ഞങ്ങള്‍ തമ്മില്‍ ഒരു വയസിന്റെ വ്യത്യാസം, സംസാരിക്കാനും നടക്കാനും കഴിയില്ല: സഹോദരിയെക്കുറിച്ച് അനു ജോസഫ്

മലയാളികള്‍ക്ക് സുപരിചിതയാണ് അനു ജോസഫ്. സിനിമയിലും സീരിയലിലും സാന്നിധ്യം അറിയിച്ചിട്ടുണ്ടെങ്കിലും അനുവിനെ മലയാളികള്‍ അടുത്തറിയുന്നതെ ടെലിവിഷന്‍ പരമ്പരകളിലൂടെയാണ്. മിന്നുകെട്ട്, ആലിലത്താലി, കാര്യം നിസാരം, പ്രിയമാനസി, സകുടുംബം ശ്യാമള തുടങ്ങി നിരവധി ഹിറ്റ് പരമ്പരകളില്‍ അഭിനയിച്ചാണ് അനു താരമാകുന്നത്.

പിന്നാലെ ബിഗ് ബോസിലും അനു എത്തിയിരുന്നു. ബിഗ് ബോസ് മലയാളം സീസണ്‍ 5 ലെ മത്സരാര്‍ത്ഥിയായിരുന്നു അനു. സോഷ്യല്‍ മീഡിയയിലും അനു താരമാണ്. അനുവിന്റെ യൂട്യൂബ് ചാനലിന് ഒരുപാട് ആരാധകരുണ്ട്. അനുവിന്റെ വീടും പൂച്ചക്കുട്ടികളുമൊക്കെ സോഷ്യല്‍ മീഡിയയില്‍ ചര്‍ച്ചയായി മാറാറുണ്ട്.

ഇപ്പോഴിതാ തന്റെ സഹോദരിയെക്കുറിച്ചും തന്റെ വലിയ സ്വപ്‌നത്തെക്കുറിച്ചും അനു മനസ് തുറന്നിരിക്കുകയാണ്. ഗൃഹലക്ഷ്മിയ്ക്ക് നല്‍കിയ അഭിമുഖത്തിലാണ് അനു ജോസഫ് മനസ് തുറന്നത്.

''എനിക്കൊരു സഹോദരിയുണ്ട്, സൗമ്യ. ഞങ്ങള്‍ തമ്മില്‍ ഒരു വയസിന്റെ വ്യത്യാസമേയുള്ളൂ. അവള്‍ക്ക് നടക്കാനും സംസാരിക്കാനും കഴിയില്ല. ജനിച്ചപ്പോഴേ അങ്ങനെയാണ്. പക്ഷെ ആ കണ്ടീഷനിലും അവള്‍ ആരോഗ്യവതിയാണ്. പത്തിരുപത് ദവിസം കാണാതാവുമ്പോള്‍ എന്റെ ഫോട്ടോ നോക്കിയിട്ട് പറയും, ഞാന്‍ അവളുടേതാണെന്ന്.'' അനു പറയുന്നു.

കുടുംബത്തെ തിരുവനന്തപുരത്തേക്ക് കൊണ്ടു വരാനുള്ള ശ്രമത്തിലാണ് ഇപ്പോള്‍. എനിക്ക് എപ്പോഴും കാസര്‍ഗോഡ് പോയി വരാനാകില്ല. ഇപ്പോള്‍ തിരുവനന്തപുരം എന്റെ ദേശം കൂടിയാണ്. ഒരു സ്ഥലത്തിനുമപ്പുറം ചുറ്റുപാടുമുള്ള ആളുകളാണ് ആ പ്രദേശത്തിന് ഭംഗി നല്‍കുന്നത്. അവിടെ കാത്തിരിക്കാന്‍ ഒരാളുണ്ടെങ്കില്‍ ഏറെ പ്രിയപ്പെട്ടതാകും. അതുപോലെ കൂട്ടിനൊരാള്‍ എനിക്കുമുണ്ട്. പക്ഷെ വിവാഹം എന്ന സിസ്റ്റത്തിലേക്ക് എന്റെ ചിന്ത എത്തിയിട്ടില്ല. വിവാഹത്തേക്കാളും ജീവിതത്തില്‍ വലിയ കാര്യങ്ങളുണ്ടെന്ന് തോന്നിയതു കൊണ്ടാണെന്നും അനു പറയുന്നു.

ഇനി അടുത്ത സ്വപ്‌നത്തിലേക്കുള്ള യാത്രയിലാണ് ഞാന്‍. അനിയത്തി സൗമ്യക്കും അവളെ പോലെയുള്ള കുഞ്ഞുങ്ങള്‍ക്കും വേണ്ടി ഒരിടം ഒരുക്കണം. അമ്മ എവിടെയെങ്കിലും പോവുമ്പോള്‍ അവളെ മറ്റൊരിടത്ത് നോക്കാന്‍ ഏല്‍പ്പിക്കുകയാണ് ചെയ്യാറ്. അതൊക്കെ ബുദ്ധിമുട്ടാണ്. നമ്മള്‍ അവരെ നോക്കുന്നത് പോലെ നല്ല സുഖവും സൗകര്യവുമുള്ള, എന്ഞറെ അമ്മയ്ക്കും കൂട്ടിരിക്കാന്‍ പറ്റുന്ന ഇടമായിരിക്കണമെന്നും അനു പറയുന്നു.

സ്‌നേഹവും കരുതലും വേണ്ടുവോളം ലഭിക്കണം. ആദ്യപടിയായി കുറച്ച് സ്ഥലം വാങ്ങിയിട്ടുണ്ട്. ഇനി ഓരോന്നായി സെറ്റാക്കണം. ഒരുപാട് കടമ്പകള്‍ കടക്കേണ്ടതുണ്ട്. എന്നാലും അത് ഞാന്‍ മനസില്‍ വിചാരിച്ചു പോയി. ഇനി നടത്തിയേ പറ്റൂ എന്നാണ് അനു പറയുന്നത്. താന്‍ അഭിനയത്തില്‍ നിന്നും ഇടവേളയെടുത്തതിനെക്കുറിച്ചും അനു സംസാരിക്കുന്നുണ്ട്.

ബിഗ് ബോസ് കഴിഞ്ഞ് ഒരു ഗ്യാപ്പ് വന്നു. സീരിയല്‍ വിട്ടതല്ല. ഒരേപോലെയുള്ള വേഷങ്ങള്‍ ചെയ്തു മടുത്തു. ഇനിയും കാര്യം നിസാരത്തിലെ സത്യഭാമയെ പോലൊരു കഥാപാത്രം ചെയ്യാന്‍ താല്‍പര്യമില്ല. അതുപോലെ എനിക്കിഷ്ടം തോന്നിയ വേറൊരു കഥാപാത്രം വന്നിട്ടില്ല. ഇടയ്ക്ക് പരസ്യങ്ങളില്‍ അഭിനയിക്കുന്നുണ്ട്. ഇപ്പോള്‍ മുഴുവന്‍ സമയവും ടാറ്റു സ്റ്റുഡോയിയില്‍ തന്നെയാണെന്നാണ് അനു പറയുന്നത്.

സീരിയലുകള്‍ക്ക് പുറമെ സിനിമകളിലും അനു സാന്നിധ്യം അറിയിച്ചിട്ടുണ്ട്. പാഠം ഒന്ന് ഒരു വിലാപം, ആയിരത്തില്‍ ഒരുവന്‍, ലിസമ്മയുടെ വീട്, സപ്തമശ്രീ തസ്‌കര, വെള്ളിമൂങ്ങ, പത്തേമാരി തുടങ്ങിയ സിനിമകളില്‍ അനു അഭിനയിച്ചിട്ടുണ്ട്.