വിവാഹം അച്ഛനില്‍ നിന്ന് മറച്ച് വച്ച് ഒരേ വീട്ടില്‍ കഴിഞ്ഞു; ഒടുവില്‍ ദിവ്യ ഭാരതിയെ തേടി ദാരുണാന്ത്യം!

ബോളിവുഡിനെയാകെ ഞെട്ടിച്ചതായിരുന്നു ദിവ്യ ഭാരതിയുടെ മരണം. മരണത്തെക്കുറിച്ച് പല തരത്തിലുള്ള ചര്‍ച്ചകളും അഭ്യൂഹങ്ങളും ഇപ്പോഴും ആരാധകര്‍ക്കിടയില്‍ സജീവമാണ്. ദിവ്യയുടെ മരണത്തിന് ശേഷം ഏറെ നാള്‍ ആ വേദനയിലായിരുന്നു സാജിദ് കഴിഞ്ഞിരുന്നത്. തങ്ങളുടെ വിവാഹ വാര്‍ത്ത ദിവ്യയുടെ അച്ഛനില്‍ നിന്നും ദിവ്യയും സാജിദും ഏറെ നാള്‍ മറച്ചുവെച്ചിരുന്നു. ഒരിക്കല്‍ ഒരു അഭിമുഖത്തില്‍ ദിവ്യയുടെ അമ്മ മീത ഭാരതിയാണ് ഇതേക്കുറിച്ച് മനസ് തുറന്നത്. വിവാഹത്തിന് ദിവ്യയുടെ പിതാവ് പ്രകാശ് ഭാരതി എതിരായിരുന്നു.

''സാജിദ് ഗോവിന്ദയുടെ ഡേറ്റിന് വേണ്ടി ഷോല ഓര്‍ ്ശബ്‌നമിന്റെ സെറ്റില്‍ സ്ഥിരമായി വരുമായിരുന്നു. ഒരു ദിവസം ദിവ്യയെ പരിചയപ്പെട്ടു. ആ ദിവസം തന്നെ ദിവ്യ എന്നോട് ചോദിച്ചു അമ്മേ സാജിദിനെക്കുറിച്ച് എന്താണ് തോന്നുന്നതെന്ന്. നല്ലവനായിട്ടാണ് തോന്നിയതെന്ന് ഞാനും പറഞ്ഞു. കുറച്ച് ദിവസം കഴിഞ്ഞപ്പോള്‍ സാജിദിനെ വിവാഹം കഴിക്കട്ടെ എന്നവള്‍ ചോദിച്ചു. അച്ഛനോട് ചോദിക്കാനായിരുന്നു ഞാന്‍ പറഞ്ഞത്. പക്ഷെ അദ്ദേഹം എതിര്‍ത്തതു. ദിവ്യയ്ക്ക് പതിനെട്ട് ആയതിന് പിന്നാലെ ഒരു ദിവസം അവള്‍ എന്നെ വിളിച്ചു. സാജിദിനെ വിവാഹം കഴിക്കാന്‍ പോവുകയാണെന്ന് പറഞ്ഞു. സാക്ഷിയായി ഒപ്പിടണമെന്ന് പറഞ്ഞു. അച്ഛനെ അറിയിക്കാത്തതിനാല്‍ വരാനാകില്ലെന്ന് ഞാന്‍ പറഞ്ഞു'' ദിവ്യയുടെ അമ്മ പറയുന്നു.

സാജിദുമായുള്ള വിവാഹ ശേഷവും ദിവ്യ തന്റെ മാതാപിതാക്കളുടെ കൂടെയായിരുന്നു താമസിച്ചിരുന്നത്. മകള്‍ സാജിദിനെ വിവാഹം കഴിച്ചിരുന്ന വിവരം ദിവ്യയുടെ അച്ഛന് അറിയില്ലായിരുന്നു. കുറച്ച് മാസങ്ങള്‍ക്ക് ശേഷം ദിവ്യയുടെ വീട്ടില്‍ ദീപാവലി ആഘോഷത്തില്‍ പങ്കെടുക്കാനെത്തിയപ്പോള്‍ സാജിദ് തന്നെയാണ് തങ്ങളുടെ വിവാഹ വാര്‍ത്ത വെളിപ്പെടുത്തിയത്. എന്നാല്‍ അവരുടെ ദാമ്പത്യ ജീവിതത്തിന് മാസങ്ങളുടെ മാത്രം ആയുസേ ഉണ്ടായിരുന്നുള്ളൂ.

ദിവ്യയുടെ മരണത്തിന് ശേഷം ഒരു മകന്റെ സ്ഥാനത്തു നിന്ന് ദിവ്യയുടെ അച്ഛനേയും അമ്മയേയും പരിചരിക്കുകയായിരുന്നു സാജിദ്. ഇന്നും ആ ബന്ധം അതുപോലെ തന്നെ തുടരുകയാണ് രണ്ട് കുടുംബങ്ങളും. വിശേഷ ദിവസങ്ങളില്‍ ഒരുമിച്ച് ചേരാറുമുണ്ട്. സാജിദ് പിന്നീട് മാധ്യമ പ്രവര്‍ത്തകയായ വാര്‍ദ ഖാനുമായി പ്രണയത്തിലാവുകയും 2000 നവംബര്‍ 18 ന് ഇരുവരും വിവാഹം കഴിക്കുകയും ചെയ്യുകയായിരുന്നു.