സൂര്യക്ക് അപ്രതീക്ഷിത നായിക എന്നൊക്കെയായിരുന്നു ആദ്യം കണ്ടത്; പിന്നീട് ബൊമ്മിയെ അവർ ഏറ്റെടുത്തു; അപർണ പറയുന്നു

അപർണ ബലമുരളിയുടെ കരിയറിലെ തന്നെ വഴിത്തിരിവായ സിനിമയാണ് സുരരൈ പൊട്ര്. ദേശീയ പുരസ്‌കാരത്തിലൂടെ മലയാളികളുടെ അഭിമാനമായി മാറാനും കഴിഞ്ഞു. എന്നാൽ സിനിമയിൽ താനാണ് നായിക എന്ന വാർത്ത വന്നപ്പോൾ തമിഴ് സിനിമ പ്രേക്ഷകരുടെയും അവിടത്തെ ചില യൂട്യൂബ് ചാനലുകളുടെയും പ്രതികരണം തന്നെ ഞെട്ടിച്ചെന്ന് പറയുകയാണ് അപർണ ബാലമുരളി. ദി ഫോർത്തിന് നൽകിയ അഭിമുഖത്തിലാണ് അപർണ ഇക്കാര്യം പറഞ്ഞത്.

'അപ്രതീക്ഷിത നായികാ എന്നൊക്കെ കണ്ടപ്പോൾ ഞാൻ ആദ്യം ഞെട്ടി. എന്തുകൊണ്ടാണ് അങ്ങനെ എന്നൊക്കെ തോന്നി. സൂര്യ 38 ൽ എന്തുകൊണ്ടാണ് ഒരു അപ്രതീക്ഷിത നായിക എന്നൊക്കെ ആയിരുന്നു ചില യൂട്യൂബ് ചാനലുകളുടെ ക്യാപ്‌ഷൻ. ഞാൻ അപ്പോൾ ആലോചിച്ചു, എന്താണ് ഇങ്ങനെ അപ്രതീക്ഷിത നായിക എന്നൊക്കെയെന്ന്. പിന്നെ മനസിലായി ആളുകൾ അങ്ങനെയാണ് കാണുന്നെ അവർക്ക് നായിക എന്ന് പറയുമ്പോൾ മെലിഞ്ഞു സുന്ദരിയായ ഒരാളെ ആണ് ചിന്തിക്കുക. അത് അവരുടെ മനസ്സിൽ അങ്ങനെ ആയി പോയി.'

'അതുകൊണ്ട് തന്നെ അത് ബ്രേക്ക് ചെയ്യണമെന്ന് എനിക്ക് ഉണ്ടായിരുന്നു. എല്ലാവരിലേക്കും ബൊമ്മിയെ എത്തിക്കണമെന്ന് എനിക്ക് ഉണ്ടായിരുന്നു. അത് പറ്റിയെന്നാണ് എനിക്ക് തോന്നുന്നത്. സിനിമ ഇറങ്ങി കഴിഞ്ഞപ്പോൾ അവർ തന്നെ ബൊമ്മിയെ ആഘോഷിച്ചു. ആളുകളിലേക്ക് ആ കഥാപാത്രം എത്തി. അവർ കഥാപാത്രത്തെ ഇഷ്ടപ്പെടാൻ തുടങ്ങി അത് എനിക്ക് സന്തോഷം നൽകിയ കാര്യമാണ്.' അപർണ പറഞ്ഞു.

നടന്മാരെ നായകന്മാരാക്കുന്നതിന് ശരീരം നോക്കാതെ ഇരിക്കുകയും നടിമാരുടെ കാര്യം വരുമ്പോൾ അങ്ങനെയല്ലാതാവുന്നതിനെയും കുറിച്ച് അപർണ സംസാരിക്കുന്നുണ്ട്. നടന്മാരിൽ വ്യത്യസ്‍ത ബോഡി ബോഡിടൈപ്പ് കാണുമ്പോൾ നടിമാരിൽ എന്തുകൊണ്ട് അത് കാണുന്നില്ല എന്ന് തോന്നിയിട്ടുണ്ട് നടി പറയുന്നു. നടിമാരായാൽ പൊതുവെ മെലിഞ്ഞ് ഇരിക്കണമെന്നാണ് പൊതുവെയുള്ള ആവശ്യം. കഴിവിന് ഒരു വിലയും തരാതെ അൽപം വണ്ണം ഉണ്ടെന്ന് പറഞ്ഞു പലരും ഒഴിവാക്കാറുണ്ടെന്നും അപർണ പറയുന്നു.

നേരത്തെ സിനിമയിൽ പ്രതിഫലം നൽകുന്നത് സംബന്ധിച്ച് അപർണ നടത്തിയ പരാമർശം ശ്രദ്ധനേടിയിരുന്നു. സിനിമയിൽ നായികമാർക്ക് ന്യായമായ പ്രതിഫലം നൽകണം എന്നയിരുന്നു അപർണ പറഞ്ഞത്. നടന്മാർക്കും നടിമാർക്കും പ്രതിഫലം നൽകുന്നതിൽ ഭീകര വ്യത്യാസം നിലനിൽക്കുന്നുണ്ട് അതിൽ മാറ്റം വരണമെന്നാണ് താൻ പറയുന്നതെന്നും വ്യക്തമാക്കിയിരുന്നു.