ഷൂട്ടിനിടയിൽ പല അപകടങ്ങളും!, ഞാൻ ഗന്ധർവ്വൻ ചെയ്തില്ലായിരുന്നെങ്കിൽ പത്മരാജൻ ഇന്നും ഉണ്ടായേനെയെന്ന് നടൻ

ഇന്നും സിനിമാ പ്രേമികൾ ചർച്ച ചെയ്യുന്ന പത്മരാജൻ സിനിമകളിൽ ഒന്നാണ് ഞാൻ ഗന്ധർവ്വൻ. നിരവധി പ്രേക്ഷക പ്രശംസ നേടിയ സിനിമയെ കുറിച്ച് ചിത്രത്തിൻ്റെ സഹ സംവിധായകനും നടനുമായ പൂജപ്പുര രാധാകൃഷ്ണൻ പറഞ്ഞ വാക്കുകളാണ് ശ്രദ്ധേനേടുന്നത്.

ഞാൻ ഗന്ധർവ്വൻ ചെയ്തില്ലായിരുന്നുവെങ്കിൽ പത്മരാജൻ ഇന്നും നമ്മോടൊപ്പം ഉണ്ടായേനെയെന്നാണ് പൂജപ്പുര രാധാകൃഷ്ണൻ പറഞ്ഞത്. മാസ്റ്റർ ബിൻ ചാനലിന് നൽകിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്. ചിത്രത്തിന്റെ ഷൂട്ടിങ് സമയത്ത് അടക്കം നിരവധി തടസങ്ങൾ നേരിട്ടു എന്നാണ് അദ്ദേഹം പറയുന്നത്. എന്നാൽ അതൊന്നും കണക്കിലെടുക്കാതെ പത്മരാജൻ ഷൂട്ടിങ്ങുമായി മുന്നോട്ട് പോയെന്ന് അദ്ദേഹം പറയുന്നു.

'നിരവധി തടസ്സങ്ങൾ നേരിട്ട ചിത്രമായിരുന്നു 'ഞാൻ ​ഗന്ധർവ്വൻ'. കഥ പറഞ്ഞപ്പോൾ മുതൽ പലരും അദ്ദേഹത്തോട് പറഞ്ഞതാണ് അ​ങ്ങനെയൊരു ചിത്രം ചെയ്യരുതെന്ന്, പക്ഷേ അദ്ദേഹം കേട്ടില്ലെന്ന് പറയുന്നതാണ് സത്യം. എല്ലാ കാര്യങ്ങളും ശരിയാക്കി നായകനായി നിശ്ചയിച്ച നിദീഷിനെ കാണാൻ ബോബെെയ്ക്ക് പോകുന്ന വഴി വണ്ടിയിൽ പരുന്തിടിച്ച് ആദ്യ യാത്ര മുടങ്ങിയിരുന്നു.'

'പിന്നീട് നിർമ്മാതാവായെത്തിയ ആൾ പിൻമാറി. അങ്ങനെ തുടക്കം മുതൽ നിരവധി പ്രശ്നങ്ങളാണ് നേരിട്ടിരുന്നത്. അതുപോലെ തന്നെ ഷൂട്ടിങ്ങിനിടയിൽ പല അഭിനേതാക്കൾക്കും ചെറുതും വലുതുമായ പല അപകടങ്ങളും സംഭവിച്ചിരുന്നു. ആദ്യം എനിക്ക് അതിലൊന്നും ഒന്നും തോന്നിയില്ലെങ്കിലും പിന്നീട് ചിത്രത്തിന്റെ ക്ലെെമാക്സിനിടയിൽ എന്തോ ഒരു ശക്തിയുണ്ടെന്ന തോന്നലുണ്ടായി. ഒരു പക്ഷേ ഞാൻ ഗന്ധർവ്വൻ ചെയ്തില്ലായിരുന്നുവെങ്കിൽ പത്മരാജൻ ഇന്നും നമ്മോടൊപ്പം ഉണ്ടായേനെ.' പൂജപ്പുര രാധാകൃഷ്‍ണൻ പറഞ്ഞു.