ഒരാൾ മറ്റാെരാളെ വലിച്ച് താഴെയിടും; ബോളിവുഡിന്റെ മറ്റൊരു മുഖത്തെക്കുറിച്ച് ഐശ്വര്യ റായുടെ വാക്കുകൾ

ഹിന്ദി സിനിമകൾക്കപ്പുറം പാൻ ഇന്ത്യൻ തലത്തിൽ ഒരുങ്ങുന്ന ബ്രഹ്മാണ്ഡ സിനിമകളിലും ഐശ്വര്യ ആയിരുന്നു നായിക. എന്തിരൻ, രാവണൻ തുടങ്ങിയ സിനിമകൾ ഇതിന് ഉ​ദാഹരണമാണ്. ബോളിവുഡിലെ മുൻനിര നായിക നടിയായി തിളങ്ങവെ സിനിമാ ലോകത്തെ ചില മോശം പ്രവണതകളെ പറ്റി ഐശ്വര്യ റായ് തുറന്ന് സംസാരിച്ചിരുന്നു. വർഷങ്ങൾക്ക് മുമ്പ് സിമി ​ഗെരവാളുമായുള്ള അഭിമുഖത്തിലാണ് ഐശ്വര്യ ഇതേപറ്റി പറഞ്ഞത്. മറ്റൊരാളെ ഉയരാൻ സമ്മതിക്കാത്ത പ്രവണത ബോളിവുഡിലുണ്ടെന്ന് ഐശ്വര്യ പറഞ്ഞു.

'എല്ലാം ഞണ്ടുകളും ഒരു ബാസ്കറ്റിലാണ്. പുറത്ത് കടക്കാൻ ഒരു ഞണ്ട് എല്ലാ പരിശ്രമങ്ങളും നടത്തുമ്പോൾ പ്രോത്സാഹിപ്പിക്കുന്നതിന് പകരം മറ്റ് ഞണ്ടുകൾ അവനെ താഴേക്ക് വലിച്ച് നീ എവിടെയും പോവുന്നില്ല എന്ന് പറയും. ഇത് ഒരു ദുഖകരമായ രീതിയാണ്,' ഐശ്വര്യ റായ് പറഞ്ഞതിങ്ങനെ.

അതേസമയം തനിക്ക് ഇത്തരം രീതികളുടെ പേരിൽ കരിയറിൽ തിരിച്ചടി ഉണ്ടായിട്ടില്ലെന്നും ഐശ്വര്യ പറഞ്ഞു. പുതുമുഖമെന്ന നിലയിൽ തനിക്ക് ചില വ്യത്യാസങ്ങൾ ഉണ്ടായിരുന്നു. ആദ്യ സിനിമയുടെ ജയപരാജയമല്ല തന്റെ ഭാവിയെ നിശ്ചയിച്ചത്. ഒരു തോൽവിയിൽ തനിക്ക് വലിയ ഇൻസെക്യൂരിറ്റി തോന്നിയിട്ടില്ലെന്നും ഐശ്വര്യ പറഞ്ഞു. കരിയറിൽ അന്നും ഇന്നും തന്റേതായ ഒരു സ്ഥാനം സ്വന്തമാക്കാൻ ഐശ്വര്യക്ക് സാധിച്ചിട്ടുണ്ട്.

Also Read: മഞ്ജു വാര്യര്‍ കാരണം ഷൂട്ട് മുടങ്ങി, ലക്ഷങ്ങളുടെ നഷ്ടം; മരണം വരെ ദേഷ്യം മാറാതെ മുരളിയും!

2018 ൽ പുറത്തിറങ്ങിയ ഫന്നി ഖാൻ ആണ് ഐശ്വര്യയുടെ അവസാനം റിലീസ് ചെയ്ത സിനിമ. നാല് വർഷത്തെ ഇടവേളയ്ക്ക് ശേഷം മണിരത്നത്തിന്റെ പൊന്നിയിൻ സെൽവൻ എന്ന സിനിമയിലൂടെ തിരിച്ചു വരാനൊരുങ്ങുകയാണ് ഐശ്വര്യ. നന്ദിനി എന്ന രാഞ്ജിയുടെ വേഷത്തിലാണ് ഐശ്വര്യ സിനിമയിൽ എത്തുന്നത്. ഐശ്വര്യക്ക് പുറമെ ജയംരവി, കാർത്തി, തൃഷ, പ്രഭു, തുടങ്ങിയ വൻ താരനിര സിനിമയിൽ അണിനിരക്കുന്നുണ്ട്.