അച്ഛന്‍ മരിച്ച് നാളുകള്‍ക്കുള്ളില്‍ സെറ്റില്‍ തിരിച്ചെത്തിയ ശ്രീദേവി; ഇതാണ് അവളുടെ വിജയ രഹസ്യം!

ഇന്ത്യന്‍ സിനിമയിലെ നിരവധി പ്രതിഭകള്‍ക്കൊപ്പം പ്രവര്‍ത്തിച്ചിട്ടുണ്ട് ശ്രീദേവി. കോമഡി കൈകാര്യം ചെയ്യുന്നതില്‍ മികവ് പുലര്‍ത്തിയിരുന്ന അപൂര്‍വ്വം നടിമാരില്‍ ഒരാളായിരുന്നു ശ്രീദേവി എന്നതും അവരുടെ കരിയറിനെ ശ്രദ്ധേയമാക്കുന്ന ഒന്നാണ്. ഒരിക്കല്‍ ശ്രീദേവിയുടെ വിജയത്തിന് പിന്നിലെ രഹസ്യത്തെക്കുറിച്ച് ബോളിവുഡിലെ ഐക്കോണിക് ഫിലിം മേക്കറായ യാഷ് ചോപ്ര സംസാരിച്ചിരുന്നു.

തന്റെ അച്ഛന്റെ മരണത്തിന് ദിവസങ്ങള്‍ പിന്നാലെ സെറ്റിലേക്ക് തിരികെ എത്തിയ ശ്രീദേവിയെ അദ്ദേഹം ഓര്‍ക്കുന്നുണ്ട്. അതുമൊരു കോമഡി രംഗമായിരുന്നു അഭിനയിക്കാനുണ്ടായിരുന്നത്. ലംഹേ എന്ന ചിത്രത്തെക്കുറിച്ചാണ് അന്ന് യാഷ് ചോപ്ര സംസാരിച്ചത്. അഭിനയകലയോട് ശ്രീദേവി കാണിക്കുന്ന പ്രൊഫഷണലിസമാണ് അവരുടെ വിജയത്തിന് പിന്നിലെ കാരണമെന്നാണ് യാഷ് ചോപ്ര പറഞ്ഞത്. ആ വാക്കുകള്‍ വിശദമായി വായിക്കാം തുടര്‍ന്ന്.

കരണ്‍ ജോഹറിനോട് സംസാരിക്കവെയാണ് യാഷ് ചോപ്ര മനസ് തുറക്കുന്നത്. ലംഹേയുടെ ചിത്രീകരണം ലണ്ടനില്‍ വച്ച് നടക്കുകയായിരുന്നു. അപ്പോഴാണ് നാട്ടില്‍ നിന്നും ശ്രീദേവിയുടെ അമ്മ വിളിക്കുന്നതും താരത്തിന്റെ അച്ഛന്‍ മരിച്ചതായി അറിയിക്കുന്നതും. ആ വിവരം ശ്രീദേവിയെ അറിയാക്കാനുള്ള ഉത്തരവാദിത്തം യാഷ് ചോപ്രയ്ക്കായിരുന്നു നല്‍കപ്പെട്ടത്. എന്നാല്‍ അച്ഛന്‍ മരിച്ചുവെന്ന് പറയാനുള്ള ധൈര്യം ഇല്ലായിരുന്നു അദ്ദേഹത്തിന്. പകരം അച്ഛന് തീരെ സുഖമില്ലെന്നും ഉടനെ നാട്ടിലെത്തണമെന്ന് മാത്രമായിരുന്നു യാഷ് ചോപ്ര പറയുന്നത്.

പിറ്റേദിവസം ചെന്നൈയില്‍ എത്തുമ്പോള്‍ മാത്രമാണ് തന്റെ അച്ഛന്‍ മരിച്ചുവെന്ന വിവരം ശ്രീദേവി അറിയുന്നത്. മൂന്ന് നാല് ദിവസം കഴിഞ്ഞതും ശ്രീദേവി യാഷ് ചോപ്രയെ ഫോണ്‍ വിളിക്കുകയായിരുന്നു. ''ചടങ്ങുകള്‍ ഉള്ളതിനാല്‍ പതിനാറ് ദിവസത്തേക്ക് എനിക്ക് വരാനാകില്ലെന്നാണ് അവള്‍ പറഞ്ഞത്. അവള്‍ എത്ര ദിവസം കഴിഞ്ഞ് വന്നാലും കാത്തിരിക്കാന്‍ ഒരുക്കമാണെന്ന് ഞാന്‍ പറഞ്ഞിരുന്നു. കാരണം ബാക്കിയുള്ള ഭാഗം അവിടെ വച്ചല്ലാതെ തീര്‍ക്കാന്‍ സാധിക്കില്ലായിരുന്നു'' യാഷ് ചോപ്ര പറയുന്നു.

പറഞ്ഞതുപോലെ തന്നെ പതിനാറ് ദിവസം കഴിഞ്ഞതും ശ്രീദേവി തിരിച്ചെത്തുകയായിരുന്നു. തിരികെ വന്ന ശേഷം താന്‍ ശ്രീദേവിയോട് അഭിനയിക്കാന്‍ മാനസികമായും ശാരീരികമായും തയ്യാറായാണോ എന്ന് താന്‍ ചോദിച്ചിരുന്നുവെന്നും യാഷ് ചോപ്ര പറയുന്നുണ്ട്. ''ശ്രീ, നീ മാനസികമായും ശാരീരികമായും നാളെ ഷൂട്ട് ചെയ്യാന്‍ തയ്യാറാണോ എന്ന് ചോദിച്ചിരുന്നു. ഞാന്‍ ഷൂട്ട് ചെയ്യുന്നതിന് മാത്രമാണ് വന്നത്. എനിക്ക് പ്രശ്‌നമൊന്നുമില്ല എന്നാണ് അവള്‍ പറഞ്ഞത്'' യാഷ് ചോപ്ര പറയുന്നു.

അടുത്ത ദിവസം ശ്രീദേവിയെ വച്ച് ഷൂട്ട് ചെയ്യാനുണ്ടായിരുന്നത് വഹീദ റഹ്‌മാനൊപ്പമായിരുന്നു രംഗം ചെയ്യാനിരുന്നത്.'' അടുത്ത ദിവസം ഞാന്‍ അവളോട് പറഞ്ഞു, രണ്ട് രംഗം വഹീദ ജിയൂടെ കൂടെയാണ് ചെയ്യാനുള്ളത്. അവര്‍ 16 ദിവസമായി ഈ രംഗത്തിനായി കാത്തിരിക്കുകയായിരുന്നു. ഇതൊരു കോമഡി രംഗമായിരുന്നു. ഒരു കുഴപ്പവുമില്ല, അഭിനയം അഭിനയമാണ് എന്നവള്‍ പറഞ്ഞു. ചിത്രത്തിലെ ആ രംഗം അഭിനേതാവിന്റെ പ്രകടനത്തെ ആശ്രയിച്ചിരിക്കുന്നതായിരുന്നു. അവര്‍ അതിലേക്ക് ഒരുപാട് സംഭവാന നല്‍കിയിട്ടുണ്ട്'' എന്നും അദ്ദേഹം പറയുന്നുണ്ട്.

''അവള്‍ ആ സമയത്ത് വളരെ പ്രൊഫഷണലായിരുന്നു. ഗംഭീര ആര്‍ട്ടിസ്റ്റാണ്. ആ നിമിഷം അവര്‍ ബാക്കിയെല്ലാം മറന്നു. വളരെ മനോഹരമായി തന്നെ അവള്‍ ആ രംഗം ചെയ്തു. അപ്പോഴാണ് അവളുടെ വിജയത്തിന് പിന്നിലെ രഹസ്യം ഞാന്‍ മനസിലാക്കുന്നത്'' എന്നും അദ്ദേഹം കൂട്ടിച്ചേര്‍ക്കുന്നുണ്ട്.