'സൽമാനെ ഇഷ്ടമായിരുന്നില്ല, പക്ഷെ സഹോദരൻ സൊഹൈലുമായി പ്രണയത്തിലായിരുന്നു'; പൂജ ഭട്ടിന്റെ പ്രണയ കഥ

പൂജയുടെ സിനിമാ ജീവിതത്തെക്കാളും കൂടുതൽ പ്രേക്ഷകർക്ക് സുപരിചിതം താരത്തിന്റെ സ്വകാര്യ ജീവിതമാണ്. നിരവധി പ്രണയങ്ങളും പ്രണയ നഷ്ടങ്ങളും പൂജയുടെ ജീവിതത്തിൽ സംഭവിച്ചിട്ടുണ്ട്.

ഒരു കാലത്ത് സൽമാൻ ഖാന്റെ സഹോദരനും സംവിധായകനുമായ സൊഹൈൽ ഖാനുമായി പൂജ പ്രണയത്തിലായിരുന്നു. വിവാഹത്തിന്റെ വക്കോളമെത്തിയ പ്രണയം പിന്നീട് പെട്ടന്നാണ് തകർന്നത്. ശേഷം പൂജ വേറെ വിവാഹം ചെയ്തു.

സൊഹൈലുമായി പിരിഞ്ഞതിനെ കുറിച്ച് പലപ്പോഴും പൂജ ഭട്ട് തുറന്ന് പറഞ്ഞിട്ടുണ്ട്. അത്തരത്തിൽ വർഷങ്ങൾക്ക് മുമ്പ് സൊഹൈലുമായുള്ള ബോണ്ടിങിനെ കുറിച്ച് പൂജ പറഞ്ഞ വാക്കുകളാണ് വൈറലാകുന്നത്.

'അദ്ദേഹത്തിന്റെ കുടുംബവുമായി ഞാൻ വളരെ കംഫർട്ടബിളാണ്. അവർ ശരിക്കും നല്ലവരാണ്. ഞാൻ അവരുടെ സ്വന്തമാണെന്ന തോന്നലുണ്ടാക്കിയിട്ടുണ്ട്. കൂടുതൽ ചോദ്യങ്ങളൊന്നും ചോദിക്കാത്തതിനാൽ അവരെയെല്ലാം ഞാൻ വളരെയധികം ബഹുമാനിക്കുന്നു.'

'ഞാൻ എന്തായിരുന്നോ അതുപോലെയായിരിക്കാൻ അവർ എന്നെ അനുവദിച്ചു. എന്റെ ഇടപെടലുകൾ അവർക്ക് ഇഷ്ടമാണ്. അവർ ഇപ്പോൾ ശരിക്കും എന്റെ കുടുംബത്തെ പോലെയായി.'

'എനിക്ക് അദ്ദേഹത്തിന്റെ അച്ഛനെ വളരെ ഇഷ്ടമാണ്. സൊഹൈലിന്റെ സഹോദരൻ അർബാസിനേയും എനിക്ക് ഒരുപാട് ഇഷ്ടമായി.'

'അതേ സമയം ചില വിചിത്രമായിട്ടുള്ള കാരണങ്ങൾ കൊണ്ട് ഞാനും സൽമാൻ ഖാനും തമ്മിൽ ശത്രുതയിലായിരുന്നു. സൽമാൻ ഖാനും രേവതിയും അഭിനയിച്ച ലവ് എന്ന ചിത്രത്തിൽ ഞാൻ അഭിനയിക്കാത്തത് കൊണ്ടായിരിക്കും ആ പിണക്കം ഉണ്ടായതെന്ന് തോന്നുന്നു.'

'പിന്നീട് പ്രശ്നം ഒത്തുതീർപ്പാക്കിയിരുന്നു. സൊഹൈലുമായുള്ള എന്റെ പ്രണയത്തിന് സമയപരിധിവെച്ചിരിക്കുന്ന ധാരാളം വിമർശകരുണ്ടായിരുന്നു. അതെനിക്കും അറിയാം. അതിൽ പ്രതികരിച്ച് സമയം കളയാൻ ഞാൻ ആഗ്രഹിക്കുന്നില്ല. വിവാഹം തീർച്ചയായും എന്റെ മനസിലുണ്ട്.'

'പക്ഷേ സൊഹൈൽ ഒരു സംവിധായകനെന്ന നിലയിൽ ആവേശകരവും പുതിയതുമായ ഒരു കരിയറിന്റെ പടിവാതിൽക്കൽ എത്തി നിൽക്കുകയാണ്.'

'വിവാഹത്തിന്റെ വേദിയും മെനുവും തീരുമാനിക്കുന്നതിന് മുമ്പ് രണ്ട് വർഷം കൂടി സിനിമയിൽ സജീവമാവാൻ ഞാൻ ആഗ്രഹിക്കുന്നു. ഞങ്ങൾക്ക് ഭാവി ഒരുമിച്ച് മുന്നോട്ട് കൊണ്ട് പോകണം.'

'വിശ്വാസം, ബഹുമാനം, പരസ്പരം മനസിലാക്കൽ തുടങ്ങി നിരവധി കാര്യങ്ങളിലൂടെയാണ് ബന്ധം മുന്നോട്ട് പോവുന്നത്' സൊഹൈലുമായും സൽമാൻ കുടുംബവുമായുമുള്ള ബന്ധത്തെ കുറിച്ചും പൂജ ഭട്ട് പറഞ്ഞതിങ്ങനെയായിരുന്നു.

സൊഹൈലുമായി പിരിഞ്ഞ ശേഷം പൂജ ഭട്ട് മനിഷ് മഹിജയെ വിവാഹം കഴിച്ചെങ്കിലും 2014ൽ ആ ബന്ധവും വേർപിരിഞ്ഞു. സെഹൈൽ സീമ ഖാനെയാണ് വിവാഹം ചെയ്തത്.