ഞാനൊരു 'ഫര്‍ണിച്ചര്‍' മാത്രമായിരുന്നു, ഒന്നും നേടാനായില്ല; കരിയറില്‍ സംഭവിച്ചത് എന്തെന്ന് ധൂം നായിക

തന്റെ കരിയറിലെ വലിയ സിനിമകളില്‍ പോലും താന്‍ വെറുമൊരു ഫര്‍ണിച്ചറായിരുന്നുവെന്നാണ് റിമി പറയുന്നത്. അതോടൊപ്പം ആ സമയം താന്‍ പണം മാത്രമായിരുന്നു നോക്കിയിരുന്നതെന്നും റിമി പറയുന്നു. താന്‍ ചെറുപ്പമായിരുന്നുവെന്നും അതിന്റെ പക്വതയില്ലായ്മ തനിക്കുണ്ടായിരുന്നുവെന്നുമാണ് റിമി പറയുന്നത്. പണം മാത്രമായിരുന്നു തന്നെ അകര്‍ഷിച്ചിരുന്നതെന്നും റിമി ഓര്‍ക്കുന്നു.

''അന്ന് എനിക്ക് പക്വതയുണ്ടായിരുന്നില്ല. ചെറുപ്പമായിരുന്നു അഗ്രസ്സീവ് ആയിരുന്നു. ഒരുപാട് വര്‍ക്ക് ലഭിച്ചിരുന്നു. ഞാന്‍ ഫ്‌ളോയ്ക്ക് ഒപ്പം നീങ്ങി. പണം മാത്രമാണ് നോക്കിയിരുന്നത്. ഞാന്‍ ധൂം ചെയ്തു, ഹേരാ ഫേരി ചെയ്തു. ഹംഗാമ, ഗോല്‍മാല്‍ ഒക്കെ ചെയ്തു. എല്ലാത്തിലും വെറും ഫര്‍ണിച്ചറായിരുന്നു എന്റെ കഥാപാത്രം. അന്ന് സിനിമാ ലോകം പുരുഷ കേന്ദ്രീകൃതമായിരുന്നു. ഇന്ന് കണ്ടന്റാണ് ഹീറോ. അന്നത്തെ കാലത്ത് ഹീറോ മാത്രമായിരുന്നു ഹീറോ. ഒടിടി പ്ലാറ്റുഫോമുകള്‍ എല്ലാം മാറ്റിമറിച്ചു''. ഇന്ത്യന്‍ എക്‌സ്പ്രസിന് നല്‍കിയ അഭിമുഖത്തില്‍ റിമി മനസ് തുറന്നു.

ഇന്നത്തെ ഫിലിംമേക്കര്‍മാര്‍ ധൈര്യശാലികളാണെന്നും നൂറ് കോടി നേടുന്ന ചിത്രങ്ങള്‍ ഒരുക്കുക എന്ന ബാധ്യത അവര്‍ക്കില്ലെന്നും റിമി പറയുന്നു. ക്വിറ്റ് ചെയ്യാന്‍ തീരുമാനിക്കും മുമ്പ് വേണ്ടത്ര ഫൈറ്റ് ചെയ്യാന്‍ താന്‍ തയ്യാറായില്ലെന്നതാണ് തന്റെ പിഴവെന്നും റിമി പറയുന്നു. ഇന്ന് പത്ത് വര്‍ഷങ്ങള്‍ക്ക് ശേഷം തന്റെ സിനിമകള്‍ കാണുമ്പോള്‍ എന്താണ് നേടിയതെന്ന് ചിന്തിക്കും. ഒന്നുമില്ലെന്നായിരിക്കും ഉത്തരമെന്നും റിമ പറഞ്ഞു.

അഷുതോഷ് ഗവാരിക്കറുടെ സ്വദേസ്, രാജ്കുമാര്‍ ഹിറാനിയുടെ മുന്ന ഭായ് എംബിബിസ് പോലുള്ള സിനിമകള്‍ തനിക്ക് നഷ്ടമായതിനെ കുറിച്ച് മറ്റൊരു അഭിമുഖത്തിലും റിമി സംസാരിച്ചിരുന്നു. അവസരങ്ങള്‍ നഷ്ടപ്പെട്ടിട്ടുണ്ട്. പക്ഷെ അതൊരു അഭിനേതാവിന്റെ ജീവിതത്തില്‍ സ്വാഭാവികമാണെന്നും താരം പറയുന്നു. റിമി അവസാനമായി അഭിനയിച്ചത് തിഗ്മാന്‍ഷു ധൂലിയ ചിത്രമായ ഷാഗിര്‍ഡിലാണ്. 2011 ലായിരുന്നു ഈ സിനിമ തീയേറ്ററുകളിലെത്തിയത്. 2015ല്‍ ബിഗ് ബോസിലും റിമി പങ്കെടുത്തിരുന്നു. ബംഗാളി സിനിമയിലൂടെയായിരുന്നു റിമിയുടെ അരങ്ങേറ്റം. തെലുങ്കിലും അഭിനയിച്ചിട്ടുണ്ട്. ഹംഗാമയായിരുന്നു ആദ്യ ഹിന്ദി ചിത്രം.