കാമുകി സബ ആസാദിനൊപ്പം പുതിയ വീട്ടിലേക്ക് മാറാൻ ഹൃത്വിക്; 100 കോടിയുടെ ഫ്ലാറ്റ് സ്വന്തമാക്കി താരം!

സൂസെയ്ന്‍ ഖാനുമായി പിരിഞ്ഞ് ഏകദേശം നാലഞ്ച് വർഷങ്ങൾക്ക് ശേഷമാണ് ഹൃത്വിക് റോഷൻ സബയുമായി അടുക്കുന്നതും. ഒരുകാലത്ത് ബോളിവുഡ് ആഘോഷമാക്കിയിരുന്ന ദമ്പതികൾ ആയിരുന്നു ഹൃത്വിക്കും സൂസെയ്നും. കുട്ടിക്കാലം തൊട്ടുള്ള പരിചയം പിന്നീട് പ്രണയത്തിലേക്കും വിവാഹത്തിലേക്കും എത്തുകയായിരുന്നു. മാതൃക ദമ്പതികളായിട്ടായിരുന്നു ഇരുവരേടും പലരും കണ്ടിരുന്നത്. എന്നാല്‍ 2014 ല്‍ ഹൃത്വിക്കിനും സൂസെയ്‌നും ഇടയില്‍ പ്രശ്‌നങ്ങള്‍ ഉടലെടുക്കുകയും പിന്നാലെ ഇരുവരും പിരിയുകയും ചെയ്തു.

സിനിമാലോകത്തേയും ആരാധകരേയും ഒരുപോലെ ഞെട്ടിച്ച ഒന്നായിരുന്നു ആ വേർപിരിയൽ. എന്നാല്‍ വിവാഹ ബന്ധം അവസാനിപ്പിച്ച ശേഷവും നല്ല സുഹൃത്തുക്കളായി തുടരുന്നുണ്ട് ഹൃത്വിക്കും സൂസെയ്‌നും. മക്കളുടെ ഉത്തരവാദിത്തം പങ്കിടുന്ന ഇരുവരും ഇപ്പോഴും ഒരുമിച്ച് യാത്രകളും മറ്റും നടത്താറുണ്ട്. നടൻ ആർസലൻ ഗോണിയുമായി പ്രണയത്തിലാണ് സൂസെയ്ൻ ഇപ്പോൾ. അടുത്തിടെ ഇവർ നാല് പേരും ഒന്നിച്ച് യാത്ര നടത്തിയത് ശ്രദ്ധനേടിയിരുന്നു.

അടുത്തിടെയായി പൊതു ഇടങ്ങളിലും യാത്രകളിലുമൊക്കെ ഹൃത്വികിനെയും സബയെയും നിരന്തരം ഒന്നിച്ചു കാണാറുണ്ട്. അതേസമയം, ഇരുവരും തങ്ങളുടെ പ്രണയ ജീവിതത്തിന്റെ പുതിയൊരു ഘട്ടത്തിലേക്ക് കടക്കാനൊരുങ്ങുകയാണെന്നാണ് പുതിയ റിപ്പോർട്ടുകൾ.

വലിയൊരു ആഡംബര വീട് സ്വന്തമാക്കി അങ്ങോട്ടേയ്ക്ക് താമസം മാറാനുള്ള ഒരുക്കത്തിലാണ് സബയും ഹൃത്വിക്കും എന്നാണ് പുറത്തു വരുന്ന വിവരം. ഇതിനായുള്ള ഒരുക്കങ്ങളും താരങ്ങൾ തുടങ്ങിയതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു.

മുംബൈയിലെ മന്നത്ത് എന്ന ബിൽഡിങ്ങിലാണ് സബയും ഹൃത്വിക്കും പുതിയ വീട് വാങ്ങിയിരിക്കുന്നത് എന്നാണ് വിവരം. കെട്ടിടത്തിന്റെ മുകളിലത്തെ മൂന്ന് നിലകൾ ഇരുവരും നവീകരിച്ചെന്നും ഉടൻ തന്നെ പുതിയ വീട്ടിലേക്ക് താമസം മാറുമെന്നും ഇന്ത്യാ ടുഡേ റിപ്പോർട്ട് ചെയ്തു.

പുതിയ വീടിനായുള്ള രണ്ട് അപ്പാർട്മെന്റുകൾക്കായി ഹൃത്വിക് ഏകദേശം 100 കോടി രൂപ ചെലവഴിച്ചെന്നാണ് അറിയുന്നത്. മൂന്ന് നിലകളിലായാണ് ഈ രണ്ട് അപാർട്മെന്റുകൾ. ഏകദേശം 38,000 സ്ക്വയർ ഫീറ്റിൽ വ്യാപിച്ചു കിടക്കുന്ന അപർട്മെന്റ്റ് കടലിന് അഭിമുഖമായാണ് വരുന്നത്. ഇതിൽ ഡ്യൂപ്ലക്സ് ഫ്ളാറ്റിന് 67.50 കോടിയാണത്രേ വില. കെട്ടിടത്തിന്റെ 15, 16 നിലകളിലായാണ് ഈ ഫ്ലാറ്റുള്ളത്. മറ്റൊരു അപാർട്മെൻ‌റിന് വേണ്ടി 30 കോടിയും താരം മുടക്കിയെന്ന് റിപ്പോർട്ടിൽ പറയുന്നു.

വിക്രം വേദയാണ് ഹൃതികിന്റെ ഏറ്റവും ഒടുവിൽ പുറത്തിറങ്ങിയ സിനിമ. മാധവനും വിജയ് സേതുപതിയും അഭിനയിച്ച തമിഴിലെ വിക്രം വേദയുടെ ഹിന്ദി റീമേക്കായിരുന്നു ചിത്രം. തമിഴിൽ ചിത്രം സംവിധാനം ചെയ്ത പുഷ്കറും ഗായത്രിയും തന്നെയാണ് ചിത്രം സംവിധാനം ചെയ്തത്. ചിത്രത്തിൽ മാധവൻ ചെയ്ത പോലീസ് വേഷം ചെയ്തത് സെയ്ഫ് അലി ഖാനാണ്. ചിത്രത്തിന് സമ്മിശ്ര പ്രതികരണമാണ് ലഭിച്ചത്.