എന്റെ സിനിമകൾ മക്കളെ കാണിച്ചിട്ടില്ല; സിനിമാ നടിയാണെന്ന് കൂട്ടുകാർ പറഞ്ഞാണ് അവർ അറിഞ്ഞത്: ജോമോൾ

2002 ൽ വിവാഹിത ആയതോടെയാണ് ജോമോൾ അഭിനയത്തിൽ നിന്ന് ഇടവേളയെടുക്കുന്നത്. ഓൺലൈൻ ചാറ്റിങ്ങിലൂടെ പരിചയപ്പെട്ട ചന്ദ്രശേഖർ പിള്ളയെ ആണ് ജോമോൾ വിവാഹം കഴിച്ചത്. വിവാഹശേഷം മതം മാറി ജോമോൾ ഗൗരി എന്ന പേര് സ്വീകരിച്ചിരുന്നു. രണ്ടു പെൺകുട്ടികളാണ് ജോമോളിനുള്ളത്. വിവാഹ ശേഷം അഭിനയത്തിൽ നിന്ന് ഇടവേളയെടുത്ത ജോമോൾ 2017 ൽ കെയർഫുൾ എന്ന ചിത്രത്തിൽ അഭിനയിച്ചിരുന്നു. നടിയെ വീണ്ടും സ്‌ക്രീനിൽ കാണാനുള്ള കാത്തിരിപ്പിലാണ് പ്രേക്ഷകർ.

അതിനിടെ ജോമോളിന്റെ ഏറ്റവും പുതിയ അഭിമുഖമാണ് പ്രേക്ഷകരുടെ ശ്രദ്ധനേടുന്നത്. തന്റെ പഴയ സിനിമകൾ താൻ കാണാറില്ലെന്ന് പറയുകയാണ് ജോമോൾ. മക്കളേയും തന്റെ സിനിമകൾ കാണിച്ചിട്ടില്ലെന്നും എന്നാൽ താനറിയാതെ അവർ കണ്ടിട്ടുണ്ടെന്നും മിർച്ചി മലയാളത്തിന് നൽകിയ അഭിമുഖത്തിൽ ജോമോൾ പറഞ്ഞു.

'എന്റെ സിനിമകൾ ഞാൻ കാണാറില്ല, മക്കളെയും കാണിച്ചിട്ടില്ല. പക്ഷേ ഞാൻ കാണാതെ അവർ ഒന്നോ രണ്ടോ സിനിമ കണ്ടിട്ടുണ്ട്. ഞാൻ സിനിമയിൽ അഭിനയിച്ചിട്ടുണ്ടെന്ന് അവർക്ക് അറിയില്ലായിരുന്നു. അവരുടെ ക്ലാസ്മേറ്റ്സ് പറഞ്ഞാണ് ഞാൻ അഭിനയിച്ചിട്ടുണ്ടെന്ന് അവർ അറിയുന്നത്. അമ്മ ഉറങ്ങിയ സമയത്ത് ഞാനും അമ്മൂമ്മയും അമ്മയുടെ സിനിമ കണ്ടിട്ടുണ്ട്, മയിൽപ്പീലിക്കാവ് കണ്ടിട്ടുണ്ട് എന്നൊക്കെ എന്നോട് വന്ന് പറഞ്ഞിട്ടുണ്ട്. അതിൽ നിർത്തും, കൂടുതലൊന്നും അവർ പറയാറില്ല,'

'എനിക്ക് എന്റെ പഴയ സിനിമകൾ കാണുമ്പോൾ ഒട്ടും രസം തോന്നാറില്ല. ഇപ്പോൾ കാണുമ്പോൾ ഞാൻ എന്തെക്കെയോ കാണിച്ചു കൂട്ടുന്നു എന്നാണ് തോന്നുന്നത്. ഇന്ന് സംസാരിച്ച് കഴിഞ്ഞ് നാളെ ഈ ഇന്റർവ്യൂ കാണുമ്പോൾ അയ്യോ ഞാൻ കുറച്ചു കൂടി നന്നായി സംസാരിക്കേണ്ടതായിരുന്നു എന്ന് എനിക്ക് തോന്നും,' ജോമോൾ പറഞ്ഞു.

'ജാനകിക്കുട്ടി ചെയ്യുന്ന സമയത്ത് ഹരിഹരൻ സാർ കാണാൻ വരുമ്പോൾ ട്യൂഷൻ ഉണ്ടെന്നൊക്കെ ഞാൻ പറയുമായിരുന്നു. പിന്നെ ആലോചിച്ചിട്ടുണ്ട് ഞാൻ എന്ത് ധൈര്യത്തിലാണ് അന്ന് അങ്ങനെയൊക്കെ പറഞ്ഞതെന്ന്. സാർ എനിക്ക് ട്യൂഷനുണ്ട്, എട്ടരക്ക് ട്യൂഷൻ തീരുകയുള്ളൂ എന്ന് പറഞ്ഞാൽ എട്ടരക്ക് മതി, എട്ടരക്ക് വണ്ടി വിടാമെന്ന് സാർ പറയും. അതുകഴിഞ്ഞ് മറ്റെ ക്ലാസുണ്ടെന്ന് പറയുമ്പോൾ പൊയ്ക്കോ അത് കഴിഞ്ഞ് മതിയെന്ന് പറയും. അന്ന് അദ്ദേഹത്തിന്റെ വലുപ്പം അറിയാത്തത് കൊണ്ടാവണം അല്ലെങ്കിൽ വിവരം ഇല്ലാതിരുന്ന കൊണ്ടാകും അങ്ങനെ പറഞ്ഞത്,'

തനിക്ക് വന്ന സിനിമകൾ ഭാഗ്യമായിട്ടാണ് കാണുന്നതെന്നും ജോമോൾ പറയുന്നുണ്ട്. നമുക്ക് അറിയാത്ത എത്രയോ കഴിവുള്ള ആളുകളുണ്ട്. പല പ്രോഗ്രാമുകളും കാണുമ്പോൾ നല്ല ടാലന്റഡായ ആളുകളുണ്ടെന്ന് തോന്നും. ഇവരെയൊന്നും ആരും തിരിച്ചറിയുന്നില്ല. അവർക്കിടയിൽ നിന്നും തന്നെ തിരഞ്ഞെടുത്തത് തന്റെ അനുഗ്രഹമാണെന്ന് ജോമോൾ പറഞ്ഞു.