'കോമ‍ഡി റോളുകൾ ചെയ്യാൻ താൽപര്യമുണ്ട് പക്ഷെ ആരും എന്നെ വിളിക്കുന്നില്ല'; നടൻ ഇന്ദ്രജിത്ത് സുകുമാരൻ!

ഇന്ദ്രജിത്തിന്റെ ആമേൻ സിനിമയിലെ ഫാദർ വിൻസെന്റ് വട്ടോളിക്ക് മാത്രം വലിയൊരു ഫാൻസുണ്ട് കേരളത്തിൽ. 2018ലെ വെള്ളപ്പൊക്ക സമയത്താണ് താൻ വെറുമൊരു നടൻ മാത്രമല്ല നല്ലൊരു മനുഷ്യസ്നേഹി കൂടിയാണെന്ന് മറ്റുള്ളവർക്ക് ഇന്ദ്രജിത്ത് മനസിലാക്കിക്കൊടുത്തത്. തന്റെ ഭാര്യ പൂർണിമ ഇന്ദ്രജിത്തിനൊപ്പം അൻപോട് കൊച്ചി എന്ന സംഘടനയോടൊപ്പം രാപ്പകലില്ലാതെ ഇന്ദ്രജിത്ത് ഒപ്പം നിന്നു. ഇന്ദ്രജിത്തിന്റെ ഏറ്റവും പുതിയ റിലീസാകാൻ പോകുന്ന സിനിമ നൈറ്റ് ഡ്രൈവാണ്. ഇന്ദ്രജിത്തിന് പുറമെ റോഷൻ മാത്യു, അന്നാ ബെൻ തുടങ്ങിയവരാണ് ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ഒരു ത്രില്ലർ സ്വഭാവമുള്ള ചിത്രമാണ് നൈറ്റ് ഡ്രൈവ് എന്നാണ് ചിത്രത്തിന്റേതായി പുറത്തിറങ്ങിയ ട്രെയിലർ സൂചിപ്പിക്കുന്നത്. വൈശാഖാണ് സിനിമയുടെ സംവിധായകൻ.

റിയാലിറ്റിയും കോമേഴ്സ്യൽ സംഭവങ്ങളും ഇടകലർത്തിയാണ് സിനിമ ഒരുക്കിയിരിക്കുന്നതെന്നും ട്രെയിലറിൽ നിന്നും വ്യക്തമാണ്. രഞ്ജിൻ രാജാണ് ചിത്രത്തിന്റെ സംഗീത സംവിധാനം നിർവഹിച്ചിരിക്കുന്നത്. ആൻ മെഗാ മീഡിയയുടെ ബാനറിലാണ് ചിത്രത്തിന്റെ നിർമാണം. അഭിലാഷ് പിള്ളയാണ് ചിത്രത്തിന്റെ തിരക്കഥ എഴുതിയിരിക്കുന്നത്. ഷാജി കുമാറാണ് ചിത്രത്തിന്റെ ഛായാഗ്രാഹണം നിർവഹിച്ചിരിക്കുന്നത്. നൈറ്റ് ഡ്രൈവിനെ കുറിച്ചും സിനിമാ ജീവിതത്തെ കുറിച്ചും ജിഞ്ചർ മീഡിയയ്ക്ക് നൽകിയ അഭിമുഖത്തിൽ തുറന്ന് പറഞ്ഞിരിക്കുകയാണ് ഇന്ദ്രജിത്ത് സുകുമാരൻ. 'ത്രില്ലർ സ്വഭാവമുള്ള സിനിമയാണ്. ഒരു രാത്രി നടക്കുന്ന സംഭങ്ങളാണ് സിനിമയുടെ കഥ. ഒരു വിഭാ​ഗത്തിന് വേണ്ടി മാത്രമുള്ള സിനിമയല്ല. എല്ലാവർക്കും കുടുംബസമേതം കാണാം.'

'ഇപ്പോൾ തുടരെ തുടരെ നിരവധി പൊലീസ് വേഷങ്ങളാണ് ചെയ്തുകൊണ്ടിരിക്കുന്നത്. എനിക്ക് കോമഡി കഥാത്രങ്ങൾ ചെയ്യാൻ ഒരുപാട് താൽപര്യമാണ്. പക്ഷെ പത്ത് സിനിമകൾ ചെയ്താൽ മാത്രമാണ് അതിൽ ഒരെണ്ണം ഇത്തരം കോമഡി റോളുള്ള സിനിമകൾ വരുന്നത്. അമർ അക്ബർ അന്തോണി ചെയ്ത സമയത്ത് അന്തോണി എന്ന കഥാപാത്രം ഏറെ ശ്രദ്ധിക്കപ്പെട്ടിരുന്നുവെങ്കിലും പക്ഷെ പിന്നീട് അത്തരത്തിലുള്ള റോളുകൾ വന്നിട്ടില്ല. ലോക്ക് ഡൗണിന് മുമ്പ് റാമിന്റെ ഷൂട്ടിങിന് വേണ്ടി ലണ്ടനിൽ പോകാൻ തയ്യാറെടുക്കുകയായിരുന്നു. പക്ഷെ ലോക്ക് ഡൗൺ കാരണം അതെല്ലാം മുടങ്ങി. ജൂൺ‌, ജൂലൈ ആകുമ്പോൾ ചിത്രീകരണം വീണ്ടും തുടങ്ങുമെന്നാണ് അറിയിച്ചിരിക്കുന്നത്' ഇന്ദ്രജിത്ത് സുകുമാരൻ പറയുന്നു.