര്യയും നിരസിച്ചുവെന്നാണ് കരണ്‍ പറയുന്നത്.

Recommended Video

Vicky Kaushal & Katrina Kaif’s Wedding Footage Rights Sold To Amazon Prime For A Whopping 80 Crores?

എന്തായാലും ടീനയായി ആരെ കൊണ്ടു വരുമെന്ന ആശങ്കയിലിരിക്കുന്ന കരണിനോട് റാണി മുഖര്‍ജിയുടെ പേര് പറയുന്നത് ആദിത്യ ചോപ്രയാണ്. അതോടെ ഷാരൂഖിനും കജോളിനുമൊപ്പം ടീനയായി റാണി മുഖര്‍ജിയും കുച്ച് കുച്ച് ഹോത്താ ഹേയിലെത്തി. റാണിയുടെ അരങ്ങേറ്റ ചിത്രം പ്രതീക്ഷിച്ച വിജയം നേടിയിരുന്നില്ല. പക്ഷെ കുച്ച് കുച്ച് ഹോത്താ ഹേയുടെ വിജയം റാണി മുഖര്‍ജിയെ മുന്‍നിര നായികയാക്കി മാറ്റുകയായിരുന്നു. ഐശ്വര്യ റായിയും കരണ്‍ ജോഹറും പിന്നീട് ഒരുമിച്ച് പ്രവര്‍ത്തിക്കുന്നത് വര്‍ഷങ്ങള്‍ക്ക് ശേഷം 2016 ല്‍ യേ ദില്‍ ഹേ മുഷ്ഖില്‍ എന്ന ചിത്രത്തിലൂടെയാണ്.