കയ്യിലുള്ളതെല്ലാം പോയി, ഉറക്കം നഷ്ടപ്പെട്ടു; രക്ഷയായത് ഷാരൂഖിന്റെ മൊഹബത്തേൻ: അമിതാഭ് ബച്ചൻ പറഞ്ഞത്

എന്നാൽ ഈ വിജയങ്ങൾക്ക് ഒക്കെ ഇടയിലും ഒരിക്കൽ അമിതാഭ് ബച്ചൻ കടുത്ത സാമ്പത്തിക പ്രതിസന്ധിയിൽ ആയിട്ടുണ്ട്. 2000 ലാണ് ബിഗ് ബിയ്ക്ക് അത്തരമൊരു അവസ്ഥ വന്ന് പാപ്പരാകുന്നത്. ഒടുവിൽ ഷാരൂഖ് ഖാനെ നായകനാക്കി യാഷ് ചോപ്ര ഒരുക്കിയ മൊഹബത്തേൻ ആയിരുന്നു താരത്തെ അതിൽ നിന്ന് രക്ഷിച്ചത്.

ബിഗ് ബിയുടെ കമ്പനിയായ അമിതാഭ് ബച്ചൻ കോർപ്പറേഷൻ ലിമിറ്റഡ് (എ ബി സി എൽ) വലിയ സാമ്പത്തിക പ്രതിസന്ധിയിൽ ആയതോടെയാണ് ഇതെല്ലാം ആരംഭിക്കുന്നത്. ബച്ചൻ തന്റെ സമ്പാദ്യം എല്ലാം കമ്പനിയിലേക്ക് നിക്ഷേപിക്കുകയും കമ്പനി തകരുകയും ചെയ്തു. 1999 ൽ ബച്ചന്റെ എ ബി സി എൽ, ഒരു തകർച്ച നേരിടുന്ന കമ്പനിയായി വിലയിരുത്താൻ ബി ഐ എഫ് ആർ (ബോർഡ് ഓഫ് ഇൻഡസ്ട്രിയൽ ആൻഡ് ഫിനാൻഷ്യൽ റീകൺസ്ട്രക്ഷൻ) നെ സമീപിച്ചു.

ഇതിനെ കുറിച്ച് ഒരിക്കൽ അമിതാഭ് ബച്ചൻ ഒരു ദേശീയ മാധ്യമത്തോട് സംസാരിക്കുകയുണ്ടായി. 'എന്റെ തലയ്ക്ക് മുകളിൽ ഒരു വാൾ തൂങ്ങിക്കിടക്കുന്ന പോലെ ആയിരുന്നു. ഉറക്കമില്ലാത്ത രാത്രികളായിരുന്നു എനിക്ക്. ഒരു ദിവസം ഞാൻ അതിരാവിലെ എഴുന്നേറ്റ് യാഷ് ചോപ്രജിയുടെ അടുത്തേക്ക് ചെന്നു. ഞാൻ പാപ്പരായെന്ന് തുറന്നു പറഞ്ഞു,'

'എനിക്ക് സിനിമകളൊന്നും ഇല്ല. എന്റെ വീടും ന്യൂഡൽഹിയിലെ ചെറിയ വസ്തുവും കണ്ടുകെട്ടി. യാഷ്ജി
എല്ലാം വളരെ കൂളായി കേട്ടു, എന്നിട്ട് അദ്ദേഹത്തിന്റെ മൊഹബത്തേൻ എന്ന സിനിമയിൽ എനിക്ക് ഒരു വേഷം വാഗ്ദാനം ചെയ്തു. പിന്നീട് ഞാൻ പരസ്യങ്ങളും ടെലിവിഷൻ ഷോകളും സിനിമകളും ചെയ്യാൻ തുടങ്ങി. ഏകദേശം 90 കോടി രൂപയുടെ കടമുണ്ടായിരുന്ന ഞാൻ അതെല്ലാം തിരിച്ചടച്ചു, എനിക്ക് ഒരു പുതിയ തുടക്കമുണ്ടായി,' ബച്ചൻ പറഞ്ഞു.

മറ്റൊരു അവസരത്തിലും തന്റെ സാമ്പത്തിക പ്രതിസന്ധിയെ കുറിച്ച് ബച്ചൻ പറഞ്ഞിട്ടുണ്ട്. കയ്യിൽ പണം ഇല്ലാഞ്ഞിട്ട് തങ്ങളുടെ ജോലിക്കാരിൽ നിന്ന് പണം വാങ്ങി വീട്ടിലേക്കുള്ള ഭക്ഷണവും മറ്റും വാങ്ങിയിരുന്നു എന്നാണ് താരം പറഞ്ഞത്. അഭിഷേക് ബച്ചനും ഇതിനെക്കുറിച്ച് സംസാരിച്ചിട്ടുണ്ട്. അച്ഛനെ സഹായിക്കാനായാണ് താൻ ബിരുദ പഠനം ഉപേക്ഷിച്ചതെന്നാണ് അഭിഷേക് പറഞ്ഞത്.

അതേസമയം ഏറെ സന്തോഷത്തോടെയാണ് ഇന്ന് ബച്ചനും കുടുംബവും കഴിയുന്നത്. കൈനിറയെ ചിത്രങ്ങളുമായി ബിഗ് ബിയും തിരക്കിലാണ്. വികാസ് ബഹിൽ സംവിധാനം ചെയ്യുന്ന ഗുഡ് ബൈ ആണ് അമിതാഭ് ബച്ചന്റെ ഏറ്റവും പുതിയ ചിത്രം. അമിതാഭ് ബച്ചൻ പ്രധാന കഥാപാത്രമാകുന്ന ചിത്രത്തിൽ രശ്‌മിക മന്ദാന, നേഹ ഗുപ്ത എന്നിവരാണ് മറ്റു കഥാപാത്രങ്ങളെ അവതരിപ്പിക്കുന്നത്. രശ്‌മികയുടെ ബോളിവുഡ് അരങ്ങേറ്റ ചിത്രമാണിത്.