എല്ലാം ഓക്കെയായിരുന്നു, പക്ഷെ കല്യാണം നടന്നില്ല; ഇന്നും വിവാഹം കഴിക്കാതെ ബന്‍സാലിയും വൈഭവിയും!

ബന്‍സാലി സിനിമകളിലെ പ്രണയത്തിന്റെ തീവ്രത എന്നും ചര്‍ച്ചയാകാറുള്ളതാണ്. പ്രണയ രംഗങ്ങള്‍ അത്രമേല്‍ തീവ്രവും മനോഹരവുമായി ഒരുക്കുന്ന സംവിധായകനാണ് ബന്‍സാലി. ഏറ്റവും പുതിയ സിനിമയായ ഗംഗുബായിയിലും തീവ്രവമായ പ്രണയ രംഗങ്ങളുണ്ട്. ആലിയ ഭട്ട് നായികയായി എത്തുന്ന ചിത്രം പറയുന്നത് കാമാത്തിപുരയിലെ ഗംഗുബായ് കട്ടിയവാഡിയുടെ കഥയാണ്. മാഫിയ ക്യൂന്‍സ് ഓഫ് മുംബൈ ന്നെ പുസ്തകത്തെ ആധാരമാക്കിയാണ് ബന്‍സാലി സിനിമയൊരുക്കിയിരിക്കുന്നത്. പ്രണയത്തെക്കുറിച്ച് സിനിമയൊരുക്കുന്ന ബന്‍സാലിയുടെ പ്രണയവും ഒരുകാലത്ത് വലിയ ചര്‍ച്ചാ വിഷയമായിരുന്നു.

ബോളിവുഡിലെ മുന്‍നിര കൊറിയോഗ്രാഫറായ വൈഭവി മര്‍ച്ചന്റും ബന്‍സാലിയും തമ്മിലുള്ള പ്രണയം ഒരു സിനിമാക്കഥ പോലെ തന്നെ മനോഹരമാണ്്. ഇരുവരും പരിചയപ്പെടുന്നത് ബന്‍സാലിയുടെ ഹം ദില്‍ ദേ ചുക്കേ സനം എന്ന ചിത്രത്തിന്റെ ലൊക്കേഷനില്‍ വച്ചായിരുന്നു.പിന്നീട് സാവരിയ്യ എന്ന 2007 ല്‍ പുറത്തിറങ്ങിയ ചിത്രത്തിന്റെ ചിത്രീകരണത്തിനിടെ ഇരുവരും തമ്മിലുള്ള സൗഹൃദം പ്രണയമായി മാറുകയായിരുന്നു. സിനിമയുടെ പ്രീമിയറിനടക്കം പല വേദികളിലും ഇരുവരും ഒരുമിച്ചായിരുന്നു എത്തിയിരുന്നത്. അതുകൊണ്ട് തന്നെ അധികം വൈകാതെ ഇരുവരുടേയും പ്രണയം വാര്‍ത്തകളില്‍ നിറഞ്ഞു. ബന്‍സാലിയും വൈഭവിയും വിവാഹം കഴിക്കാന്‍ തീരുമാനിച്ചതായും വാര്‍ത്തകള്‍ സജീവമായി മാറാന്‍ അധികം സമയം വേണ്ടി വന്നില്ല.

വിവാഹത്തെക്കുറിച്ച് താരങ്ങളുടെ കുടുംബങ്ങളും തുറന്ന് പറയാന്‍ ആരംഭിച്ചിരുന്നു. 2008 മാര്‍ച്ചിലായിരുന്നു വൈഭവിയും ബന്‍സാലിയും വിവാഹം കഴിക്കാന്‍ തീരുമാനിച്ചിരുന്നത്. ഇതിനുള്ള തയ്യാറെടുപ്പുകളും ആരംഭിച്ചിരുന്നു. വിവാഹത്തിന് മുന്നോടിയായി ഇരുവരും തമ്മിലുള്ള വിവാഹ നിശ്ചയവും നടന്നു. വിവാഹത്തിനായി ആരാധകരും കാത്തിരിക്കുകയായിരുന്നു. എന്നാല്‍ എല്ലാവരേയും അമ്പരപ്പിച്ചു കൊണ്ട് വിവാഹത്തിന് മുമ്പ് തന്നെ പിരിയാന്‍ തീരുമാനിക്കുകയായിരുന്നു വൈഭവിയും ബന്‍സാലിയും. പിരിഞ്ഞുവെങ്കിലും ഇന്നും നല്ല സുഹൃത്തുക്കളാണ് വൈഭവിയും ബന്‍സാലിയും. പരസ്യമായി തന്നെ പരസ്പരമുള്ള ആദരവും സ്‌നേഹവും ഇരുവരും തുറന്ന് പറയാറുണ്ട്.

അതേസമയം രണ്ടു പേരും ഇതുവരേയും വിവാഹം കഴിച്ചിട്ടില്ല. തങ്ങളുടെ പ്രണയ തകര്‍ച്ചയ്ക്ക് ശേഷം മറ്റൊരുളുമായി പ്രണയത്തിലാകാന്‍ വൈഭവിയും ബന്‍സാലിയും കൂട്ടാക്കിയിട്ടില്ല. തങ്ങള്‍ക്ക് പരസ്പരം ഇഷ്ടമായിരുന്നു. അടുത്ത് അറിയണമെന്ന് തോന്നി. എന്നാല്‍ അടുത്തറിഞ്ഞപ്പോഴാണ് ജീവിത പങ്കാളിയാകാന്‍ സാധിക്കില്ലെന്നും തങ്ങള്‍ക്ക് നല്ല സുഹൃത്തുക്കളായി തുടരാനേ സാധിക്കുകയുള്ളൂവെന്ന് തിരിച്ചറിഞ്ഞുവെന്നായിരുന്നു പ്രണയ തകര്‍ച്ചയെക്കുറിച്ച് വൈഭവി പിന്നീട് പറഞ്ഞത്. ദേശീയ പുരസ്‌കാരം അടക്കം നേടിയിട്ടുള്ള ബോളിവുഡിലെ മുന്‍നിര കൊറിയോഗ്രാഫറാണ് വൈഭവി മര്‍ച്ചന്റ്. മലയാളത്തില്‍ സ്‌നേഹപൂര്‍വ്വം അന്ന എന്ന ചിത്രത്തില്‍ അഭിനയിക്കുകയും ചെയ്തിട്ടുണ്ട് വൈഭവി.