അവന് വേണ്ടി എന്റെ പൈജാമ വില്‍ക്കാന്‍ വരെ ഞാന്‍ തയ്യാറാണ്; ധോണിയെക്കുറിച്ച് ഷാരൂഖ് പറഞ്ഞത്

2018 ലായിരുന്നു സംഭവം. ഐപിഎല്‍ പതിനൊന്നാം സീസണിന് മുന്നോടിയായുള്ള ലേലം നടക്കുകയായിരുന്നു. തങ്ങളുടെ ടീമിലേക്ക് ഏറ്റവും മികച്ച താരങ്ങളെ തന്നെ എത്തിക്കുക എന്ന ലക്ഷ്യത്തോടെയായിരുന്നു ടീമുടമകളും മാനേജുമെന്റുമെല്ലാം ലേലത്തില്‍ പങ്കെടുത്തത്. ഈ സമയത്താണ് ധോണിയെ ഏന്ത് വില കൊടുത്തും കൊല്‍ക്കത്തയിലെത്തിക്കണമെന്ന ഷാരൂഖിന്റെ രസകരമായ പ്രസ്താവന. സ്‌പോര്‍ട്‌സ് വാലയ്ക്ക് നല്‍കിയ അഭിമുഖത്തിലായിരുന്നു ഷാരൂഖ് മനസ് തുറന്നത്.

എംഎസ് ധോണിയെ വാങ്ങാന്‍ വേണ്ടി ഞാന്‍ എന്റെ പൈജാമ വരെ വില്‍ക്കാന്‍ തയ്യാറാണ്. പക്ഷെ അദ്ദേഹം ലേലത്തില്‍ വരണ്ടേ എന്നായിരുന്ന തന്റേതായ ശൈലിയില്‍ ഷാരൂഖ് പറഞ്ഞത്. താരത്തിന്റെ വാക്കുകള്‍ മാധ്യമങ്ങളും ധോണി ആരാധകരുമെല്ലാം ഒരുപോലെ ആഘോഷിക്കുകയും ചെയ്തു. ഇതിഹാസതാരമായ ധോണിയെപ്പോലൊരു താരത്തെ സ്വന്തം ടീമില്‍ ലഭിക്കുക എന്നത് ഏതൊരു ടീമുടമയുടേയും ആഗ്രഹമാണ്. അതാണ് ഷാരൂഖിന്റെ തമാശയ്ക്ക് പിന്നിലെ വസ്തുത.

അതേസമയം സീറോയുടെ പരാജയത്തിന് ശേഷം അഭിനയത്തില്‍ നിന്നും വിട്ടു നില്‍ക്കുന്ന ഷാരൂഖ് തിരിച്ചുവരവിന് തയ്യാറെടുക്കുകയാണ്. ഉയരം കുറഞ്ഞ വ്യക്തിയായി ഷാരൂഖ് എത്തിയ ചിത്രമായിരുന്നു സീറോ. അനുഷ്‌ക ശര്‍മ, കത്രീന കൈഫ് എന്നിവരാണ് ചിത്രത്തിലെ മറ്റ് പ്രധാന വേഷങ്ങളിലെത്തിയത്. വലിയ പ്രതീക്ഷയോടെ വന്ന ചിത്രത്തിന് വിജയിക്കാന്‍ സാധിച്ചില്ല. ഇതോടെ ഷാരൂഖ് അഭിനയത്തില്‍ നിന്നും ഇടവേളയെടുക്കുകയായിരുന്നു.

Recommended Video

When Shah Rukh Khan confessed he attends award shows to communicate with his late parents

പഠാന്‍ എന്ന ചിത്രത്തിലൂടെയാണ് ഷാരൂഖ് തിരികെ വരുന്നത്. സിദ്ധാര്‍ത്ഥ് ആനന്ദ് ആണ് ചിത്രം സംവിധാനം ചെയ്യുന്നത്. ചിത്രത്തില്‍ വില്ലനായി എത്തുന്നത് ജോണ്‍ എബ്രഹാമാണ്. ദീപിക പദുക്കോണാണ് ചിത്രത്തിലെ നായിക. സല്‍മാന്‍ ഖാന്‍ ചിത്രത്തില്‍ അതിഥി വേഷത്തിലെത്തുന്നുണ്ടെന്നും റിപ്പോര്‍ട്ടുകള്‍ വ്യക്തമാക്കിയിരുന്നു. ആറ്റ്‌ലിയുടെ സിനിമ, രാജ്കുമാര്‍ ഹിറാനിയുടെ കുടിയേറ്റ കഥ പറയുന്ന ചിത്രം എന്നിവയും ഷാരൂഖിന്റേതായി അണിയറയില്‍ ഒരുങ്ങുന്നുണ്ട്.