നീ ആ ആസിഫ് അലിയെ കണ്ട് പഠിക്കെന്ന് മകനെ ഉപദേശിച്ച സിദ്ദിഖ്; കാരണമിതാണ്

സിനിമയുടെ പ്രൊമോഷൻ തിരക്കുകളിലാണ് സിദ്ദിഖ് ഇപ്പോൾ. അതിനിടെ, ഒരു അഭിമുഖത്തിൽ മകന് താൻ നൽകിയ ഉപദേശത്തെ കുറിച്ച് സംസാരിക്കുകയാണ് സിദ്ദിഖ്. മകൻ ഷഹീൻ സിദ്ദിഖിനോട് 'നീ ആ ആസിഫ് അലിയെ കണ്ടു പഠിക്കെന്ന്' ഉപദേശിച്ചത് നേരത്തെ ശ്രദ്ധനേടിയിരുന്നു. ഷഹീൻ ആണ് ഒരു അഭിമുഖത്തിൽ അത് പറഞ്ഞത്. ഇപ്പോൾ അങ്ങനെ ഉപദേശിക്കാനുണ്ടായ കാരണം പറയുകയാണ് സിദ്ദിഖ്. ചാനൽ കേരളയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

'ആസിഫിന്റെ ഡയലോഗ് പ്രസന്റേഷനും വളരെ നാച്ചുറലായി പെരുമാറുന്ന രീതിയൊക്കെ എന്നെ വളരെ ആകർഷിച്ചിട്ടുണ്ട്. മറ്റു നടന്മാർക്ക് ഉള്ള പോലെ ഘനഗാംഭീര്യമുള്ള ശബ്‍ദമോ വലിയ ശരീരമോ ഒന്നും ആസിഫിനില്ല. ഒരു കൂട്ടത്തിൽ നിന്നാൽ തിരിച്ചറിയാൻ പോലും പാടുള്ള ഒരാളെ പോലെയാണ്. എന്നാൽ അവന്റെ ഓമനത്തം, അവൻ സംഭാഷണം പറയുന്ന രീതി. അത് അവതരിപ്പിക്കുന്ന രീതിയൊക്കെ അഭിനന്ദനം അർഹിക്കുന്നതാണ്. അതുകൊണ്ട് ഒരു മാതൃകയായി എടുക്കേണ്ടത് ആസിഫിനെ ആണെന്ന് ഷഹീനോട് പറഞ്ഞിട്ടുണ്ട്,' സിദ്ദിഖ് പറഞ്ഞു.

മകനെ സിനിമയിലേക്ക് റെക്കമെന്റ് ചെയ്യാത്തതിനെ കുറിച്ചും സിദ്ദിഖ് സംസാരിച്ചു. 'റെക്കമെന്റ് ചെയ്ത് വരേണ്ട ഒരു മേഖലയല്ല സിനിമ. ആ കഴിവ് നമ്മുക്ക് ഉണ്ടാവണം. അത് ഉപയോഗിക്കാൻ അറിയണം. ഒപ്പം ഒരുപാട് കഷ്ടപ്പെടുകയും വേണം. റെക്കമെന്റ് ചെയ്യാൻ ആണെങ്കിൽ എത്ര സിനിമയിൽ റെക്കമെന്റ് ചെയ്യും. ഞാൻ പറഞ്ഞിട്ട് ഒരാൾ അവനെ കാസ്റ്റ് ചെയ്തിട്ട് അത് നന്നായില്ലെങ്കിലോ,' സിദ്ദിഖ് കൂട്ടിച്ചേർത്തു.

Recommended Video

ലുലുവിൽ അഴിഞാട്ടവുമായി ആസിഫ് കൂട്ടിന് നിവിനും | Mahaveeryar Team at Trivandrum |*Entertainment

അതേസമയം, ഇതിനോടകം നിരവധി മലയാള സിനിമകളിൽ ഷഹീൻ സിദ്ദിഖ് അഭിനയിച്ചിട്ടുണ്ട്. അച്ഛാദിന്‍, കസബ, ടേക്ക് ഓഫ്, ഒരു കുട്ടനാടന്‍ വ്ലോ​ഗ്, ദിവാന്‍ജിമൂല ഗ്രാന്‍ഡ് പ്രിക്‌സ്, വിജയ് സൂപ്പറും പൗര്‍ണ്ണമിയും, മിസ്റ്റര്‍ ആന്‍ഡ് മിസിസ്, അമ്പലമുക്കിലെ വിശേഷങ്ങള്‍ എന്നിവയാണ് ചിത്രങ്ങൾ.

കഴിഞ്ഞ മാർച്ചിൽ ഒടിടി പ്ലാറ്റ്‌ഫോമിലൂടെ പുറത്തിറങ്ങിയ ദുല്‍ഖര്‍ ചിത്രം സല്യൂട്ടിലും ഷഹീന്‍ ഒരു പ്രധാന വേഷം അവതരിപ്പിച്ചിരുന്നു. ഉണ്ണി മുകുന്ദന്‍ നിര്‍മ്മിക്കുന്ന ഷെഫീഖിന്റെ സന്തോഷം എന്ന പുതിയ ചിത്രത്തിലാണ് ഷഹീന്‍ ഇപ്പോള്‍ അഭിനയിക്കുന്നത്.