16 കിലോ കുറച്ചു, ആത്മവിശ്വാസം കൂടി; പുത്തൻ മേക്കോവറിനെ കുറിച്ച് വിനു മോഹൻ

ഇപ്പോൾ പുതിയ ചിത്രത്തിനായി ശരീര ഭാരം കുറച്ചു പുത്തൻ മേക്കോവർ നടത്തിയിരിക്കുകയാണ് വിനു മോഹൻ. ഏകദേശം 16 കിലോയോളം ഭാരമാണ് താരം കുറച്ചത്. മേക്കോവർ ചിത്രങ്ങൾ സോഷ്യൽ മീഡിയയിൽ ശ്രദ്ധനേടുന്നതിനിടെ തന്റെ പുത്തൻ ലുക്കിനെ കുറിച്ചു പ്രതികരിച്ചിരിക്കുകയാണ് താരം. താരസംഘടനയായ അമ്മയും മഴവില്‍ മനോരമ ചാനലും സംയുക്തമായി സംഘടിപ്പിക്കുന്ന മഴവില്‍ എന്റര്‍ടെയ്ന്‍മെന്റ് അവാര്‍ഡ് 2022ന്റെ വിശേഷങ്ങൾ മനോരമ ന്യൂസിനോട് പങ്കുവയ്ക്കുന്നതിനിടയിലാണ് മേക്കോവറിനെ കുറിച്ചും വിനു മോഹൻ സംസാരിച്ചത്. താരത്തിന്റെ വാക്കുകൾ ഇങ്ങനെ.

'ഞാൻ പൊതുവെ വ്യായാമം ചെയ്യാൻ മടിയുള്ള ആളാണ്. അതേസമയം, നല്ല ഭക്ഷണ പ്രിയനുമാണ്. കോവിഡ് വന്നിരുന്നു. അതിനു ശേഷം വലിയ രീതിയിൽ തടികൂടി, എനിക്ക് തന്നെ അസ്വസ്ഥത തോന്നി തുടങ്ങിയിരുന്നു. ഭാരം കുറയ്ക്കാൻ പ്രചോദനമായത് ഭാര്യ വിദ്യയാണ്. അതിനിടയിൽ ഒരു കഥാപാത്രം വന്നു, കുറച്ചുകൂടെ ശരീരഭാരം കുറച്ചാൽ മാത്രമേ ആ കഥാപാത്രത്തോട് നീതി പുലർത്താനാവൂ എന്നു തോന്നി. അങ്ങനെയാണ് വർക്കൗട്ട് ആരംഭിച്ചത്.'

.ആദ്യത്തെ രണ്ടാഴ്ച ബുദ്ധിമുട്ട് ആയിരുന്നു എന്റെ ട്രെയിനറാണ് എല്ലാ ദിവസവും എന്നെ രാവിലെ വിളിച്ചു എഴുന്നേല്പിച്ചുകൊണ്ടിരുന്നത്. വെയിറ്റ് കുറയാൻ തുടങ്ങിയതോടെ ഉത്സാഹം കൂടി, ആത്മവിശ്വാസം കൂടി. ഇപ്പോൾ ഏതാണ്ട് 16 കിലോയോളം കുറച്ചു സന്തോഷമാണ്. അതിനിടെ ഇനിയും ഭാരം കുറയ്ക്കണമെന്നാണ് സംവിധായകൻ പറയുന്നത്. അതിനുള്ള ട്രെയിനിങ്ങിലാണ്.' വിനു മോഹൻ പറഞ്ഞു.

അമ്മയുടെ ഷോയെ കുറിച്ചും വിനു മോഹൻ സംസാരിച്ചു. ഏറെ നാൾക്ക് ശേഷം ഒത്തുകൂടുന്നതിന്റെ ആകാംഷയിലാണെന്ന് താരം പറഞ്ഞു. 'കോവിഡിന് ശേഷം എല്ലാവരും ഒരുമിച്ച് കൂടുന്നത് വളരെ സന്തോഷം നൽകുന്ന കാര്യമാണ്. ലാലേട്ടനും മമ്മുക്കയും അങ്ങനെ എല്ലാവരും വളരെ രസകരമായിട്ടാണ് ഈ ഷോയെ കാണുന്നത്. അവരോടൊപ്പം ഒക്കെ സമയം ചിലവഴിക്കുക. ആ ഗ്രൂപ്പിന്റെ ഭാഗമാകുക എന്നതൊക്കെ സന്തോഷം നൽകുന്ന കാര്യമാണ്.' വിനു മോഹൻ പറഞ്ഞു.