'നിങ്ങൾ എംജിആറിൻ്റെ നായികയാണ്, ആ നിലവിട്ടു പെരുമാറരുത്'; ആദ്യ സിനിമ അനുഭവം പങ്കുവച്ച് ഷീല

പതിമൂന്നാം വയസിൽ നാടകത്തിൽ സജീവമായ ഷീല അതിൽ നിന്നാണ് സിനിമയിലേക്ക് ചുവടുമാറ്റുന്നത്. ആദ്യ ചിത്രമായ പാസത്തിൽ എത്തുമ്പോൾ തന്റെ കുട്ടിക്കളി മാറിയിട്ടുണ്ടായിരുന്നില്ല എന്നോർക്കുകയാണ് ഷീലയിപ്പോൾ. എം ജി ആർ എന്ന നടൻ ആരാണെന്ന് മനസിലാക്കാതെയാണ് താൻ അഭിനയിച്ചതെന്നും ഷീല പറയുന്നു. മനോരമ ആഴ്ചപ്പതിപ്പിന്റെ പ്രത്യേക അഭിമുഖത്തിലാണ് ഷീല തന്റെ ആദ്യ സിനിമയെ കുറിച്ചും എം ജി ആറുമായുള്ള പരിചയത്തെ കുറിച്ചും സംസാരിച്ചത്. ഷീലയുടെ വാക്കുകൾ ഇങ്ങനെ.

'പാസം കഴിഞ്ഞപ്പോഴാണ് എം ജി ആർ വലിയൊരാളാണെന്ന് ഞാൻ മനസ്സിലാക്കിയത്. അദ്ദേഹം വരുമ്പോൾ എല്ലാവരും എഴുന്നേറ്റ് നിൽക്കുന്നു. വളരെ ബഹുമാനത്തോടെ പെരുമാറുന്നു. അദ്ദേഹം ഇല്ലാത്തപ്പോഴും അദ്ദേഹത്തെപ്പറ്റി എല്ലാവരും സംസാരിക്കുന്നതും വളരെ ആദരവോടെയാണ്. പക്ഷേ, അപ്പോഴും 'അദ്ദേഹം വലിയ ആളാണെങ്കിൽ നമുക്കെന്താ' എന്നൊരു തോന്നലേ എനിക്കുള്ളൂ,'

'അന്ന് എനിക്ക് അത്രയും വിവരമേയുണ്ടായിരുന്നുള്ളൂ. ഷോട്ടിനിടെ ബ്രേക്ക് വരുമ്പോൾ ജൂനിയർ ആർട്ടിസ്റ്റുകളെല്ലാം വല്ല മരത്തണലിലും പോയിരിക്കും. ആദ്യ ദിവസം ഞാനും അവരുടെ കൂടെ പോയിരുന്നു സംസാരിക്കുകയും കളിക്കുകയും ചെയ്തു. രണ്ടാമത്തെ ദിവസം അസിസ്റ്റന്റ് ഡയറക്ടർ എന്നെവിളിച്ചു പറഞ്ഞു, 'നിങ്ങൾ ഒരു ആർട്ടിസ്റ്റാണ്. എം ജി ആറിന്റെ നായികയാണ്. അതു മറക്കരുത്. ആ നിലവിട്ടു പെരുമാറരുത്' എന്ന്,'

'അപ്പോഴാണ് എനിക്ക് അദ്ദേഹത്തിന്റെ വില മനസ്സിലായത്. അതിൽപ്പിന്നെ ഞാൻ അങ്ങനെ ആരോടും ഇടപെടാതെയായി. എപ്പോഴും ഒരു കസേരയിൽ ഇരിക്കും. എനിക്ക് സംസാരിക്കാനും കളിക്കാനും ഒക്കെ വെമ്പലുണ്ട്. ആളുകളോട് ഇടപെടണം എന്നും ആഗ്രഹമുണ്ട്. പക്ഷേ, എം ജി ആറിന്റെ നായിക എന്നത് ഒരു വലിയ പദവിയാണ്. ആ സ്ഥാനത്തിനു യോജിച്ച രീതിയിൽ പെരുമാറണം എന്ന ഓർമയിൽ ഞാൻ അടങ്ങിയൊതുങ്ങി ഇരിക്കും.,' ഷീല ഓർത്തു.

ജയലളിതയെ പരിചയപ്പെട്ടതും ഷീല പറയുന്നുണ്ട്. 'പാസ'ത്തിനുശേഷം എം ജി ആറിനൊടൊപ്പം പുതിയ ഭൂമി എന്നൊരു സിനിമയിൽ അഭിനയിച്ചു. ആ ലൊക്കേഷനിൽ വച്ചാണു ജയലളിതയെ ആദ്യമായി കണ്ടതും പരിചയപ്പെട്ടതും'. ജയലളിതയുമായുള്ള സൗഹൃദം പിൽക്കാലത്തു ഗാഢമായെന്നും ഷീല പറഞ്ഞു. പാസം, പനംതോട്ടം, പുതിയ ഭൂമി എന്നീ ചിത്രങ്ങളിലാണ് ഷീല എം ജി ആറിനൊപ്പം അഭിനയിച്ചത്.