അര്‍ജുനെ കല്യാണം കഴിക്കുമോ? ഇനിയും കുട്ടികള്‍ വേണോ? എല്ലാം തുറന്ന് പറഞ്ഞ് മലൈക അറോറ

ഭാവി എന്താണ് തനിക്കായി ഒരുക്കി വച്ചിരിക്കുന്നതെന്ന് അറിയില്ലെന്നാണ് മലൈക പറയുന്നത്. അതേസമയം ഭാവിയെക്കുറിച്ച് തങ്ങള്‍ ചര്‍ച്ച ചെയ്യാറുണ്ടെന്നും മലൈക പറയുന്നു. ''എന്താണ് ഭാവി എനിക്കായി കാത്തുവച്ചതെന്ന് അറിയില്ല. ഇതേക്കുറിച്ച് ഞങ്ങള്‍ ചര്‍ച്ച ചെയ്യാറുണ്ട്. പങ്കാളിയുമായി ഇത്തരം കാര്യങ്ങള്‍ സംസാരിക്കും. ഇന്ന് എന്റെ ജീവിതത്തിലുള്ള പുരുഷന്‍ എന്നെ സന്തോഷിപ്പിക്കുന്നുണ്ട്. അതേക്കുറിച്ച് ലോകം എന്താണ് ചിന്തിക്കുന്നതെന്ന് എന്റെ വിഷയമല്ല'' എന്നാണ് മലൈക പറയുന്നത്.

അര്‍ജുനുമായുള്ള മലൈകയുടെ പ്രായ വ്യത്യാസം എന്നും സോഷ്യല്‍ മീഡിയയിലെ പരിഹാസങ്ങള്‍ക്ക് കാരണമാകാറുണ്ട്. ഇരുവരും പ്രണയം തുടങ്ങിയ നാള്‍ മുതല്‍ ഇന്നുവരെ ഇതിന്റെ പേരില്‍ അപമാനിക്കലുകള്‍ നേരിട്ടുണ്ട് മലൈക. എന്നാല്‍ വിമര്‍ശനങ്ങളെ അതിജീവിച്ച് ഒരുമിച്ച് മുന്നോട്ട് പോവുകയാണ് മലൈകയും അര്‍ജുനും. ഇനിയൊരു വിവാഹത്തെക്കുറിച്ച് ചിന്തിക്കാന്‍ തനിക്ക് ഭയമില്ലെന്നും മലൈക പറയുന്നുണ്ട്. ഒരു വിവാഹ മോചനം സംഭവിച്ചെന്ന് കരുതി തനിക്ക് ഭയമില്ലെന്നാണ് മലൈക പറയുന്നത്.

''എനിക്കൊട്ടും ഭയം തോന്നുന്നില്ല, ഞാനൊരു വിവാഹ മോചനത്തിലൂടെ കടന്നു പോന്നുവെന്ന് കരുതി. നല്ലൊരു വ്യക്തിയുമായാണ് ഞാന്‍ റിലേഷന്‍ഷിപ്പിലുള്ളത്. ജീവിതത്തില്‍ ഞാനെടുത്ത തീരുമാനങ്ങളും തിരഞ്ഞെടുപ്പുകളും എന്നും സന്തോഷത്തിന് വേണ്ടിയുള്ളതായിരുന്നു. എന്റെ ജീവിതത്തില്‍ ഇപ്പോഴുള്ള വ്യക്തി എന്നെ സന്തോഷപ്പിക്കുന്നുണ്ട്'' എന്നാണ് മലൈക പറഞ്ഞത്.

''ഞാന്‍ ഭയങ്കര റൊമാന്റിക് ആണ്. എന്റെ പങ്കാളിയെ സന്തോഷിപ്പിക്കാന്‍ സാധിക്കുന്ന, രണ്ടുപേര്‍ക്കും സന്തോഷം കിട്ടുന്നൊരു ബന്ധം മാത്രമായിരുന്നു എനിക്ക് വേണ്ടിയിരുന്നത്. ഒരുമിച്ച് വളരുകയും ജീവിതം ആസ്വദിക്കുകയും ചെയ്യണം. അവന്‍ എന്റെ സുഹൃത്താണ്. എന്റെ ഏറ്റവും വലിയ വിമര്‍ശകനും. എന്റെ പങ്കാളി'' എന്നാണ് അര്‍ജുനെക്കുറിച്ച് മലൈക പറയുന്നത്. തങ്ങള്‍ക്കെതിരെയുളള വിമര്‍ശനങ്ങളെ നേരിടുന്നതിനെക്കുറിച്ചും മലൈക മനസ് തുറക്കുന്നുണ്ട്.

''എളുപ്പമായിരുന്നില്ല. ദിവസവും നേരിടുന്നുണ്ട്. പ്രായമുള്ള സ്ത്രീയെക്കുറിച്ചുള്ള പണ്ടേയുള്ള ചിന്തയാണ്. അതേസമയം ഒരു പുരുഷന്‍ 20 വയസുള്ളതോ 30 വയസുള്ളതോ ആയ സ്ത്രീയെ പ്രണയിച്ചാല്‍ അവന് കയ്യടിക്കും. അവനെ രാജാവിനെ പോലെ ആഘോഷിക്കും. എന്റെ പ്രിയപ്പെട്ടവരില്‍ നിന്നും സുഹൃത്തുക്കളില്‍ നിന്നു പോലും മോശം അനുഭവമുണ്ടായിട്ടുണ്ട്. പുറമെയുള്ളവര്‍ പോട്ടെ. അവര്‍ക്ക് പുറത്തു നിന്നുമുള്ള കാഴ്ചയല്ലേ ലഭിക്കുകയുള്ളൂ'' എന്നാണ് മലൈക പറയുന്നത്.

1998 ലായിരുന്നു മലൈകയുടെയും അര്‍ബാസിന്റേയും വിവാഹം. നീണ്ട നാളത്തെ ദാമ്പത്യ ജീവിതത്തിന് ശേഷം 2017 ല്‍ ഇരുവരും പിരിയുകയായിരുന്നു. അര്‍ഹാന്‍ ആണ് ഇവരുടെ മകന്‍. അതേസമയം, പിരിഞ്ഞ ശേഷവും സുഹൃത്തുക്കളാണ് അര്‍ബാസും മലൈകയും. മകന്റെ ഉത്തരവാദിത്തം ഇരുവരും ചേര്‍ന്ന് പങ്കിടുകയാണ്. പിന്നീടാണ് മലൈക അര്‍ജുന്‍ കപൂറുമായി പ്രണയത്തിലാകുന്നത്. ഇരുവരും ആരാധകരുടെ പ്രിയപ്പെട്ട ജോഡിയാണ്. ഈയ്യടുത്ത് മലൈക ഗര്‍ഭിണിയാണെന്ന തരത്തില്‍ വ്യാജ വാര്‍ത്തകള്‍ പ്രചരിച്ചിരുന്നു. ഇതിനെതിരെ അര്‍ജുന്‍ രംഗത്തെത്തുകയായിരുന്നു.

മലൈക തന്റെ ഡാന്‍സിലൂടെയാണ് ബോളിവുഡിലെ താരമാകുന്നത്. ചയ്യ ചയ്യ, മുന്നി ബദ്‌നാം, അനാര്‍ക്കലി ഡിസ്‌കോ ചലി തുടങ്ങിയ ഹിറ്റ് പാട്ടുകള്‍ക്ക് മലൈക ചുവടുവച്ചിട്ടുണ്ട്. നിരവധി ഡാന്‍സ് റിയാലിറ്റി ഷോ വിധി കര്‍ത്താവായു മലൈക കയ്യടി നേടിയിട്ടുണ്ട്. ആയുഷ്മാന്‍ ഖുറാന നായകനായ ആന്‍ ആക്ഷന്‍ ഹീറോയിലാണ് മലൈക ഒടുവിലായി അഭിനയിച്ചത്. ഇപ്പോഴിതാ സ്വന്തമായൊരു റിയാലിറ്റി ഷോയുമായി എത്തിയിരിക്കുകായണ് മലൈക. മൂവിംഗ് ഇന്‍ വിത്ത് മലൈക എന്ന ഷോ സംപ്രേക്ഷണം ചെയ്യുന്നത് ഡിസ്‌നി പ്ലസ് ഹോട്ട്‌സ്റ്റാറിലാണ്.