18-ാം വയസില്‍ പല തെറ്റും പറ്റി, ആരും കൂടെ നിന്നില്ല; ബോളിവുഡ് മൊത്തം കപടമുഖങ്ങളെന്ന് പ്രിയങ്ക

ഈ യാത്ര എളുപ്പമായിരുന്നുവോ എന്ന സിമിയുടെ ചോദ്യത്തിന് ഒട്ടും എളുപ്പമായിരുന്നില്ലെന്നാണ് പ്രിയങ്ക മറുപടി നല്‍കുന്നത്. '' ആയിരുന്നില്ല. ഞാന്‍ ഒരുപാട് തെറ്റുകള്‍ ചെയ്തു. ഓരോ നിമിഷവും ഞാന്‍ നടന്നത് ഞാണിന്മേലാണ്. ആദ്യത്തെ രണ്ട് വര്‍ഷം വലിയ പാടായിരുന്നു. ഞാന്‍ ആരേയും വിശ്വസിച്ചിരുന്നില്ല. അത് സിനിമയായിരുന്നു നല്ലത്, ഏതാണ് ചെയ്യേണ്ടാത്തത് എന്നൊന്നും അറിയില്ല. സിനിമകളൊന്നും തുടങ്ങാതെ വന്നപ്പോള്‍ ഞാന്‍ എന്താണഅ ഇവിടെ ചെയ്യുന്നതെന്ന് ചിന്തിച്ചിരുന്നു. കോളേജിലേക്ക് തിരിച്ചു പോകാന്‍ തയ്യാറായിരുന്നു. അപ്പോഴാണ് അന്ദാസ് സംഭവിക്കുന്നത്'' എന്നാണ് പ്രിയങ്ക പറഞ്ഞത്.

''ഞാന്‍ തകര്‍ന്നു പോകലിന്റെ വക്കോളം എത്തിയിരുന്നു. അവിടെ നിന്നും ഞാന്‍ വളര്‍ന്നുവെന്നാണ് തോന്നുന്നത്. ഒന്നര വര്‍ഷത്തേക്ക് എല്ലാവരില്‍ നിന്നും നിരസിക്കപ്പെട്ടു. എനിക്കന്ന് പതിനെട്ട് വയസാണ്. എല്ലാവരും എന്നെ ഉപേക്ഷിച്ചു. ആര്‍ക്കും എനിക്കൊപ്പം ജോലി ചെയ്യണ്ടായിരുന്നു'' എന്നും പ്രിയങ്ക പറയുന്നുണ്ട്. നിരസിച്ചിവര്‍ തന്നെ തിരികെ വന്നതിനെക്കുറിച്ചും സിമി ചോദിക്കുന്നുണ്ട്.

''അവര്‍ തിരിച്ചു വരുമ്പോള്‍ സന്തോഷമാണ്. പക്ഷെ നിങ്ങള്‍ എന്നെ വേണ്ടെന്ന് പറഞ്ഞതിനാല്‍ ഞാന്‍ നിങ്ങളുടെ കൂടെ ജോലി ചെയ്യില്ലെന്ന് പറയരുത്, അങ്ങനെയല്ല കാര്യങ്ങള്‍ നടക്കുക. അവര്‍ വലിയ ആളുകളാണ്. അവരെ ബഹുമാനിക്കണം. അപ്പോഴാണ് നമ്മള്‍ കൂടുതല്‍ വലിയ ആളായി മാറുക. അതാണ് ഇന്‍ഡസ്ട്രിയുടെ രീതി'' എന്നാണ് അതിന് പ്രിയങ്ക നല്‍കിയ മറുപടി. അതേസമയം താന്‍ ബോളിവുഡില്‍ വെറുക്കുന്ന കാര്യം എന്താണെന്ന ചോദ്യത്തിനും പ്രിയങ്ക ചോപ്ര മറുപടി നല്‍കുന്നുണ്ട്.

''മിക്കവരും വ്യാജന്മാരാണ്. ബുദ്ധിയുള്ള ഒരുപാട് പേരുണ്ട്, പക്ഷെ കൂടുതല്‍ പേരും ഫേക്കാണ്. അതെനിക്ക് അംഗീകരിക്കാന്‍ പറ്റുന്നുണ്ട്. എനിക്ക് തോന്നുന്നത്, ചിലപ്പോള്‍ ഞാനും ഞാനല്ലാതായിരുന്നിട്ടുണ്ടെന്നാണ്'' എന്നായിരുന്നു പ്രിയങ്കയുടെ മറുപടി. എന്തായാലും അന്നത്തെ തിരിച്ചടികളില്‍ നിന്നും ശക്തമായി തിരിച്ചുവന്ന് ബോളിവുഡിലെ സൂപ്പര്‍ താരമായി മാറുകയായിരുന്നു പ്രിയങ്ക ചോപ്ര.

താരം ഇപ്പോള്‍ റൂസോ ബ്രദേഴ്‌സിന്റെ സീരീസായ സിറ്റാഡലില്‍ അഭിനയിച്ചു വരികയാണ്. നീണ്ടൊരു ഇടവേളയ്ക്ക് ശേഷം താരം അധികം വൈകാതെ ബോളിവുഡിലുമെത്തും. ജീ ലേ സര എന്ന ചിത്രത്തിലൂടെയാണ് പ്രിയങ്കയുടെ തിരിച്ചുവരവ്. സൂപ്പര്‍ താരങ്ങളായ ആലിയ ഭട്ടും കത്രീന കൈഫുമാണ് ചിത്രത്തിലെ മറ്റ് പ്രധാന വേഷങ്ങളിലെത്തുന്നത്. റോഡ് മൂവിയായ ജീ ലേ സരയുടെ സംവിധാനം ഫര്‍ഹാന്‍ അക്തര്‍ ആണ്. സിനിമാ ലോകം പ്രതീക്ഷയോടെ കാത്തിരിക്കുന്ന സിനിമയാണിത്.