അയാള്‍ എന്റെ നെഞ്ചില്‍ നിന്നും കണ്ണെടുക്കാതെ നോക്കിയിരുന്നു, മുറിയിലേക്ക് പോകാന്‍ നിര്‍ബന്ധിച്ചു: വിദ്യ ബാലന്‍

തന്റെ കരിയറിന്റെ തുടക്കത്തില്‍ ഒരുപാട് പ്രതിസന്ധികള്‍ നേരിടേണ്ടി വന്നിട്ടുണ്ട്. ടെലിവിഷനിലൂടെയായിരുന്നു വിദ്യ തന്റെ കരിയര്‍ ആരംഭിക്കുന്നത്. സിനിമയില്‍ അവസരം ലഭിക്കുക ഒട്ടും എളുപ്പമായിരുന്നില്ല. ആദ്യ സിനിമ റിലീസ് ചെയ്യും മുമ്പ് പതിമൂന്ന് സിനിമകളില്‍ നിന്നുമാണ് വിദ്യയെ ഒഴിവാക്കുകയോ ഷൂട്ട് നിര്‍ത്തേണ്ടി വരികയോ ചെയ്തിട്ടുണ്ട്. ഭാഗ്യമില്ലെന്ന് പറഞ്ഞ് തുടങ്ങും മുമ്പേ ആ കരിയര്‍ അവസാനിപ്പിക്കാന്‍ പലരും ശ്രമിച്ചിരുന്നു. എന്നാല്‍ അവരെയൊക്കെ പിന്നെ തന്റെ ആരാധകരാക്കി മാറ്റാന്‍ വിദ്യയ്ക്ക് സാധിച്ചു.

അവസര നിഷേധിക്കലുകളും ഒഴിവാക്കുകള്‍ക്കുമൊപ്പം കാസ്റ്റിംഗ് കൗച്ച് പോലുള്ള ദുരനുഭവങ്ങളുമെല്ലാം വിദ്യ ബാലന് നേരിടേണ്ടി വന്നിട്ടുണ്ട്. ഒരിക്കല്‍ പിങ്ക് വില്ലയ്ക്ക് നല്‍കിയ അഭിമുഖത്തില്‍ തന്റെ തുടക്കകാലത്ത് തനിക്ക് നേരിടേണ്ടി വന്ന അനുഭവം വിദ്യ ബാലന്‍ തുറന്ന് പറയുന്നുണ്ട്. സിനിമാ ലോകത്തെ ഞെട്ടിച്ച താരത്തിന്റെ തുറന്നു പറച്ചിലുകള്‍ വിശദമായി വായിക്കാം തുടര്‍ന്ന്.

ഒരു സിനിമയ്ക്കായുള്ള കൂടിക്കാഴ്ചയില്‍ വച്ച് സംവിധായകന്‍ തന്നോട് അദ്ദേഹത്തിന്റെ മുറിയിലേക്ക് പോകാന്‍ നിര്‍ബന്ധിക്കുന്നുണ്ടായിരുന്നുവെന്നാണ് വിദ്യ പറയുന്നത്. ''ഞാന്‍ ഓര്‍ക്കുന്നു. ഒരു ദിവസം ഞാന്‍ ചെന്നൈയില്‍ വച്ചൊരു സംവിധായകനെ കാണേണ്ടി വന്നിരുന്നു. കോഫി ഷോപ്പില്‍ വച്ച് കാണാം എന്ന് ഞാന്‍ പറഞ്ഞു. എന്നോട് സ്വകാര്യമായി സംസാരിക്കണമെന്നും അദ്ദേഹത്തിന്റെ മുറിയിലേക്ക് പോകാമെന്നും അദ്ദേഹം നിര്‍ബന്ധിച്ചു കൊണ്ടിരുന്നു. ഞാന്‍ എന്റെ മുറിയുടെ വാതില്‍ അയാള്‍ക്ക് തുറന്ന് കാണിച്ചു കൊടുത്തു. അയാള്‍ ഇറങ്ങിപ്പോയി'' എന്നാണ് വിദ്യ ബാലന്‍ പറയുന്നത്.

മറ്റൊരിക്കല്‍ താനൊരു സിനിമയുടെ കാസ്റ്റിംഗ് ഡയറ്കടറെ കണ്ടപ്പോഴുണ്ടായ അനുഭവവും വിദ്യ പങ്കുവെക്കുന്നുണ്ട്. അയാള്‍ തന്നെ മാറിടത്തില്‍ തുറിച്ച് നോക്കിക്കൊണ്ടിരിക്കുകയായിരുന്നുവെന്നാണ് വിദ്യ പറയുന്നത്. അതോടെ താന്‍ അവിടെ നിന്ന് അച്ഛനേയും കൂട്ടി പോന്നുവെന്നും പക്ഷെ ആ സിനിമയില്‍ തനിക്ക് അവസരം കിട്ടിയെന്നും എന്നാല്‍ താനത് സ്വീകരിച്ചില്ലെന്നുമാണ് വിദ്യ പറയുന്നത്. ഒരു തമിഴ് സിനിമയില്‍ നിന്നും തന്നെ മാറ്റിയ അനുഭവവും വിദ്യ പറയുന്നുണ്ട്.

''എന്നെ ഒരു തമിഴ് സിനിമയില്‍ നിന്നും പുറത്താക്കിയിട്ടുണ്ട്. എന്റെ അച്ഛനും അമ്മയും എന്റെ കൂടെ വന്നിരുന്നു. എന്നെക്കുറിച്ച് അവര്‍ക്ക് ആശങ്കയുണ്ടായിരുന്നു. ഞങ്ങള്‍ നിര്‍മ്മാതാവിന്റെ ഓഫീസില്‍ ചെന്നു. അയാള്‍ ഞങ്ങള്‍ക്ക് സിനിമയുടെ ദൃശ്യങ്ങള്‍ കാണിച്ചു തന്നിട്ട് നോക്കൂ ഇവളെ കാണാന്‍ ഒരു നായികയെ പോലെയുണ്ടോ എന്ന് ചോദിച്ചു. എനിക്കിവളെ എടുക്കാല്‍ താല്‍പര്യമുണ്ടായിരുന്നില്ല. സംവിധായകന്‍ നിര്‍ബന്ധിച്ചത് കൊണ്ട് മാത്രമായിരുന്നു എടുത്തത്'' എന്നാണ് വിദ്യ പറയുന്നത്.

''എനിക്ക് ഞാന്‍ വൃത്തിക്കെട്ടവളാണെന്ന് തോന്നി. മാസങ്ങളോളം വെറുപ്പ് തോന്നി. ഞാന്‍ കണ്ണാടിയില്‍ നോക്കുന്നത് തന്നെ നിര്‍ത്തി. എന്നെ കാണാന്‍ ഭംഗിയില്ലെന്ന് തോന്നി. ആ മനുഷ്യനെ ഞാന്‍ ഇന്നുവരേയും മറന്നിട്ടില്ല, മാപ്പ് നല്‍കുകയുമില്ല. പക്ഷെ പിന്നീട് ഞാന്‍ സ്വയം സ്‌നേഹിക്കാന്‍ പഠിച്ചു'' എന്നാണ് വിദ്യ പറയുന്നത്. മറ്റൊരു സിനിമയിലെ ഡയലോഗുകള്‍ മോശമായതിനാല്‍ താന്‍ പിന്മാറിയെന്നും തുടര്‍ന്ന് തനിക്കെതിരെ അവര്‍ ലീഗല്‍ നോട്ടീസ് അയച്ചുവെന്നും വിദ്യ പറയുന്നുണ്ട്.