ഒമ്പത് മണിയൊക്കെ അവൾക്ക് അർധരാത്രിയാണ്; ടൂർ പോകുമ്പോഴും ഭാര്യക്ക് അമ്പലം മതി; വീട്ടുവിശേഷങ്ങളുമായി വിജയ് ബാബു

ടെലിവിഷൻ രം​ഗത്ത് നിന്നും സിനിമയിലേക്കെത്തി വിജയം കൈവരിച്ച താരമാണ് വിജയ് ബാബു. മലയാള സിനിമയിലെ പ്രമുഖ നിർമാതാവും താരവുമെല്ലാമാണ് ഇന്ന് വിജയ് ബാബു. മങ്കിപെൻ, ആട്, ഹോം തുടങ്ങി ഒരുപിടി ജനപ്രീയ സിനിമകളിൽ അദ്ദേഹം നിർമ്മിച്ചിട്ടുണ്ട്. കരിയറിലെ ഉയർച്ചകൾക്കിടയിലും പല വിവാദങ്ങളും വിജയ് ബാബുവിന്റെ പേരിലുണ്ടായി. നിർമാതാവ് സാന്ദ്ര തോമസുമായുണ്ടായ പ്രശ്‍നങ്ങൾ മുതൽ യുവ നടി ഉന്നയിച്ച ആരോപണങ്ങൾ വരെ ഇതിൽ പെടുന്നു.

അതേസമയം ആരോപണങ്ങളൊന്നും വിജയ് ബാബുവിന്റെ കരിയറിനെ വലിയ രീതിയിൽ ബാധിച്ചിട്ടില്ല. നടനായും നിർമാതാവായുമെല്ലാം ഇപ്പോഴും സിനിമയിൽ നിറഞ്ഞു നിൽക്കുകയാണ് താരം. അതിനിടെ വിജയ് ബാബുവിന്റെ വീട്ടുവിശേഷങ്ങളും ശ്രദ്ധനേടുകയാണ്. കഴിഞ്ഞ ദിവസം ബിഹൈൻഡ്വുഡ്‌സ് പുറത്തുവിട്ട ഹോം ടൂർ വീഡിയോയിലാണ് വിജയ് ബാബു തന്റെ വിശേഷങ്ങൾ പങ്കുവച്ചിരിക്കുന്നത്.

ഓണത്തിന് പുതിയൊരു തുടക്കുമുണ്ടാകുമെന്ന് വിജയ് ബാബു പറയുന്നു. ഓണം കഴിയുമ്പോൾ താനും കുടുംബവും പുതിയൊരു വീട്ടിലേക്ക് മാറുമെന്നാണ് താരം പറയുന്നത്. അതിനിടെ ഇപ്പോൾ താമസിക്കുന്ന, നിറയെ പെറ്റ്സും, അലങ്കാരപ്പണികളുമൊക്കെയുള്ള വീടിന്റെ വിശേഷങ്ങളാണ് വീഡിയോയിൽ പങ്കുവയ്ക്കുന്നത്. ഭാര്യയും മകനും അടങ്ങുന്നതാണ് വിജയ് ബാബുവിന്റെ കുടുംബം ഇവർക്കൊപ്പം ഒരു നായയും വീട്ടിലുണ്ട്.

ഏകമകനാണ് വിജയ്ക്ക്. അച്ഛനുമായി നല്ല അറ്റാച്ഡ്ഡാണ് മകനെന്ന് വിജയ് പറയുന്നു. ഇപ്പോൾ പ്ലസ് വൺ വിദ്യാർത്ഥിയായ മകനെ ഉണ്ണി എന്നാണ് വിജയ് വിളിക്കുന്നത്. മകനെ സ്വന്തം സിനിമയിൽ അഭിനയിപ്പിക്കുമോ എന്ന ചോദ്യത്തിന് ഒരിക്കലും ഇല്ല എന്നായിരുന്നു മകന്റെ മറുപടി.

'ഒരിക്കലും എന്റെ പേരുകൊണ്ട് നീ സിനിമയിൽ കയറില്ലെന്ന് അച്ഛൻ എന്നോട് പറഞ്ഞിട്ടുണ്ട്. സ്വന്തം കഴിവ് കൊണ്ട് കയറണം എന്നാണ് അച്ഛൻ പറഞ്ഞിട്ടുള്ളത്. ചൈൽഡ് ആർട്ടിസ്റ്റ് ആയി അഭിനയിക്കുന്നതിനെ കുറിച്ച് പറഞ്ഞപ്പോൾ സമയം ആയിട്ടില്ലെന്നാണ് അച്ഛൻ പറഞ്ഞത്', എന്നും ഉണ്ണി പറഞ്ഞു.

അവസരം കിട്ടിയാലും അഭിനയിക്കാൻ പോകില്ലെന്നാണ് ഭാര്യ സ്മിതയും പറയുന്നത്. വെളുപ്പിന് അഞ്ചുമണി എന്ന ഒരു സമയം ഉണ്ടെങ്കിൽ അമ്പലത്തിൽ ആയിരിക്കും തന്റെ ഭാര്യയെന്ന് വിജയ് പറഞ്ഞു. ടൂർ പോകുമ്പോൾ പോലും അമ്മ ആദ്യം തിരയുന്നത് അമ്പലമാകും എന്നായിരുന്നു മകന്റെ കമന്റ്. സ്മിതച്ചേച്ചി നാളെ ഒരിക്കൽ പ്രൊഡ്യൂസറാകുമോ എന്ന് അവതാരക ചോദിക്കുമ്പോൾ, ഞാൻ പ്രൊഡ്യൂസ് ചെയ്ത ആളാണ് ഈ നിൽക്കുന്നതെന്ന് പറഞ്ഞ് മകനെ ചൂണ്ടിക്കാണിച്ചുകൊണ്ടായിരുന്നു സ്മിതയുടെ മറുപടി.

രാത്രി എട്ടേമുക്കാൽ എന്നൊരു സമയം ഉണ്ടെങ്കിൽ അവൾ ഉറങ്ങിയിരിക്കും. കഴിഞ്ഞ പത്തുവർഷമായി നാട്ടിലുണ്ട്. അന്ന് മുതൽ ഉള്ള ഷെഡ്യൂൾ ആണ് ഇത്. ഒൻപതു മണിയൊക്കെ ഭാര്യക്ക് അർധരാത്രിയാണ്. ഞാൻ ചിലപ്പോൾ നാലുമണിക്കൊക്കെ പുറത്തായിരിക്കും. വാച്ചിൽ നോക്കുമ്പോൾ നാലുമണിയായെന്ന് കണ്ടാൽ സ്മിത എണീക്കാനായി, എന്നാൽ വീട്ടിൽ പോകാം എന്നോർക്കുമെന്നും വിജയ് പറഞ്ഞു.

വാലാട്ടിയാണ് വിജയ് ബാബു നിർമ്മിച്ച് ഏറ്റവും ഒടുവിൽ തിയേറ്ററുകളിൽ എത്തിയ ചിത്രം. രണ്ടു നായകളെ കേന്ദ്ര കഥാപാത്രമാക്കി ഒരുക്കിയിരിക്കുന്ന ചിത്രം സംവിധാനം ചെയ്തിരിക്കുന്നത് ദേവൻ ആണ്. ചിത്രത്തിൽ ഒരു പ്രധാന കഥാപാത്രമായി വിജയ് ബാബുവും എത്തുന്നുണ്ട്.

നായ്ക്കൾക്ക് ശബ്ദസാന്നിധ്യമായി മലയാള സിനിമയിലെ നിരവധി താരങ്ങൾ സിനിമയുടെ ഭാഗമായിട്ടുണ്ട്. ഇന്ദ്രൻസ്, അജു വർ​ഗീസ്, സൈജു കുറുപ്പ്, സൗബിൻ ഷാഹിർ, രഞ്ജിനി ഹരിദാസ്, നസ്ലൻ, സണ്ണി വെയ്ൻ തുടങ്ങിയ താരങ്ങൾ ആണ് നായകൾക്ക് ശബ്ദം നൽകിയിരിക്കുന്നത്.