ഊർമ്മിള മതോന്ദ്‌കറുടെ സൗന്ദര്യത്തിൽ മയങ്ങിപ്പോയ രാം ഗോപാൽ വർമ്മ; സംവിധായകൻ തുറന്നു പറഞ്ഞപ്പോൾ

രാം ഗോപാൽ വർമ്മയുടെ രംഗീല എന്ന ചിത്രത്തിലൂടെ ഒറ്റരാത്രികൊണ്ട് സെൻസേഷനായി മാറിയ താരമാണ് ഊർമ്മിള മതോന്ദ്‌കർ. ചിത്രത്തിന്റെ റിലീസിന് ശേഷം 90 കളിലെ സെക്‌സ് സൈറൺ എന്നായിരുന്നു ഊർമ്മിള വിശേഷിപ്പിക്കപ്പെട്ടിരുന്നത്. ചിത്രത്തിലെ രംഗീലാ റേ എന്ന ഗാനവും അതിലെ ഊർമ്മിളയുടെ നൃത്തച്ചുവടുകളും ഏറെ ശ്രദ്ധിക്കപ്പെട്ടിരുന്നു. ഊർമ്മിളയുടെ സ്റ്റൈൽ സ്റ്റേറ്റ്‌മെന്റായിരുന്നു അന്ന് ഏറ്റവും കൂടുതൽ ചർച്ച ചെയ്യപ്പെട്ട വിഷയം.

അതിനോടൊപ്പം ഗോസിപ് കോളങ്ങളിലും ഊർമ്മിളയുടെ പേര് ഇടംപിടിച്ചിരുന്നു. സംവിധായകൻ രാം ഗോപാൽ വർമയുമായുള്ള ബന്ധമാണ് വാർത്തകളിൽ നിറഞ്ഞത്. വർഷങ്ങൾക്ക് ശേഷം ഊർമ്മിളയെ കുറിച്ച് ആർജിവി ഒരു ബ്ലോഗ് എഴുതുകയും ചെയ്തു. താൻ നടിയുടെ കാര്യത്തിൽ സ്വാർത്ഥനായിരുന്നുവെന്നും അവളുടെ സൗന്ദര്യത്തിൽ താൻ മയങ്ങിപോയെന്നുമായിരുന്നു അദ്ദേഹത്തിന്റെ കുറിപ്പ്. വിശദമായി വായിക്കാം തുടർന്ന്.

'സിനിമയിൽ വന്നതിന് ശേഷം എന്നെ സ്വാധീനിച്ച ആദ്യ പെൺകുട്ടി ഊർമിള മതോന്ദ്‌കറാണ്. അവളുടെ സൗന്ദര്യത്തിൽ ഞാൻ മതിമറന്നു - അവളുടെ മുഖം മുതൽ അവളുടെ രൂപം വരെ... അവളെക്കുറിച്ചുള്ള എല്ലാം ദൈവികമായിരുന്നു. രംഗീലയ്ക്ക് മുമ്പ് അവൾ കുറച്ച് സിനിമകൾ ചെയ്തിട്ടുണ്ട്, അത് നന്നായി വന്നിരുന്നില്ല. മാത്രമല്ല പ്രേക്ഷകരിൽ വലിയ സ്വാധീനം ചെലുത്താനായില്ല. എന്നാൽ, രംഗീലയ്ക്ക് ശേഷം, അവൾ രാജ്യത്തിന്റെ ലൈംഗിക ചിഹ്നമായി മാറി,'

'അതിനർത്ഥം അവളെ സുന്ദരിയാക്കിയത് ഞാനാണെന്നല്ല. അവൾ ഒരു പെയിന്റിംഗ് പോലെ ആണെന്ന് ഞാൻ പറയും, ഞാൻ അവളെ ഫ്രെയിം ചെയ്തു. ഫ്രെയിമിന് പുറമേ, ഒരു പെയിന്റിംഗ് ശരിക്കും ആസ്വദിക്കണമെങ്കിൽ, അത് പ്രദർശിപ്പിക്കുന്നതിന് അനുയോജ്യമായ സ്ഥലവും ആവശ്യമാണ്, ആ സ്ഥലം രംഗീലയായിരുന്നു.'

'രംഗീല നിർമ്മിക്കുന്ന സമയത്തെ എന്റെ പ്രാഥമിക ലക്ഷ്യങ്ങളിലൊന്ന് ഊർമ്മിളയുടെ സൗന്ദര്യം ഏറ്റവും മനോഹരമായി ക്യാമറയിൽ പകർത്തുകയും അത് ലൈംഗിക ചിഹ്നങ്ങളുടെ ബെഞ്ച്മാർക്ക് ആക്കുകയും ചെയ്യുക എന്നതായിരുന്നു. രംഗീലയുടെ സെറ്റിൽ അവളെ എന്റെ ക്യാമറയിലൂടെ കണ്ടതിനേക്കാൾ വലിയ വലിയ സിനിമാറ്റിക്ക് അനുഭവം ഉണ്ടായിട്ടില്ലെന്ന് ഞാൻ പറയും.'

'ഇത് എങ്ങനെ നിങ്ങൾ എടുക്കുമെന്ന് എനിക്കറിയില്ല, എന്നാൽ ഊർമ്മിളയുമായുള്ള വ്യക്തിപരമായ കാര്യങ്ങളിൽ എനിക്കുണ്ടായ ഏറ്റവും വലിയ പ്രശ്നം, അവൾ ഒരു സാധാരണ മനുഷ്യനാണെന്ന് എനിക്ക് അംഗീകരിക്കാൻ കഴിഞ്ഞില്ല എന്നതാണ്. അവൾ വളരെ സ്നേഹമുള്ളവളായിരുന്നു. ഞാൻ സ്വാർത്ഥനായിരുന്നു, യഥാർത്ഥ ജീവിതത്തിൽ പോലും അവൾ ജീവിതത്തേക്കാൾ വലുതായിരിക്കണമെന്ന് ഞാൻ എപ്പോഴും ആഗ്രഹിച്ചു,' രാം ഗോപാൽ വർമ്മ അന്ന് കുറിച്ചു.

എന്നാൽ ഇവരുടെ ബന്ധം വിജയം കണ്ടില്ല എന്നതാണ് വാസ്‌തവം. ഇതിനെകുറിച്ച് പലർക്കും അറിയില്ല എന്ന് മാത്രമല്ല ആർജിവിയുമായുള്ള ബന്ധത്തെക്കുറിച്ച് ഊർമ്മിള തുറന്ന് പറഞ്ഞിട്ടില്ല. അതേസമയം,
2016 ൽ ഊർമ്മിള നടനും മോഡലുമായ മൊഹ്‌സിൻ അക്തർ മിറുമായി അവർ വിവാഹിതയായപ്പോൾ, രാം ഗോപാൽ ട്വിറ്ററിലൂടെ അഭിനന്ദിച്ചിരുന്നു. ഇന്ന് സിനിമയൊക്കെ വിട്ട് സജീവ രാഷ്ട്രീയ പ്രവർത്തകയായി മാറിയിരിക്കയായാണ് ഊർമ്മിള മതോന്ദ്‌കർ.