എന്നെ വലിച്ച് താഴെയിടുകയായിരുന്നു! പരാജയം ഏറ്റുവാങ്ങേണ്ടി വന്നതിനെക്കുറിച്ച് സാറ അലി ഖാന്‍

സിനിമയുടെ കഥയെക്കുറിച്ച് ആരാധകരില്‍ ഒരു വിഭാഗം അമ്പരന്നിരിക്കുകയും മറ്റൊരു വിഭാഗം സന്തോഷിക്കുകയും ചെയ്യുന്നതില്‍ താന്‍ സന്തുഷ്ടയാണെന്നാണ് സാറ പറഞ്ഞത്. മിഡ് ഡേയ്ക്ക് നല്‍കിയ അഭിമുഖത്തിലാണ് സാറ മനസ് തുറന്നത്. താന്‍ സിനിമ ചെയ്യാനുള്ള കാരണം തന്നെ അതാണെന്നാണ് സാറ പറയുന്നത്. തന്റെ അവസാനം പുറത്തിറങ്ങിയ ചിത്രമായ ലവ് ആജ് കല്‍ എന്ന ചിത്രത്തിന് ലഭിച്ചിരുന്ന മോശം പ്രതികരണത്തെ അപേക്ഷിച്ച് അത്‌രംഗി രേയ്ക്ക് ലഭിക്കുന്ന പ്രതികരണത്തില്‍ താന്‍ ഒരുപാട് സന്തുഷ്ടയാണെന്നും സാറ പറയുന്നുണ്ട്. സെയ്ഫ് അലി ഖാനും ദീപിക പദുക്കോണും പ്രധാന വേഷത്തിലെത്തിയ ലവ് ആജ് കലിന്റെ രണ്ടാം ഭാഗമാണ് സാറയുടെ ലവ് ആജ് കല്‍. കാര്‍ത്തിക് ആര്യന്‍ ആയിരുന്നു ചിത്രത്തിലെ നായകന്‍.

''കേദാര്‍നാഥിനും സിമ്പയ്ക്കും ശേഷം ഞാന്‍ അര്‍ഹതയുണ്ടായിരുന്നുവോ എന്നുറപ്പില്ലാത്ത ഇടത്തായിരുന്നു. ലവ് ആജ് കലിന് ശേഷം എന്നെ വലിച്ച് താഴെയിട്ടു'' എന്നായിരുന്നു സാറ പറഞ്ഞത്. സാറയുടെ കരിയറിലെ ആദ്യത്തെ പരാജയമായിരുന്നു ലവ് ആജ് കല്‍. ഈ ചിത്രത്തിന്റെ പരാജയം തന്നെ വല്ലാതെ അലട്ടിയിരുന്നുവെന്ന് സാറ നേരത്തേയും തുറന്ന് പറഞ്ഞിരുന്നു. എന്തായാലും അത് രംഗി രേയ്ക്ക് ലഭിക്കുന്ന സ്വീകാര്യതയില്‍ സാറ അലി ഖാന്‍ സന്തുഷ്ടയാണ്. ചിത്രത്തിലെ സാറയുടെ ചക്കാ ചക്ക് എന്ന പാട്ടിലെ ഡാന്‍സും സോഷ്യല്‍ മീഡിയയില്‍ വൈറലായിരുന്നു. ഇതോടെ താരം വിജയ പാതയിലേക്ക് തിരികെ വന്നിരിക്കുകയാണ്.

Recommended Video

ബോളിവുഡ് താര ദമ്പതികളും, പ്രണയ കഥയും | FilmiBeat Malayalam

അമൃതയുടേയും സെയ്ഫിന്റെയും മൂത്ത മകളാണ് സാറ. തന്റെ അച്ഛനും അമ്മയും തമ്മിലുള്ള വിവാഹ മോചനത്തെക്കുറിച്ചും സാറ പലപ്പോഴും തുറന്ന് പറഞ്ഞിട്ടുണ്ട്. അമൃതയ്ക്കും സെയ്ഫിനും രണ്ട് മക്കളാണുള്ളത്. ഇബ്രാഹിം ആണ് സാറയുടെ സഹോദരന്‍. സെയ്ഫിന്റെ രണ്ടാം ഭാര്യയായ കരീന കപൂറുമായും ഈ ബന്ധത്തിലെ മക്കളുമായും സാറയ്ക്ക് നല്ല സൗഹൃദമാണ്. സഹോദരന്മാരുടെ പിറന്നാള്‍ ആഘോഷത്തിലും മറ്റും സാറ സജീവമായി എത്താറുണ്ട്. കേദാര്‍നാഥിലൂടെ അരങ്ങേറിയ സാറ ആദ്യ സിനിമയിലൂടെ തന്നെ ശ്രദ്ധ നേടിയിരുന്നു. പിന്നാലെ വന്ന സിമ്പ എന്ന ചിത്രത്തിലൂടെ താരമൂല്യമുള്ള നായികയായി മാറുകയായിരുന്നു. നിരവധി സിനിമകളാണ് സാറയുടേതായി ഇനി വരാനിരിക്കുന്നത്.