'എന്നേക്കാൾ ഒരുപടി മുകളിൽ അഭിനയിക്കുന്ന സ്ത്രീ ആയിരുന്നു'; കെ പി എ സി ലളിതയെ ഓർത്ത് ഇന്നസെന്റ്

മലയാള സിനിമയിൽ തന്നോടൊപ്പം അഭിനയിച്ചിട്ടുള്ളവരിൽ ഒരുപിടി മുകളിൽ അഭിനയിക്കുന്ന സ്ത്രീയാണ് കെ പി എ സി ലളിത എന്നാണ് ഇന്നസെന്റ് പറയുന്നത്. തങ്ങൾ ഒരുപാട് സിനിമകളിൽ ഭാര്യ ഭർത്താക്കന്മാരായി വേഷമിട്ടുണ്ടെന്നും എവിടെ ചെന്നാലും തനിക്ക് നായിക കെ പി എ സി ലളിത തന്നെ ആയിരിക്കും എന്നും ഇന്നസെന്റ് പറയുന്നു.

'ഏത് ലൊക്കേഷനിൽ ചെന്നാൽ ഞാൻ ഇങ്ങനെ നോക്കും. ആരാണ് എന്റെ നായികയെന്ന്. ഒരു പുതുമ ഉണ്ടോ എന്ന് അറിയാനുള്ള നോട്ടമാണ്. മറ്റൊന്നുമല്ല. അപ്പോഴാണ് അറിയുക കെ പി എ സി ലളിത ആണെന്ന്. അങ്ങനെ ഞാൻ ഒരിക്കെ കെ പി എ സി ലളിത കേൾക്കവേ നെടുമുടി വേണുവിനോട് നേരം പോക്കിന് പറഞ്ഞു, എവിടെ ചെന്നാലും ഈ ലളിത തന്നെ നമ്മുടെ ഭാര്യ. നമ്മുടെ മനസിൽ ഉർവശിയും മഞ്ജു വാര്യരും നവ്യ നായരും ഒക്കെ ആണ്. ആർക്കായാലും വിഷമമുണ്ടാവില്ലേ.'

'അപ്പോൾ നെടുമുടി വേണു എന്നോട് പറഞ്ഞു, ഉണ്ടാവും ചിലർക്ക് ഒക്കെ ഉണ്ടാവുമെന്ന്. അത് ലളിത കേട്ടു. പിന്നീട് ഞാൻ ഒരു പടത്തിന് ചെന്നപ്പോൾ അവിടെ കുറെ നടിമാർ ഉൾപ്പടെ ഉണ്ടായിരുന്നു ഞൻ അവരോട് ഒക്കെ വർത്തമാനം പറഞ്ഞു. പക്ഷെ ലളിതയെ കാണാനില്ല. എനിക്ക് ഭാര്യ ഉണ്ടെന്ന് അസിസ്റ്റന്റ് ഡയറക്ടർ വന്ന് പറഞ്ഞിരുന്നു. ഞാൻ അപ്പോൾ മറ്റാരെങ്കിലും ആയിരിക്കും അതെന്ന് കരുതി.'

'അങ്ങനെ ഇരിക്കെ, ആ സീൻ തുടങ്ങാറായപ്പോൾ വാതിലും തുറന്ന് ഒരാൾ വരികയാണ്, മുടിയൊക്കെ നരപ്പിച്ചിട്ട്. എന്നിട്ട് എന്നോട് പറയുകയാണ് ഞാൻ തന്നെയാണ് ഇത്തവണയും ഭാര്യയെന്ന്, നോക്കിയപ്പോ അത് കെ പി എ സി ലളിതയാണ്. എന്നിട്ട് എന്നോട് ചോദിച്ചു, അല്ലടോ താൻ എന്താണ് ഈ പറയണേ, തനിക്ക് ആരെ വേണമെന്നാണ്, മഞ്ജു വാര്യരോ അതോ നവ്യ നായരോ, ഇപ്പോ തനിക്ക് നല്ല പ്രായം ഉണ്ട്.. ഞാൻ ഇനി വെല്ല ചെറുപ്പക്കാരുടെയും ഒപ്പം അഭിനയിക്കണമോ എന്ന് ആലോചിച്ചു നിൽക്കുകയാണ് എന്ന് ലളിത പറഞ്ഞു' ഇന്നസെന്റ് ഓർത്തു.

Recommended Video

മലയാളികൾക്ക് ആരായിരുന്നു KPAC ലളിത? | KPAC Lalitha Biography | Filmibeat Malayalam

'രണ്ടു പേർ നല്ല ജോഡികൾ ആണെങ്കിൽ ആ കഥാപാത്രങ്ങൾ നന്നാവും. രസമുണ്ടാകും. അങ്ങനെ ഒരുപാട് കഥാപാത്രങ്ങളെ ഞാനും ലളിതയും ചേർന്ന് അവതരിപ്പിച്ചിട്ടുണ്ട്. കൂടെ അഭിനയിക്കുന്ന ആൾ നന്നായാൽ മാത്രമേ നമ്മളും നന്നാവൂ എന്ന് മനസിലായത് ലളിതയുടെ ഒപ്പം അഭിനയിച്ചപ്പോഴാണ്' ഇന്നസെന്റ് പറഞ്ഞു.