ഷാരൂഖ് ഖാനെ ചവിട്ടി നിലത്തിട്ട ഏക നടി ഞാനാണ്! വെളിപ്പെടുത്തലുമായി താരം

കഴിഞ്ഞ് മൂന്ന് പതിറ്റാണ്ടായി ഷാരൂഖ് ഖാനോളം, ഇന്ത്യന്‍ ജനതയെ സ്വാധീനിച്ച മറ്റൊരു താരമുണ്ടാകില്ല. സിനിമയില്‍ നിന്നും വിട്ടു നിന്ന നാല് കൊല്ലത്തില്‍ പോലും അദ്ദേഹത്തിന്റെ താരമൂല്യത്തില്‍ ഇടിവു വന്നിട്ടില്ല. ഇടയ്ക്ക് ചില സിനിമകളില്‍ അഞ്ച് മിനുറ്റ് മാത്രമുള്ള അതിഥി വേഷങ്ങളില്‍ മാത്രം അഭിനയിച്ച് ആ സിനിമകളിലെ ഏറ്റവും വലിയ ചര്‍ച്ചാ വിഷയമായി മാറാനും ഷാരൂഖിന് സാധിച്ചു. ആ സിംഹാസനത്തിന്, ഇനിയുമെത്ര കാലം സിനിമകള്‍ ചെയ്തില്ലെങ്കില്‍ പോലും ഒരു ഇളക്കവും സംഭവിക്കാന്‍ പോകുന്നില്ല.

തനിക്കൊപ്പം അഭിനയിക്കുന്ന നായികമാരുമായി എന്നും നല്ല സൗഹൃദം കാത്തുസൂക്ഷിക്കുന്നയാളാണ് ഷാരൂഖ് ഖാന്‍. കജോള്‍ മുതല്‍ ദീപിക പദുക്കോണ്‍ വരെയുളളവര്‍ ഷാരൂഖ് ഖാനെക്കുറിച്ച് വാചാലരാകാറുണ്ട്. എന്നാല്‍ രസകരമായൊരു വസ്തുത, ഒരിക്കല്‍ തന്റെ സഹനടിയില്‍ നിന്നും ചവിട്ട് കിട്ടിയിട്ടുണ്ട് ഷാരൂഖ് ഖാന്. രസകരമായ ആ സംഭവം വിശദമായി വായിക്കാം തുടര്‍ന്ന്.

ഷാരൂഖ് ഖാന്‍ തന്റെ ബാദ്ഷാ എന്ന സിനിമയുടെ ചിത്രീകരണത്തിലായിരുന്നു അപ്പോള്‍. ചിത്രത്തില്‍ സോനു എന്ന കഥാപാത്രത്തെ അവതരിപ്പിച്ചത് കരിഷ്മ ജെയ്ന്‍ ചാജെര്‍ എന്ന ബാലതാരമായിരുന്നു. ചിത്രത്തിലൊരു ഘട്ടത്തില്‍ ചിലര്‍ സോനുവിനെ തട്ടിക്കൊണ്ടു പോകുന്നുണ്ട്. കുട്ടിയെ തട്ടിക്കൊണ്ടു പോയവരില്‍ നിന്നും രക്ഷിക്കുക എന്ന ലക്ഷ്യവുമായിട്ടാണ് ഷാരൂഖ് ഖാന്റെ ബാദ്ഷ എത്തുന്നത്. തുടര്‍ന്ന് നടന്ന രസകരമായ സംഭവം കരിഷ്മ ഒരു അഭിമുഖത്തില്‍ പറയുന്നുണ്ട്.

''എന്റെ ആദ്യത്തെ സീനില്‍ ഷാരൂഖ് എന്നെ രക്ഷിക്കുകയാണ്. അദ്ദേഹം എന്നെ എടുത്ത ശേഷം പടി കയറുന്നതായിരുന്നു രംഗം. അദ്ദേഹം എന്നെ കണ്ടിട്ടുണ്ടായിരുന്നില്ല. എനിക്ക് അത്യാവശ്യം ആരോഗ്യമുണ്ടായിരുന്നു. ആദ്യത്തെ ടേക്കില്‍ അദ്ദേഹം എന്നെ എടുത്തുവെങ്കിലും പകുതി ദൂരം മാത്രമേ കയറാന്‍ സാധിച്ചുള്ളൂ. പിന്നെ അദ്ദേഹം താഴെ വരികയും അബ്ബാസ് അങ്കിളിനോട് ഈ സീനൊന്ന് മാറ്റുമോ കുട്ടിയ്ക്ക് ഇത്തിരി ഭാരമുണ്ടെന്ന് പറഞ്ഞു. പിന്നെയൊരു രംഗം എഡിറ്റ് ചെയ്തുവെന്നാണ് എനിക്ക് തോന്നുന്നത്. ഞങ്ങള്‍ നാലഞ്ച് തവണ പ്രാക്ടീസ് ചെയ്തുവെങ്കിലും ടൈമിംഗ് ശരിയാകുന്നുണ്ടായിരുന്നില്ല. ഒരു ടേക്കിനിടെ എനിക്ക് ബാലന്‍സ് നഷ്ടമാവുകയും ഞാന്‍ വീഴുകയും ചെയ്തു. എനിക്കൊപ്പം ഷാരൂഖ് ഖാനും വീണു. എന്റെ കാല് കൊണ്ട് അദ്ദേഹത്തിന് കുറച്ച് വേദനിക്കുകയും ചെയ്തു'' എന്നാണ് താരം പറയുന്നത്.

അതേസമയം ഷാരൂഖ് ഖാന്റെ തിരിച്ചുവരവിനായി കാത്തിരിക്കുകയാണ് ആരാധകര്‍. സിദ്ധാര്‍ത്ഥ് ആനന്ദ് ഒരുക്കുന്ന പഠാന്‍ എന്ന ചിത്രത്തിലൂടെയാണ് ഷാരൂഖ് ഖാന്‍ തിരികെ വരുന്നത്. ചിത്രത്തിന്റെ ടീസര്‍ ഇന്നലെ ആരാധകര്‍ക്കുള്ള പിറന്നാള്‍ സമ്മാനമായി റിലീസ് ചെയ്തിരുന്നു. ദീപിക പദുക്കോണും ജോണ്‍ എബ്രഹാമുമാണ് ചിത്രത്തിലെ മറ്റ് പ്രധാന താരങ്ങള്‍. പിന്നാലെ രാജ്കുമാര്‍ ഹിറാനിയൊരുക്കുന്ന ഡങ്കി, ആറ്റ്‌ലിയുടെ ജവാന്‍ എന്നീ സിനിമകളും ഷാരൂഖ് ഖാന്റേതായി അണിയറയിലുണ്ട്.