നടിയാകാനുള്ളതൊന്നും നിനക്കില്ലെന്ന് പറഞ്ഞ് പുറത്താക്കി, ഞാനന്ന് ഒരുപാട് കരഞ്ഞു: കത്രീന കൈഫ്

ഇപ്പോഴിതാ തന്റെ കരിയറിന്റെ തുടക്കകാലത്ത് നേരിട്ട അവഗണനകളെക്കുറിച്ച് മനസ് തുറക്കുകയാണ് കത്രീന കൈഫ്. അഭിനയിച്ചു തുടങ്ങിയതിന് ശേഷം തന്നെ സിനിമയില്‍ നിന്നും പുറത്താക്കിയ സംഭവമാണ് കത്രീന കൈഫ് വെളിപ്പെടുത്തുന്നത്. ബോളിവുഡ് ബബിളിന് നല്‍കിയ അഭിമുഖത്തിലാണ് കത്രീന കൈഫ് മനസ് തുറക്കുന്നത്. താരത്തിന്റെ വാക്കുകള്‍ വിശദമായി വായിക്കാം തുടര്‍ന്ന്.

സായ എന്ന ചിത്രത്തില്‍ അഭിനയിച്ച അനുഭവമാണ് കത്രീന പങ്കുവെക്കുന്നത്. ജോണ്‍ എബ്രഹാമായിരുന്നു ചിത്രത്തിലെ നായകന്‍. കത്രീനയ്ക്ക് പകരം പിന്നീട് താര ശര്‍മ ചിത്രത്തിലെ നായികയായി എത്തുകയായിരുന്നു. അനുരാഗ് ബസുവായിരുന്നു സിനിമയുടെ സംവിധാനം. ഒരു ഷോട്ട് മാത്രം ചിത്രീകരിച്ച ശേഷമാണ് തന്നെ സിനിമയില്‍ നിന്നും പുറത്താക്കുന്നതെന്നും ഇതോടെ തന്റെ ജീവിതം തന്നെ അവസാനിച്ചതായി തോന്നിയെന്നുമാണ് കത്രീന പറയുന്നത്.

തന്റെ പുതിയ സിനിമയായ ഫോണ്‍ ഭൂതിന്റെ പ്രൊമോഷന്റെ ഭാഗമായി സംസാരിക്കുകയായിരുന്നു കത്രീന. അഭിനേതാവ് എന്ന നിലയില്‍ പലപ്പോഴും അവഗണനയും വിമര്‍ശനങ്ങളും നേരിടേണ്ടി വരും. എന്നാല്‍ അതിലൊന്നും തളരാതിരിക്കാനുള്ള കരുത്ത് നേടിയെടുക്കണമെന്നുമാണ് കത്രീന പറഞ്ഞത്. തനിക്കൊരിക്കലും ഒരു നടിയാകാന്‍ സാധിക്കില്ലെന്നായിരുന്നു അന്ന് പറഞ്ഞതെന്നും കത്രീന ഓര്‍ക്കുന്നുണ്ട്.

''ഞാന്‍ തുടങ്ങിയ സമയത്ത് എന്റെ മുഖത്ത് നോക്കി നീ നടിയാകില്ലെന്ന് പറഞ്ഞിട്ടുണ്ട്. നിനക്ക് നല്ലതൊന്നുമില്ലെന്ന് നേരെ പറഞ്ഞു. ഞാനന്ന് ഒരുപാട് കരഞ്ഞു. കരയുന്നത് സഹായിക്കും. പക്ഷെ പിന്നീട് നമ്മള്‍ക്കുള്ള ആഗ്രഹത്തില്‍ ഉറച്ചു നില്‍ക്കണം. കഠിനാധ്വാനം ചെയ്യണം, കരുത്തയാകണം'' എന്നാണ് കത്രീന പറയുന്നത്. ആ സിനിമ നഷ്ടമായെങ്കിലും കത്രീന പിന്നീട് ശക്തമായി തന്നെ ബോളിവുഡിലെ മുന്‍നിരയിലേക്ക് എത്തുകയായിരുന്നു.

ബൂം ആയിരുന്നു കത്രീനയുടെ ആദ്യ സിനിമ. പക്ഷെ ഈ ചിത്രം വന്‍ പരാജയം ഏറ്റുവാങ്ങി. നമസ്‌തെ ലണ്ടന്‍ ആണ് കത്രീനയ്ക്ക് ആദ്യത്തെ വിജയം സമ്മാനിക്കുന്നത്.ചിത്രം വന്‍ വിജമായി മാറിയതിനൊപ്പം കത്രീനയും താരമായി മാറി. ഇന്ന് ബോളിവുഡിലെ ഏറ്റവും തിരക്കുള്ള നായികയാണ് കത്രീന കൈഫ്. താരത്തിന്റെ പുതിയ സിനിമയായ ഫോണ്‍ ഭൂത് റിലീസിന് തയ്യാറെടുക്കുകയാണ്. ഇഷാന്‍ ഖട്ടര്‍, സിദ്ധാന്ത് ചതുര്‍വേദി എന്നിവരാണ് ചിത്രത്തിലെ മറ്റ് പ്രധാന താരങ്ങള്‍.

പിന്നാലെ സല്‍മാന്‍ ഖാനൊപ്പം ടൈഗര്‍ പരമ്പരയിലെ മൂന്നാമത്തെ ചിത്രത്തിലും കത്രീന എത്തുന്നത്. ചിത്രത്തിന്റെ ചിത്രീകരണം പൂര്‍ത്തിയായിരുന്നു. പരമ്പരയിലെ ആദ്യ രണ്ട് സിനിമകളും വന്‍ വിജയങ്ങളായി മാറിയിരുന്നു. അതേസമയം ഈയ്യടുത്തായിരുന്നു കത്രീനയുടെ വിവാഹം. നടന്‍ വിക്കി കൗശലിനെയാണ് കത്രീന വിവാഹം കഴിച്ചത്. ഏറെ നാളത്തെ പ്രണയത്തിന് ശേഷമാണ് ഇരുവരും വിവാഹം കഴിക്കുന്നത്.