കാശുകാരല്ല, കാറില്ലായിരുന്നുവെന്ന് പരിനീതി; താരത്തിന്റെ നുണക്കഥ പൊളിച്ച് സഹപാഠി രംഗത്ത്!

ഒരിക്കല്‍ അക്ഷയ് കുമാറിനൊപ്പം ഒരു പരിപാടിയില്‍ പങ്കെടുത്ത് സംസാരിക്കുകയായിരുന്നു പരിനീതി. കുട്ടികളോട് സംസാരിക്കുന്നതിനിടെ താരം അവര്‍ക്ക് പ്രചോദനം നല്‍കാനായി തന്റെ ജീവിതത്തെക്കുറിച്ച് സംസാരിക്കുകയായിരുന്നു. തന്റെ കുട്ടിക്കാലത്ത് കുടുംബത്തിന്റെ സാമ്പത്തിക സ്ഥിതി മോശമായിരുന്നുവെന്നും തനിക്ക് ചെറുപ്പത്തില്‍ സ്‌കൂളിലേക്ക് പോകുന്ന വഴിയില്‍ വച്ച് ചിലരില്‍ നിന്നും മോശം അനുഭവം നേരിടേണ്ടി വന്നിരുന്നുവെന്നുമായിരുന്നു പരിനീതി പറഞ്ഞത്. എന്നാല്‍ താരം പറയുന്നത് നുണയാണെന്ന് ആരോപിച്ചു കൊണ്ട് പരിനീതി പഠിച്ച സ്‌കൂളിലെ സഹപാഠിയായ യുവാവ് രംഗത്ത് എത്തുകയായിരുന്നു. കന്നു ഗുപ്ത എന്ന യുവാവാണ് ഫെയ്‌സ്ബുക്ക് പോസ്റ്റിലൂടെ താരത്തിനെതിരെ രംഗത്ത് എത്തിയത്.

പോസ്റ്റ് വൈറലായതോടെ പരിനീതി തന്നെ വിശദീകരണവുമായി രംഗത്ത് എത്തുകയുണ്ടായി. ഇത്തരം ചെറിയ സംഭവങ്ങളെ ചര്‍ച്ചയാക്കരുതെന്നും താന്‍ പറയാന്‍ ഉദ്ദേശിച്ചത് സ്ത്രീസുരക്ഷയെക്കുറിച്ചും പെണ്‍കുട്ടികള്‍ നേരിടേണ്ടി വരുന്ന വെല്ലുവിളികളെക്കുറിച്ചുമായിരുന്നു എന്നായിരുന്നു പരിയുടെ പ്രതികരണം. ''ഞാന്‍ വരുന്നത് ഒരു കൊച്ചു പട്ടണമായ അമ്പാലയില്‍ നിന്നുമാണ്. ഒരുപാട് വെല്ലുവിളികള്‍ നേരിട്ടാണ് വളര്‍ന്നത്. ഞങ്ങളുടേത് സാമ്പത്തികമായ മികച്ചൊരു കുടുംബമായിരുന്നില്ല. ഞാന്‍ സ്‌കൂളില്‍ പോയിരുന്നത് സൈക്കിളിലായിരുന്നു. ഞങ്ങളുടെ പക്കല്‍ കാറോ ഡ്രൈവറോ ഉണ്ടായിരുന്നില്ല. ഞാന്‍ ഈവ് ടീസിംഗ് നേരിട്ടിട്ടുണ്ട്. അത് കാരണം ഒരു ദിവസം എന്റെ അച്ഛന്‍ എന്റെ കൂടെ സ്‌കൂളിലേക്ക് വന്നു. എന്നെ എന്തിനാണ് സൈക്കിളില്‍ സ്‌കൂളിലേക്ക് പറഞ്ഞ് വിടുന്നതെന്ന് ഞാന്‍ വീട്ടുകാരോട് ചോദിക്കുമായിരുന്നു. ഇന്ന് ഞങ്ങള്‍ക്ക് സെല്‍ഫ് ഡിഫന്‍സ് ക്ലാസില്‍ പോകാനുള്ള പണമുണ്ടായിരുന്നില്ല'' എന്നായിരുന്നു പരിനീതി നേരത്തെ പറഞ്ഞത്.

എന്നാല്‍ ഇത് നുണയാണെന്നായിരുന്നു സഹപാഠിയുടെ ആരോപണം. പരിനീതി നുണ പറയുകയാണ്. സെലിബ്രിറ്റിയെന്നാല്‍ ഇതാണെന്ന് തോന്നുന്നു. പണമില്ലെന്നും കാറില്ലെന്നും കഥയുണ്ടാക്കുകയാണ്. അതേ സ്‌കൂളില്‍ പഠിച്ച എനിക്ക് പരിനീതിയുടെ അച്ഛന്റെ കാര്‍ വരെ ഓര്‍മ്മയുണ്ട്. അന്ന് സൈക്കിളില്‍ സ്‌കൂളില്‍ പോകുന്നത് ട്രെന്റായിരുന്നു. അതുമൊരു പ്രിവിലേജായിരുന്നു. എല്ലാവര്‍ക്കുമുണ്ടായിരുന്നില്ല. സ്‌കൂളില്‍ നിന്നുമുള്ള എന്റെ കൂട്ടുകാര്‍ക്ക് ഈ നുണകള്‍ കുറേക്കൂടി മനസിലാക്കാന്‍ സാധിക്കും. എന്നായിരുന്നു ഗുപ്തയുടെ ആരോപണം. ഇത് വൈറലായി മാറിയതോടെ പരിനീതി ചോപ്ര പ്രസ്താവനയിലൂടെ തന്റെ ഭാഗം വിശദീകരിച്ചു കൊണ്ട് രംഗത്ത് എത്തുകയായിരുന്നു.

വീട്ടുകാരെ വിഷമിപ്പിക്കാന്‍ വയ്യ, കാത്തിരുന്നത് ഒരു വര്‍ഷം; വിവാഹ ശേഷം മനസ് തുറന്ന് അപ്‌സര

Recommended Video

ബോളിവുഡ് താര ദമ്പതികളും, പ്രണയ കഥയും | FilmiBeat Malayalam

തന്റെ അച്ഛന് കാറുണ്ടായിരുന്നുവെന്നും എന്നാല്‍ അത് അച്ഛന് ഓഫീസില്‍ പോകാന്‍ മാത്രമുള്ളതായിരുന്നുവെന്നും തന്നേയും സഹോദരന്മാരേയും കാറില്‍ സ്‌കൂളില്‍ പോകാന്‍ സമ്മതിക്കുമായിരുന്നില്ലെന്നും സൈക്കിളില്‍ പോകുന്നത് താന്‍ ഇഷ്ടപ്പെട്ടിരുന്നില്ലെന്നുമായിരുന്നു പരിനീതിയുടെ വിശദീകരണം. താന്‍ പറഞ്ഞതിന്റെ അര്‍ത്ഥം മൊത്തം നഷ്ടപ്പെടുത്തുന്നതാണ് ഈ ആരോപണവും ചര്‍ച്ചയുമെന്നും പരിനീതി പറഞ്ഞിരുന്നു.