'ഞാൻ ഒരുപാട് കെയർ ചെയ്യുന്ന വ്യക്തിയാണ് അദ്ദേഹം'; വിജയ് വർമയുമായി പ്രണയത്തിൽ! മൗനം വെടിഞ്ഞ് തമന്ന

തെന്നിന്ത്യൻ സിനിമകളിലൂടെ പ്രേക്ഷകർക്ക് പ്രിയങ്കരിയായ നടിയാണ് തമന്ന ഭാട്ടിയ. തമിഴ്, തെലുങ്ക്, കന്നഡ, ഹിന്ദി ഭാഷകളിലെല്ലാം ഒരുപോലെ തിളങ്ങിയിട്ടുള്ള തമന്നയ്ക്ക് കേരളത്തിലടക്കം നിരവധി ആരാധകരാണ് ഉള്ളത്. നിലവിൽ ബോളിവുഡിൽ കൂടുതൽ സജീവമായി കൊണ്ടിരിക്കുകയാണ് തമന്ന. തന്റെ പുതിയ ചിത്രമായ ലസ്റ്റ് സ്റ്റോറീസ് 2 ന്റെ പ്രമോഷൻ തിരക്കിലാണ് താരമിപ്പോൾ. എന്നാൽ സിനിമയേക്കാളേറെ പ്രേക്ഷകർക്കിടയിൽ ചർച്ചയാകുന്നത് നടൻ വിജയ് വർമയും തമന്നയുമായി ബന്ധപ്പെട്ട വർത്തകളാണ്.

തമന്നയും വിജയ് വർമയും പ്രണയത്തിലാണെന്ന തരത്തിലുള്ള വാർത്തകൾ കഴിഞ്ഞ കുറച്ചു നാളുകളായി സോഷ്യൽമീഡിയയിൽ പ്രചരിക്കുന്നുണ്ട്. വിവിധ ഇടങ്ങളിൽ ഇവരെ ഒന്നിച്ച് കണ്ടതോടെയാണ് അഭ്യൂഹങ്ങളുടെ തുടക്കം. അതിനിടെ ന്യൂഇയര്‍ രാത്രിയില്‍ ഇരുവരും ചുംബിക്കുന്ന ഒരു ചിത്രവും പുറത്തുവന്നിരുന്നു. ഗോവയിലെ പുതുവത്സരാഘോഷത്തിൽ നിന്നുള്ളതായിരുന്നു ചിത്രം. ഇതോടെ ഇവർ പ്രണയത്തിലാണെന്ന് തന്നെ ആരാധകർ ഉറപ്പിച്ചു. എന്നാൽ ഇതേക്കുറിച്ച് തുറന്നു പറയാൻ ഇരുവരും തയ്യാറായിരുന്നില്ല.

ഇപ്പോഴിതാ വിജയ് വർമയുമായുള്ള ബന്ധത്തെ കുറിച്ച് മനസ് തുറന്നിരിക്കുകയാണ് തമന്ന. ഫിലിം കമ്പാനിയന് നൽകിയ അഭിമുഖത്തിൽ സംസാരിക്കുകയായിരുന്നു നടി. അഭ്യൂഹങ്ങൾ ശരിവയ്ക്കുന്ന വിധത്തിലാണ് തമന്നയുടെ പ്രതികരണം. താൻ ഒരുപാട് കെയർ ചെയ്യുന്ന ആളാണ് വിജയ് എന്നും തനിക്ക് ഏറ്റവും സന്തോഷം ലഭിക്കുന്ന ഇടമാണ് അതെന്നുമാണ് തമന്ന പറഞ്ഞത്.

'ഒരാൾ നിങ്ങളുടെ സഹനടനായതുകൊണ്ട് മാത്രം നിങ്ങൾ അയാളിലേക്ക് ആകർഷിക്കപ്പെടുമെന്ന് ഞാൻ കരുതുന്നില്ല. എനിക്ക് ഒരുപാട് സഹതാരങ്ങൾ ഉണ്ടായിട്ടുണ്ട്. ഒരാൾക്ക് ഒരാളോട് എന്തെങ്കിലും ആകർഷണം തോന്നുകയോ മറ്റോ ചെയ്താൽ അത് തീർത്തും വ്യക്തിപരമായ എന്തെങ്കിലും കാരണങ്ങൾ കൊണ്ടായിരിക്കും. അതിന് ഉപജീവനത്തിനായി ചെയ്യുന്ന കാര്യങ്ങളുമായി ഒരു ബന്ധവുമുണ്ടാകില്ല, ഇത് സംഭവിക്കാനുള്ള കാരണം അതല്ല എന്നാണ് ഞാൻ ഉദ്ദേശിക്കുന്നത്', തമന്ന പറയുന്നു.

'ഞാൻ ഒരുപാട് ബഹുമാനിക്കുന്ന, ആരാധിക്കുന്ന വ്യക്തിയാണ്. വളരെ സ്വാഭാവികമായി എനിക്ക് അടുപ്പം തോന്നിയ വ്യക്തിയാണ് അദ്ദേഹം. മറ്റൊന്നും ചിന്തിക്കാതെ എന്നോട് അടുത്ത ഒരാളാണ്. അതുകൊണ്ട് എനിക്കും വളരെ എളുപ്പമായി. എന്നെ പോലെ വലിയ നേട്ടങ്ങൾ ആഗ്രഹിക്കുന്ന സ്ത്രീകളെല്ലാം എല്ലാത്തിനും വളരെയധികം കഷ്ടപ്പെടണം എന്ന് ചിന്തിക്കുന്ന ആളുകളാണ്',

'സാധാരണ ഇന്ത്യയിലെ ഒരു സ്ത്രീയ്ക്ക് തന്റെ ജീവിതം മുഴുവൻ ആർക്കെങ്കിലും വേണ്ടി മാറ്റേണ്ടിവരുമെന്ന് ഞാൻ കരുതുന്നു. അവർക്ക് ഒരു പങ്കാളിയെ കണ്ടെത്തണമെങ്കിൽ ശാരീരികമായി നീങ്ങേണ്ടി വന്നേക്കാം. അല്ലെങ്കിൽ ആ വ്യക്തിയെ മനസിലാക്കാൻ സഹായിക്കുന്ന പല കാര്യങ്ങളും ചെയ്യേണ്ടി വന്നേക്കാം',

'പക്ഷേ ഇവിടെ ഞാൻ എനിക്കായി ഒരു ലോകം ഉണ്ടാക്കിയെടുക്കുകയായിരുന്നു, ഞാൻ ഒന്നും ചെയ്യാതെ തന്നെ എന്റെ ആ ലോകത്തെ മനസ്സിലാക്കാൻ ആ വ്യക്തിക്ക് കഴിഞ്ഞു. ഞാൻ വളരെയധികം കെയർ ചെയ്യുന്ന ഒരു വ്യക്തിയാണ് അദ്ദേഹം, അതെ, എനിക്ക് ഏറെ സന്തോഷം ലഭിക്കുന്ന ഇടമാണ്', തമന്ന പറഞ്ഞു.

തമന്നയും വിജയ് വർമയും ഒന്നിച്ചെത്തുന്ന ലസ്റ്റ് സ്റ്റോറീസ് 2 ജൂൺ 29 മുതലാണ് നെറ്റ്ഫ്ലിക്സിൽ സ്ട്രീമിങ് ആരംഭിക്കുന്നത്. ആർ.ബാൽക്കി, കൊങ്കണ സെൻ ശർമ, അമിത് രവീന്ദർനാഥ് ശർമ, സുജോയ് ഘോഷ് എന്നിവരുടെ ഹ്രസ്വചിത്രങ്ങളടങ്ങിയ ആന്തോളജി സിനിമയാണിത്.

അമൃത സുഭാഷ്, അംഗദ് ബേദി, കാജോൾ, കുമുദ് മിശ്ര, മൃണാൽ താക്കൂർ, നീന ഗുപ്ത, തിലോത്തമ ഷോം എന്നിവരാണ് സിനിമയിലെ മറ്റു താരങ്ങൾ. ദിലീപ് നായകനാകുന്ന മലയാള ചിത്രം ബാന്ദ്ര അടക്കം നിരവധി സിനിമകൾ തമന്നയുടേതായി അണിയറയിൽ ഉണ്ട്.