ഗൗരിയ്ക്ക് നല്‍കിയ ആദ്യത്തെ വാലന്റൈന്‍സ് ഡേ സമ്മാനം; 34 വര്‍ഷം മുമ്പത്തെ ഓര്‍മ്മ പങ്കുവച്ച് ഷാരൂഖ്

ഇപ്പോഴിതാ മറ്റൊരു ചോദ്യോത്തര സെഷനുമായി എത്തിയിരിക്കുകയാണ് ഷാരൂഖ് ഖാന്‍. തന്റെ അടുത്ത പ്രൊജക്ടുകളെക്കുറിച്ചും വ്യക്തിജീവിതത്തെക്കുറിച്ചും ചിത്രത്തിന്റെ കളക്ഷനെക്കുറിച്ചുമൊക്കെ ഷാരൂഖ് ഖാന്‍ മറുപടി നല്‍കുന്നുണ്ട്. ഇതിനിടെ ഒരു ചോദ്യം ആരാധകരുടെ ശ്രദ്ധ നേടിയിരിക്കുകയാണ്. വിശദമായി വായിക്കാം.

ഷാരൂഖ് ഖാന്റേയും ഭാര്യ ഗൗരി ഖാന്റേയും ആദ്യത്തെ വാലന്റൈന്‍സ് ഡേയെക്കുറിച്ചായിരുന്നു ഒരു ആരാധകന് ചോദിക്കാനുണ്ടായിരുന്നത്. തങ്ങളുടെ പ്രണയത്തിന്റെ ആദ്യ നാളുകളിലെ, ഒരുമിച്ചുള്ള ആദ്യത്തെ വാലന്റൈന്‍സ് ഡേയ്ക്ക് എന്ത് സമ്മാനമാണ് ഷാരൂഖ് ഖാന്‍ ഗൗരിയ്ക്ക് നല്‍കിയതെന്നാണ് ആരാധകന്‍ ചോദിച്ചത്. ഇതിന് ഷാരൂഖ് ഖാന്‍ നല്‍കിയ മറുപടിയാണ് ശ്രദ്ധ നേടുന്നത്.

34 വര്‍ഷം മുമ്പായിരുന്നു തന്റേയും ഗൗരിയുടേയും ആദ്യത്തെ വാലന്റൈന്‍സ് ഡേയെന്നും അന്ന് താന്‍ അവള്‍ക്ക് സമ്മാനമായി നല്‍കിയത് പിങ്ക് നിറത്തിലുള്ള പ്ലാസ്റ്റിക് കമ്മലുകലാണ് എന്നാണ് ഷാരൂഖ് ഖാന്‍ പറയുന്നത്. അധികം വൈകാതെ തന്നെ താരത്തിന്റെ മറുപടി സോഷ്യല്‍ മീഡിയയില്‍ വൈറലായി മാറുകയായിരുന്നു. ഇതിനിടെ മറ്റൊരാള്‍ ഷാരൂഖ് ഖാനോട് ചോദിച്ചത് ഈ വാലന്റൈന്‍സ് ഡേയ്ക്ക് എന്ത് സമ്മാനമാണ് താങ്കള്‍ക്ക് വേണ്ടത് എന്നായിരുന്നു. ഈ ചോദ്യത്തിനും താരം മറുപടി നല്‍കുന്നുണ്ട്.

എനിക്കുള്ള സമ്മാനം നേരത്തെ തന്നെ നിങ്ങള്‍ തന്നു കഴിഞ്ഞുവെന്നും പഠാന് ലഭിക്കുന്ന സ്‌നേഹമാണതെന്നുമായിരുന്നു ഷാരൂഖ് ഖാന്‍ നല്‍കിയ മറുപടി. ചിത്രത്തിന്റെ വിജയം സൂചിപ്പിക്കുന്നതായിരുന്നു താരത്തിന്റെ മറുപടി. ഈ മറുപടിയും സോഷ്യല്‍ മീഡിയയുടെ ശ്രദ്ധ നേടുകയായിരുന്നു. ഇതിനിടെ മകന്‍ അബ്രാം പഠാന്‍ ചിത്രത്തിന്റെ ചിത്രീകരണ സമയത്ത് ദീപികയോടൊപ്പം കളിച്ച് ചിരിച്ചിരിക്കുന്ന ചിത്രങ്ങള്‍ സോഷ്യല്‍ മീഡിയയില്‍ വൈറലായിരുന്നു. അതേക്കുറിച്ചും ഒരാള്‍ ചോദിച്ചിരുന്നു.

അബ്രാം എന്തായിരുന്നു പഠാന്‍ ലൊക്കേഷനില്‍ ചെയ്തത്, അവന്‍ അസിസ്റ്റന്റ് ഡയറ്ക്ടറായിരുന്നുവോ എന്നായിരുന്നു ഒരാള്‍ ചോദിച്ചത്. അല്ല, തന്റെ സ്‌റ്റൈലിസ്റ്റ് ആയിരുന്നുവെന്നാണ് ഷാരൂഖ് ഖാന്‍ നല്‍കിയ മറുപടി.

അതേസമയം ഷാരൂഖ് ഖാന്റേയും ഗൗരിയുടേയും പ്രണയ കഥ ആരാധകര്‍ക്ക് സുപരിചിതമാണ്. ഏറെനാളത്തെ പ്രണയത്തിന് ശേഷം 1991 ലാണ് ഇരുവരും വിവാഹം കഴിക്കുന്നത്. ആ സമയത്ത് ഷാരൂഖ് ഖാന്‍ സിനിമയിലെത്തിയിരുന്നില്ല. തൊട്ടടുത്ത വര്‍ഷമാണ് ഷാരൂഖ് ഖാന്‍ സിനിമയില്‍ അരങ്ങേറുന്നത്. മൂന്ന് മക്കളാണ് താരദമ്പതികള്‍ക്കുള്ളത്. ആര്യന്‍ ഖാന്‍, സുഹാന ഖാന്‍, അബ്രാം ഖാന്‍ എന്നിങ്ങനെയാണ് ഷാരൂഖിന്റെ മക്കളുടെ പേരുകള്‍.

ഷാരൂഖ് ഖാന്‍റെ പാതയിലൂടെ മക്കളും സിനിമയിലേക്ക് എത്തുകയാണ്. മൂത്ത മകന്‍ ആര്യന്‍റെ സിനിമയുടെ പ്രഖ്യാപനം ഈയ്യടുത്താണ് നടന്നത്. മകള്‍ സുഹാനയുടെ അരങ്ങേറ്റം ഒടിടിയിലൂടെയാണ്. നെറ്റ്ഫ്ളിക്സ് സീരീസായ ആർച്ചീസിലൂടെയാണ് സുഹാന തുടങ്ങുന്നത്. സോയ അക്തറാണ് സീരീസിന്റെ സംവിധാനം. അതേസമയം ഡങ്കിയാണ് ഷാരൂഖ് ഖാന്റെ റിലീസ് കാത്തു നില്‍ക്കുന്ന സിനിമ.