മദ്യപിച്ച് ലക്കുകെട്ട് ഷാരൂഖിന്റെ വീട്ടിലേക്ക് കയറി ചെന്നു; പിന്നെ സംഭവിച്ചത് പറഞ്ഞ് കപില്‍ ശര്‍മ

മദ്യപിച്ച അവസ്ഥയിലായിരുന്നു കപില്‍ ഷാരൂഖിന്റെ വീട്ടിലേക്ക് ചെന്നത്. തന്റെ കസിന് വേണ്ടിയായിരുന്നു കപില്‍ അങ്ങനെ ചെയ്തത്. ''ലണ്ടനില്‍ നിന്നും എന്റെ ഒരു കസിന്‍ വന്നിരുന്നു. ഞാന്‍ കുറച്ച് മദ്യപിച്ചിരുന്നു. അവള്‍ പറഞ്ഞു അവള്‍ക്ക് ഷാരൂഖ് ഖാന്റെ വീട് മന്നത്ത് കാണണമെന്ന്. അതിനെന്താ പ്രശ്‌നം ഞാന്‍ കാണിച്ചു താരമല്ലോ എന്ന് പറഞ്ഞു കൊണ്ട് ഞാന്‍ അവളേയും കൂട്ടി ഷാരൂഖ് ഖാന്റെ വീട്ടിലേക്ക് ചെന്നു. ആ സമയത്ത് ഷാരൂഖ് ഖാന്റെ വീട്ടിലൊരു സിനിമ പാര്‍ട്ടി നടക്കുന്നുണ്ടായിരുന്നു. ഞാന്‍ ഗേറ്റിലെ സെക്യൂരിറ്റി ഓഫീസറോട് ഗേറ്റ് തുറക്കാന്‍ ആവശ്യപ്പെട്ടു. പ്രശസ്തി ഉപയോഗിക്കുകയായിരുന്നു ഞാന്‍. എന്നെ കണ്ടപ്പോള്‍ അവര്‍ ഗേറ്റ് തുറന്നു തരികയായിരുന്നു. ഞങ്ങളെ ക്ഷണിച്ചിട്ടുണ്ടെന്നായിരുന്നു അവര്‍ കരുതിയത്'' എന്നായിരുന്നു കപില്‍ പറഞ്ഞത്.

''അകത്തേക്ക് ചെന്നതും എനിക്ക് മനസിലായി ഞാന്‍ ചെയ്തത് തെറ്റാണെന്ന്. കാറില്‍ നിന്നും ഇറങ്ങിയെങ്കിലും ഞാന്‍ തിരിച്ചു പോകാന്‍ തീരുമാനിച്ചു. പോകാന്‍ നോക്കുമ്പോഴേക്കും ഷാരൂഖ് ഖാന്റെ മാനേജര്‍ വരികയായിരുന്നു. നിങ്ങളാണോ, അകത്തേക്ക് വരൂ, ഷാരൂഖ് ഖാന്‍ അകത്തുണ്ടെന്ന് അദ്ദേഹം പറഞ്ഞു. രാവിലെ മൂന്ന് മണിയാണ് സമയം. ഞാന്‍ ഷോര്‍ട്ട്‌സ് ആയിരുന്നു ധരിച്ചിരുന്നത്. പാന്‍ ചവച്ച്, മദ്യ ലഹരിയിലായിരുന്നു ഞാന്‍. വാതില്‍ തുറന്നപ്പോള്‍ ഗൗരി ഖാനെ കണ്ടു. ഷാരൂഖ് ഖാന്‍ ആകും എന്നെ ക്ഷണിച്ചതെന്നായിരുന്നു അവര്‍ കരുതിയത്. ഷാരൂഖ് അകത്തുണ്ടെന്ന് അവര്‍ പറഞ്ഞു'' കപില്‍ പറയുന്നു.

Recommended Video

ബോളിവുഡ് താര ദമ്പതികളും, പ്രണയ കഥയും | FilmiBeat Malayalam

എങ്ങനെയാണ് ഷാരൂഖ് ഖാന്‍ പ്രതികരിച്ചതെന്നും കപില്‍ ശര്‍മ പറയുന്നുണ്ട്. ''അദ്ദേഹം വീട്ടിലും എസ്ആര്‍കെയാണ്. സിനിമയിലേത് പോലെ തന്നെ ഡാന്‍സ് കളിക്കുകയായിരുന്നു. ഞാന്‍ ആകെ അമ്പരന്നു പോയി. ഞാന്‍ അകത്തേക്ക് ചെന്ന് മാപ്പ് പറഞ്ഞു. പാര്‍ട്ടി ഏതാണ്ട് തീര്‍ന്നിരുന്നു. കുറച്ച് പേര്‍ ഒഴികെ ബാക്കിയെല്ലാവരും പോയിരുന്നു. സോറി, എന്റെ കസിന് നിങ്ങളുടെ വീട് കാണണമെന്ന് പറഞ്ഞതു കൊണ്ട് വന്നതാണെന്ന് പറഞ്ഞു. തുറന്നു തന്നത് കൊണ്ട് കേറി പോന്നതാണെന്ന് പറഞ്ഞപ്പോള്‍ എന്റെ ബെഡ് റൂമിന്റെ വാതില്‍ തുറന്ന് കിടക്കുന്നത് കണ്ടാലും നീ കേറി വരുമോ എന്നായിരുന്നു അദ്ദേഹം ചോദിച്ചത്. ഞാന്‍ ക്ഷണിക്കാതെ വന്നതായിരുന്നുവെങ്കിലും ഏറ്റവും കൂടുതല്‍ നേരം അവിടെ നിന്നതും ഞാനായിരുന്നു'' എന്നാണ് കപില്‍ കൂട്ടിച്ചേര്‍ക്കുന്നത്. ഷാരൂഖ് ഖാന്‍ തന്നെയും കസിനേയും വേണ്ട രീതിയില്‍ സത്ക്കരിച്ചുവെന്നും കപില്‍ പറയുന്നു.