ഡിന്നറിന്റെ ബില്ല് കൊടുക്കാന്‍ പോലും കാശില്ല; സിദ്ധാര്‍ത്ഥ് മല്യയുമായി പിരിഞ്ഞതിനെപ്പറ്റി ദീപിക

ഐപിഎല്‍ മത്സരത്തിനിടെ ഗ്യാലറിയില്‍ വച്ച് പരസ്യമായി തന്നെ സിദ്ധാര്‍ത്ഥ് ദീപികയെ ചുംബിച്ചതോടെയാണ് ഇരുവരും പ്രണയത്തിലാണെന്ന തരത്തിലുള്ള വാര്‍ത്തകള്‍ സജീവമായി മാറുന്നത്. എന്നാല്‍ അധികം വൈകാതെ ഈ പ്രണയ ബന്ധം അവസാനിക്കുകയായിരുന്നു. തങ്ങളുടെ പ്രണയത്തെക്കുറിച്ച് ദീപികയോ സിദ്ധാര്‍ത്ഥോ പരസ്യമായി പ്രതികരിച്ചിരുന്നില്ല. എന്നാല്‍ പ്രണയ തകര്‍ച്ചയെക്കുറിച്ച് ഇരുവരും സംസാരിച്ചിരുന്നു. വിശദമായി വായിക്കാം തുടര്‍ന്ന്.

ഐബിടിയ്ക്ക് നല്‍കിയ അഭിമുഖത്തിലാണ് ദീപിക മനസ് തുറന്നത്. താനും സിദ്ധാര്‍ത്ഥും ഒരുമിച്ച് ഡിന്നറിന് പോയപ്പോള്‍ സിദ്ധാര്‍ത്ഥ് തന്നോട് ബില്ല് കൊടുക്കാന്‍ പറഞ്ഞുവെന്നാണ് ദീപിക പറയുന്നത്. താരത്തിന്റെ വാക്കുകള്‍ വായിക്കാം.

''ഈ റിലേഷന്‍ഷിപ്പിനെ നല്ല നിലയില്‍ കൊണ്ടു പോകാന്‍ ഞാന്‍ പരാമവധി ശ്രമിച്ചിട്ടുണ്ട്. പക്ഷെ സമീപകാലത്തെ അവന്റെ പെരുമാറ്റം അറപ്പുളവാക്കുന്നതാണ്. അവസാനമായി ഞങ്ങള്‍ ഡിന്നര്‍ ഡേറ്റിന് പോയപ്പോള്‍ അവന്‍ എന്നോട് ബില്ല് കൊടുക്കാന്‍ പറഞ്ഞു. എന്നെ സംബന്ധിച്ച് അത് അപമാനിക്കപ്പെടുന്ന സംഭവമായിരുന്നു'' എന്നാണ് ദീപിക പറഞ്ഞത്. പിന്നീടൊരു അഭിമുഖത്തില്‍ സിദ്ധാര്‍ത്ഥും ദീപികയ്‌ക്കെതിരെ തുറന്നടിച്ചു.

''ദീപികയൊരു ഭ്രാന്തിയാണ്. അച്ഛന്‍ കടങ്ങളൊക്കെ തീര്‍ക്കുകയും സര്‍ക്കാര്‍ അദ്ദേഹത്തെ കുറ്റവിമുക്തനാക്കുകയും ചെയ്യുമ്പോള്‍ നിന്റെ പണം തിരികെ തരാം എന്ന് ഞാന്‍ പറഞ്ഞിരുന്നതാണ്. പക്ഷെ അവള്‍ കേള്‍ക്കാന്‍ തയ്യാറായിരുന്നില്ല. ഞാന്‍ അവള്‍ക്ക് വിലകൂടിയ ഡയമണ്ടുകളും ബാഗുകളും സമ്മാനിച്ചതും അവള്‍ മറന്നു. അവളുടെ വെക്കേഷനുകള്‍ക്കായി ഞാന്‍ ഒരുപാട് ചിലവിട്ടിട്ടുണ്ട്. അവള്‍ക്ക് വേണ്ടി അവളുടെ സുഹൃത്തുക്കള്‍ക്കായി പാര്‍ട്ടി നടത്തിയിട്ടുണ്ട്'' സിദ്ധാര്‍ത്ഥ് പറയുന്നു.

പിന്നാലെ തങ്ങള്‍ പിരിയാനുള്ള കാരണവും ദീപിക വെളിപ്പെടുത്തി. ''വളരെ ചീപ്പാണ്. മെഴ്‌സിഡസിന് പകരം ഓട്ടോയില്‍ യാത്ര ചെയ്യാമെന്നാണ് അവന്‍ ആദ്യം പറഞ്ഞത്. പിന്നെ ഞാനൊരു ഡ്രസ് ചോദിച്ചു. അവന്‍ എന്നെ ഒരു തെരുവിലെ വിറ്റൊഴിക്കല്‍ നടക്കുന്നിടത്ത് കൊണ്ടു പോയി. എന്നിട്ട് ഒരു ടോപ്പിന് വേണ്ടി വില പേശി. എനിക്ക് അപമാനിക്കപ്പെട്ടതായി തോന്നി. താജിലെ ഡിന്നറിന് ശേഷം ബില്ലടയ്ക്കാന്‍ പറഞ്ഞത് അവസാനത്തെ ആണിയായിരുന്നു'' എന്നാണ് ദീപിക പറയുന്നത്.

സിദ്ധാര്‍ത്ഥുമായുള്ള പ്രണയം ബന്ധം അവസാനിച്ച ശേഷമാണ് ദീപിക പദുക്കോണ്‍ രണ്‍ബീര്‍ കപൂറുമായി അടുപ്പത്തിലാകുന്നത്. എന്നാല്‍ വിവാഹത്തിന്റെ വക്കോളം എത്തിയ ശേഷം ഇരുവരും പിരിയുകയായിരുന്നു. പിന്നീടാണ് ദീപിക രണ്‍വീര്‍ സിംഗുമായി പ്രണയത്തിലാകുന്നത്. ഇരുവരും ഏറെ നാളത്തെ പ്രണയത്തിന് ശേഷം വിവാഹം കഴിക്കുകയായിരുന്നു. ഇന്ന് ഓണ്‍ സ്‌ക്രീനിലും ഓഫ് സ്‌ക്രീനിലും ആരാധകരുടെ പ്രിയപ്പെട്ട ജോഡിയാണ് രണ്‍വീറും ദീപികയും.

അതേസമയം ഗെഹരായിയാം ആണ് ദീപികയുടെ ഒടുവില്‍ പുറത്തിറങ്ങിയ സിനിമ. ആമസോണ്‍ പ്രൈമിലൂടെ റിലീസ് ചെയ്ത ചിത്രത്തിലെ ദീപികയുടെ പ്രകടനം കയ്യടി നേടിയിരുന്നു. പഠാന്‍ ആണ് ദീപികയുടെ പുതിയ സിനിമ. ഏറെ നാളുകള്‍ക്ക് ശേഷമാണ് ദീപികയും ഷാരൂഖ് ഖാനും ഒരുമിക്കുന്നത്. പിന്നാലെ ഹൃത്വിക് റോഷനൊപ്പം അഭിനയിക്കുന്ന ഫൈറ്ററും അണിയറയിലുണ്ട്. ഇരുവരും ഇതാദ്യമായാണ് ഒരുമിച്ച് അഭിനയിക്കുന്നത്. പ്രഭാസിനൊപ്പം അഭിനയിക്കുന്ന പ്രൊജക്ട് കെയും ദീപികയുടേതായി അണിയറയിലുണ്ട്.