350 ജോഡി ഷൂ, വസ്ത്രം ധരിപ്പിക്കാൻ 11 പേർ; അക്ഷയ് കുമാറിന്റ ഫാഷൻ രഹസ്യങ്ങൾ ട്വിങ്കിൾ വെളിപ്പെടുത്തിയപ്പോൾ

ട്വിങ്കിളിന്റേയും അക്ഷയ് കുമാറിന്റേയും ഓഫ് സ്്ക്രീന്‍ കെമിസ്ട്രി ആരാധകര്‍ക്കിടയില്‍ ഏറെ പ്രശസ്തമാണ്. പരസ്പരം കളിയാക്കാനും തമാശകള്‍ പറയാനുമൊക്കെ മിടുക്കുളളവരാണ് അക്ഷയും ട്വിങ്കിളും. അക്ഷയ് കുമാറിന്റെ സിനിമകളേയും നിലപാടുകളേയും വിമര്‍ശിക്കുന്ന ട്വിങ്കിളിനേയും കണ്ടിട്ടുണ്ട്.

ഒരിടക്ക് ഒരു ഫാഷൻ അവാർഡ് വേദിയിൽ വച്ച് രണ്ടുപേരും തങ്ങളുടെ ഫാഷൻ രീതികളും രഹസ്യങ്ങളും പങ്കുവച്ചിരുന്നു. ട്വിങ്കിൾ തന്റെ ഫാഷൻ പൊലീസ് ആണെന്നായിരുന്നു അക്ഷയ് കുമാർ അന്ന് പറഞ്ഞത്. ട്വിങ്കിൾ ആവട്ടെ അക്ഷയ് കുമാറിന്റെ സ്റ്റൈലിന് പിന്നിലെ രഹസ്യങ്ങളും വെളിപ്പെടുത്തി. അക്ഷയ്‌ക്ക് 350 ജോഡി ഷൂസുകൾ ഉണ്ടെന്നും അത് ഒരു മുറി മുഴുവൻ വരുമെന്നും അക്ഷയ്ക്ക് ഒരുങ്ങാൻ സഹായിക്കുന്നതിനായി 11 പേരുടെ ഒരു ടീമുണ്ടെന്നുമാണ് ട്വിങ്കിൾ വെളിപ്പെടുത്തിയത്. വേദിയെ മുഴുവൻ രസിപ്പിച്ചു കൊണ്ടായിരുന്നു ഇവരുടെ സംസാരം.

ട്വിങ്കിൾ എങ്ങനെയാണ് തന്റെ ഫാഷൻ ചോയ്‌സുകളെ സ്വാധീനിക്കുന്നതെന്നും അക്ഷയ് കുമാർ പറഞ്ഞിരുന്നു. ഉടനെ തന്നെ അക്ഷയ്‌ക്ക് തന്നെക്കാൾ കൂടുതൽ ചെരുപ്പുകൾ ഉണ്ടെന്നും പിങ്ക്, പച്ച, ലിലാക്ക്, കടും പർപ്പിൾ, മഞ്ഞ നിറങ്ങളിലുള്ള പാന്റ്സ് ഉണ്ടെന്നും ട്വിങ്കിൾ വെളിപ്പെടുത്തി. എന്നാൽ നീയല്ലേ ഇതെല്ലാം വാങ്ങാൻ എന്നോട് പറഞ്ഞെ എന്നായി അക്ഷയ്, അതെ ഞാൻ പക്ഷെ മഴവിൽ നിറങ്ങൾ മുഴുവൻ വാങ്ങാൻ അല്ലെ എന്നായി ട്വിങ്കിൾ. അതോടെ വേദി മുഴുവൻ ചിരി ഉയരുകയായിരുന്നു.

താൻ മിക്കപ്പോഴും ധരിക്കുന്ന തന്റെ പ്രിയപ്പെട്ട ട്രാക്ക് പാന്റും ഹൂഡികളും ട്വിങ്കിൾ വെട്ടിമാറ്റിയെന്നും അതായിരുന്നു തനിക്ക് ഏറ്റവും സൗകര്യ പ്രദമായ വസ്ത്രമെന്നും അക്ഷയ് കുമാർ വേദിയിൽ പരാതി ഉന്നയിച്ചു.

അതേസമയം, വേഗത്തിൽ റെഡിയാവുന്ന കാര്യത്തിൽ അക്ഷയ് തന്നെയാണ് മുന്നിലെന്ന് ട്വിങ്കിൾ പറഞ്ഞു. അതിന്റെ കാരണവും ചൂണ്ടിക്കാട്ടി. 'ഇദ്ദേഹത്തിന് വസ്ത്രങ്ങൾ വെക്കാൻ മാത്രം ഒരു മുറിയുണ്ട്. റെഡിയാകാൻ സഹായിക്കാൻ 11 പേരുണ്ട്, എനിക്ക് ആരുമില്ല. അതുകൊണ്ട്, ഞാൻ കുറച്ച് സമയമെടുക്കും, അതൊക്കെ മനസ്സിലാക്കാവുന്നതേയുള്ളൂ.' ട്വിങ്കിൾ പറഞ്ഞു.

രക്ഷാബന്ധൻ ആണ് അക്ഷയ് കുമാറിന്റെ ഒടുവിൽ പുറത്തിറങ്ങിയ ചിത്രം. ചിത്രത്തിന് പ്രേക്ഷകർക്കിടയിൽ നിന്ന് നല്ല അഭിപ്രായം നേടാൻ കഴിഞ്ഞിരുന്നില്ല. ബോക്സ് ഓഫീസിലും കാര്യമായ നേട്ടം സ്വന്തമാക്കാൻ ചിത്രത്തിനായില്ല. കട്ട്പുറ്റ്ലി, റാം സേതു, സെൽഫി തുടങ്ങി നിരവധി ചിത്രങ്ങളാണ് അക്ഷയ് കുമാറിന്റേതായി അണിയറയിൽ ഒരുങ്ങുന്നത്.