മനീഷ കൊയ്‌രാളയോട് മണിരത്‌നത്തിന്റെ ബോംബെയിൽ അഭിനയിക്കരുതെന്ന് പറഞ്ഞത് നിരവധി പേർ; കാരണമിതാണ്

Updated: Tuesday, August 16, 2022, 13:07 [IST]

ബോളിവുഡിലെ എക്കാലത്തേയും ജനപ്രീയ നായികമാരില്‍ ഒരാളാണ് മനീഷ കൊയ്‌രാള. തൊണ്ണൂറുകളിലെ ഏറ്റവും തിരക്കേറിയ നായികമാരില്‍ ഒരാളായിരുന്നു അവർ. പല പ്രമുഖ താരങ്ങളുടെയും നായികയായി ശക്തമായ പല സ്ത്രീകഥാപാത്രങ്ങളെയും നടി അവതരിപ്പിച്ചിട്ടുണ്ട്. അര്‍ബുദ ബാധിതയായതിനെ തുടർന്ന് ചികിത്സയിലായിരുന്ന നടി ഇന്ന് അതിനെയെല്ലാം അതിജീവിച്ച് സന്തോഷത്തോടെ കഴിയുകയാണ്.

തൊണ്ണൂറുകളിൽ ഖാമോഷി, ദില്‍ സെ തുടങ്ങി ബോളിവുഡിലെ ഒരുപാട് ഹിറ്റു ചിത്രങ്ങളുടെ ഭാഗമായിട്ടുള്ള നടി തെന്നിന്ത്യന്‍ സിനിമകളിലും സാന്നിധ്യം അറിയിച്ചിട്ടുണ്ട്. തമിഴ്, തെലുങ്ക്, മലയാളം ചിത്രങ്ങളിൽ അഭിനയിച്ചിട്ടുള്ള മനീഷയുടെ ഏറ്റവും വലിയ ഹിറ്റ് ചിത്രങ്ങളിൽ ഒന്നാണ് മണി രത്‌നം സംവിധാനം ചെയ്ത ബോംബെ. മനീഷയുടെ എക്കാലത്തെയും മികച്ച പ്രകടനങ്ങളിൽ ഒന്നായാണ് അതിലെ കഥാപാത്രത്തിനെ വിലയിരുത്തുന്നത്.

എന്നാൽ അന്ന് ആ കഥാപത്രം ചെയ്യരുതെന്ന് ഒരുപാട് പേർ തന്നോട് പറഞ്ഞിരുന്നെന്ന് മനീഷ പിന്നീട് വെളിപ്പെടുത്തിയിട്ടുണ്ട്. ബോളിവുഡിൽ കത്തി നിൽക്കുന്ന സമയത്ത് അങ്ങനെയൊരു വേഷം ചെയ്യരുതെന്നാണ് തനിക്ക് കിട്ടിയ നിർദേശമെന്നാണ് നടി പറഞ്ഞത്. ചിത്രത്തിൽ അമ്മ വേഷമായിരുന്നു നടിയ്ക്ക്.

"എനിക്ക് ബോംബെ സിനിമയിൽ അവസരം വന്നപ്പോൾ, ആളുകൾ അത് ചെയ്യരുതെന്ന് എന്നോട് പറഞ്ഞു, എന്റെ 20-കളിൽ ഞാൻ അമ്മയുടെ വേഷം ചെയ്താൽ അടുത്ത 10 വർഷത്തിനുള്ളിൽ തനിക്ക് മുത്തശ്ശി വേഷങ്ങളാകും ലഭിക്കുക എന്ന് അവർ കരുതി. എന്നാൽ മണിരത്‌നം സിനിമ നിരസിക്കുന്നത് വിഡ്ഢിത്തമാണെന്ന് മറ്റു ചിലർ എന്നോട് പറഞ്ഞത് ഞാൻ ശ്രദ്ധിച്ചു."2018 ൽ വാർത്ത ഏജൻസിയായ പിടിഐയോട് മനീഷ പറഞ്ഞു.

മണിരത്‌നം സംവിധാനം ചെയ്ത ചിത്രത്തിൽ അരവിന്ദ് സ്വാമിയ്‌ക്കൊപ്പമാണ് മനീഷ അഭിനയിച്ചത്. ബോംബെയിലെ മിശ്രവിവാഹിതരായ ദമ്പതികളെയും ബാബറി മസ്ജിദ് തകർച്ചയ്ക്ക് ശേഷമുള്ള ബോംബെ കലാപത്തിന് മുമ്പും ശേഷവുമുള്ള അവരുടെ പോരാട്ടങ്ങളെയും അടിസ്ഥാനമാക്കിയാണ് ചിത്രം ഒരുക്കിയത്. അനിൽ കപൂർ നായകനായ മനീഷയുടെ മറ്റൊരു ഹിറ്റ് ചിത്രമായ 1942: എ ലവ് സ്റ്റോറി കഴിഞ്ഞ് ഒരു വർഷത്തിന് ശേഷമാണ് ബോംബെ പുറത്തിറങ്ങിയത്.

അർബുദത്തെ തോൽപിച്ച് സിനിമയിലേക്ക് തിരികെ വന്ന മനീഷ കൊയ്‍രാള അവസാനമായി അഭിനയിച്ചത് സഞ്ജയ് ദത്തിന്റെ ജീവിതകഥ പറയുന്ന സഞ്ജുവിലാണ്. ചിത്രത്തിൽ രൺബീർ കപൂറിന്റെ അമ്മയുടെ വേഷമാണ് മനീഷ അവതരിപ്പിച്ചത്. ഇതുകൂടാതെ, നെറ്റ്ഫ്ലിക്സ് ചിത്രമായ മാസ്കയിലും മനീഷ അഭിനയിച്ചിരുന്നു. നീരജ് ഉദ്‌വാനി സംവിധാനം ചെയ്ത ഈ ചിത്രത്തിൽ ജാവേദ് ജാഫ്രി, നികിത ദത്ത, പ്രീത് കമാനി, ഷെർലി സെറ്റിയ എന്നിവരായിരുന്നു മറ്റു അഭിനേതാക്കൾ. റിപ്പോർട്ടുകൾ പ്രകാരം, കാർത്തിക് ആര്യന്റെ വരാനിരിക്കുന്ന ചിത്രമായ ഷെഹ്‌സാദയിലും മനീഷ കൊയ്‌രാള എത്തുമെന്നാണ് റിപ്പോർട്ട്.

Recommended Video