മകളെ പോലെയന്ന് പറഞ്ഞയാള്‍ക്ക് പ്രണയമായി, കരണത്തടിച്ചു, തല്ലി; കരിയര്‍ നശിപ്പിച്ചത് മഹേഷ് ഭട്ടെന്ന് പാക് നടി

തന്റെ ഫിലിം മേക്കിംഗ് കഴിവിന്റെ കാര്യത്തില്‍ ആര്‍ക്കും മഹേഷ് ഭട്ടിനെ ചോദ്യം ചെയ്യാനാതില്ല. നിരവധി താരങ്ങള്‍ക്ക് അദ്ദേഹം തന്റെ സിനിമകളിലൂടെ കരിയറില്‍ ബ്രേക്ക് നല്‍കിയിട്ടുണ്ട്. 2005 ല്‍ മഹേഷിന്റെ സിനിമയിലൂടെ ബോളിവുഡില്‍ അരങ്ങേറിയ നടിയാണ് മീര. പാക്കിസ്ഥാന്‍ താരമായിരുന്ന മീര. എന്നാല്‍ പിന്നീട് മഹേഷ് ഭട്ട് തന്നോട് പൊസീവ്‌നെസ് കാണിക്കുന്നതായി മീര തന്നെ ആരോപിക്കുകയായിരുന്നു. തന്നെ മര്‍ദ്ദിച്ചതായും മീര ആരോപിക്കുന്നുണ്ട്.

ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തിലായിരുന്നു മീരയുടെ ആരോപണം. മഹേഷ് ഭട്ട് കാരണമാണ് താന്‍ ബോളിവുഡ് ഉപേക്ഷിച്ചതെന്നും താന്‍ തിരികെ വരാന്‍ ശ്രമിച്ചപ്പോള്‍ മഹേഷ് ഭട്ട് അനുവദിച്ചില്ലെന്നും മീര പറയുന്നുണ്ട്. ആ വാക്കുകള്‍ വിശദമായി വായിക്കാം തുടര്‍ന്ന്.

''ആളുകള്‍ ഇതേക്കുറിച്ച് ഒരുപാട് എഴുതിയിട്ടുണ്ട്. പക്ഷെ ഞാന്‍ ഇനി നിശബ്ദയായിട്ടിരിക്കില്ല. ഇന്ന് ഞാന്‍ സത്യം പറയാന്‍ ആഗ്രഹിക്കുന്നു. സിനിമ ചെയ്യണ്ട എന്നത് എന്റെ തീരുമാനമായിരുന്നില്ല. പക്ഷെ എന്നോട് മഹേഷ് ജിയാണ് ഇന്ത്യയില്‍ നിന്നും പോകാന്‍ പറഞ്ഞത്. ഞാന്‍ പ്രശസ്തയാകുന്നതും മറ്റ് സംവിധായകരുമായി അടുക്കുന്നതോ അദ്ദേഹത്തിന് ഇഷ്ടമായിരുന്നില്ല. ഒരിക്കല്‍ ഞങ്ങള്‍ വഴക്കിട്ടു. അദ്ദേഹം എന്നോട് മാപ്പ് ചോദിക്കുകയും ചെയ്തു'' എന്നാണ് മീര പറയുന്നത്.

''അതിന് ശേഷം എനിക്ക് നിന്റെ പ്രശ്‌നങ്ങള്‍ കൈകാര്യം ചെയ്യാനാകില്ലെന്നും നീ പാക്കിസ്ഥാനിലേക്ക് തന്നെ തിരികെ പോകുന്നതായിരിക്കും നല്ലതെന്നും മഹേഷ് പറഞ്ഞു. ഞാന്‍ പോയി. ഞാന്‍ തിരിച്ചുവരാന്‍ നോക്കിയപ്പോള്‍ അവര്‍ അനുവദിച്ചില്ല. ഇപ്പോള്‍ എനിക്ക് ബോളിവുഡിലേക്ക് വരാനൊരു വഴിയുമില്ല. എന്റെ വഴികളൊക്കെ അദ്ദേഹം അടച്ചു'' എന്നും മീര പറഞ്ഞിരുന്നു.

''ഞാന്‍ പ്രശസ്തയാകുന്നതിന്റെ അസൂയയായിരുന്നു അദ്ദേഹത്തിനെന്നാണ് ഞാന്‍ കരുതുന്നത്. ഞാന്‍ മറ്റേതെങ്കിലും സംവിധായകരുടെ കൂടെ പ്രവര്‍ത്തിക്കുന്നത് അദ്ദേഹം ഇഷ്ടപ്പെട്ടിരുന്നില്ല. രാം ഗോപാല്‍ വര്‍മ, മണി രത്‌നം, സുഭാഷ് ഗായ്, തുടങ്ങിയവരില്‍ നിന്നൊക്കെ എനിക്ക് ഓഫറുകള്‍ വന്നിരുന്നു. അദ്ദേഹം അതൊന്നും സമ്മതിച്ചില്ല. അദ്ദേഹത്തിനൊപ്പം മാത്രമേ സിനിമ ചെയ്യാവൂ എന്നായിരുന്നു. ഒരു രാത്രി, എനിക്ക് സുഭാഷ് ഗായിയെ കാണേണ്ടതുണ്ടായിരുന്നു. ഞാന്‍ അതേക്കുറിച്ച് പറഞ്ഞപ്പോള്‍ ദേഷ്യം പിടിച്ച മഹേഷ് എന്നെ തല്ലി. മൂന്ന് തവണയാണ് കരണത്തടിച്ചത്'' എന്നും താരം പറഞ്ഞു.

ഒരിക്കല്‍ മഹേഷ് തന്നോട് താല്‍പര്യമുള്ളതായി അറിയിച്ചെന്നും തന്നെ സ്‌പെഷ്യല്‍ എന്ന് വിളിച്ചതായും മീര പറയുന്നുണ്ട്. ആദ്യം താനും മകള്‍ പൂജയും തനിക്ക് ഒരുപോലെയാണെന്നായിരുന്നു പറഞ്ഞിരുന്നത്. പിന്നെ പറഞ്ഞു എനിക്ക് നിന്നെ ഭയങ്കര ഇഷ്ടമാണ്, നീ സ്‌പെഷ്യല്‍ ആണെന്ന്. അദ്ദേഹം എന്നില്‍ നിന്നും എന്തായിരുന്നു പ്രതീക്ഷിച്ചിരുന്നതെന്ന് എനിക്ക് മനസിലാക്കാന്‍ സാധിച്ചിരുന്നില്ലെന്നും മീര പറയുന്നു.

മഹേഷിന്റെ ഭാര്യയായ നടി സോണി രാസ്ദാന്‍ സംവിധാനം ചെയ്ത സിനിമയായിരുന്നു നസര്‍. പിന്നീട് കുറച്ച് സിനിമകള്‍ ബോളിവുഡില്‍ ചെയ്തുവെങ്കിലും മീര പാക്കിസ്ഥാനിലേക്ക് മടങ്ങുകയായിരുന്നു. താരം പാക് സിനിമകളിലും ടെലിവിഷന്‍ ഷോകളിലുമെല്ലാം സജീവമാണ്.