ഗോപിക ചപ്പാത്തി പരത്തേണ്ടെന്ന് മനീഷ; ബിഗ് ബോസ് വീട്ടില്‍ കിച്ചണ്‍ അടി, പിന്നാലെ കൂട്ടപ്പൊരിച്ചില്‍

ബിഗ് ബോസ് മലയാളം സീസണ്‍ 5 ആവേശകരമായി മാറിയിരിക്കുകയാണ്. ആദ്യത്തെ ആഴ്ച പിന്നിടുമ്പോള്‍ ഇതിനോടകം തന്നെ ബിഗ് ബോസ് വീട്ടില്‍ ഒരുപാട് പൊട്ടിത്തെറികളും വഴക്കുകളും ഒരുപാട് ഉണ്ടായിട്ടുണ്ട്. ബിഗ് ബോസില്‍ പൊതുവെ അടികളുടെ ഉറവിടമാകുന്ന സ്ഥലമാണ് കിച്ചണ്‍. ഇത്തവണയും അക്കാര്യത്തില്‍ മാറ്റമില്ല.

കിച്ചണുമായും ബന്ധപ്പെട്ടൊരു അടിയ്ക്ക് സാക്ഷ്യം വഹിച്ചിരിക്കുകയാണ് ബിഗ് ബോസ് വീട്. ഗോപികയും മനീഷയും തമ്മിലുണ്ടായ പ്രശ്‌നമായിരുന്നു ഇത്തവണത്തെ കിച്ചണ്‍ അടി. ഇത് പിന്നീട് ബിഗ് ബോസ് വീട്ടിലെ താരങ്ങളെല്ലാം കൂടെയുള്ള വാദ പ്രതിവാദവും ചര്‍ച്ചയുമാക്കെയായി മാറുകയായിരുന്നു. വിശദമായി വായിക്കാം തുടര്‍ന്ന്.

തന്റെ കിടക്കയില്‍ കരഞ്ഞു കൊണ്ട് കിടക്കുകയായിരുന്നു ഗോപിക. ഈ സമയത്ത് സാഗറും ജുനൈസും ഗോപികയുടെ അടുത്തെത്തുകയും എന്താണ് പ്രശ്‌നമെന്നും ചോദിച്ചു. പ്രശ്‌നമൊന്നുമില്ലെന്നും തന്റെ ഭാഗത്താണ് തെറ്റെന്നും ഗോപിക ആവര്‍ത്തിച്ചുവെങ്കിലും സുഹൃത്തിന്റെ കരച്ചിലിന്റെ കാരണം അറിയാന്‍ ജുനൈസും സാഗറും ആവര്‍ത്തിച്ച് ചോദിച്ചു കൊണ്ടിരുന്നു. കിച്ചണില്‍ ചപ്പാത്തി പരത്തുകയായിരുന്ന തന്നോട് മനീഷ ചപ്പാത്തി പരത്തേണ്ട എന്ന് പറഞ്ഞുവെന്നായിരുന്നു ഗോപിക പറഞ്ഞത്.

ഇതൊരു പരാതിയല്ലെന്നും തനിക്ക് വിഷമം തോന്നിയതാണെന്നും ഗോപിക പറഞ്ഞു. പിന്നാലെ സാഗറും ജുനൈസും കിച്ചണില്‍ പോയി മനീഷയെ കൂട്ടിക്കൊണ്ടു വരികയായിരുന്നു. എന്തുകൊണ്ടാണ് ഗോപികയോട് അങ്ങനെ പറഞ്ഞതെന്ന് മനീഷയോട് അവര്‍ ചോദിച്ചു. ഈ സമയത്ത് നാദിറയും ഏയ്ഞ്ചലീനും ഗോപികയ്‌ക്കൊപ്പമുണ്ടായിരുന്നു.

ഗോപികയുടെ ചുണ്ട് പൊട്ടിയിരിക്കുകയാണെന്നും പൊട്ടിയ ചുണ്ടിയില്‍ തൊട്ടു കൊണ്ടാണ് ഗോപിക ചപ്പാത്തി പരത്തുന്നതെന്നും അത് ചിലര്‍ക്ക് പിടിച്ചേക്കില്ലെന്നും പറഞ്ഞാണ് ഗോപികയോട് പൊക്കോളാന്‍ താന്‍ പറഞ്ഞതെന്നാണ് മനീഷ നല്‍കിയ വിശദീകരണം.

മനീഷയോട് മറ്റാരോ പരാതിപ്പെട്ടതിനാലാകാം അങ്ങനെ പറഞ്ഞതെന്നും ഗോപിക പറഞ്ഞു. പിന്നാലെ ക്യാപ്റ്റനായ അഖില്‍ മാരാര്‍ എത്തുകയും നടന്നത് വിശദമാക്കുകയും ചെയ്തു. താനും ഗോപികയും ഒരുമിച്ച് ചപ്പാത്തിയുണ്ടാക്കി കൊണ്ടിരിക്കെയാണ് മനീഷ ഗോപികയോട് സംസാരിക്കുന്നതെന്നും ഗോപിക പോകുന്നതെന്നും മരാര്‍ പറഞ്ഞു. സംഭവം ബിഗ് ബോസ് വീട്ടില്‍ വലിയ ചര്‍ച്ചയായി മാറി. മത്സരാര്‍ത്ഥികളെല്ലാം തന്നെ ആരാണ് അങ്ങനെ പറഞ്ഞതെന്ന് ചോദിക്കുന്നുണ്ടായിരുന്നു.

പിന്നീട് എല്ലാവരും ചേര്‍ന്ന് അടുക്കളയില്‍ വച്ച് ഈ സംഭവം ചര്‍ച്ച ചെയ്തു. തന്നോട് ആരും പരാതി പറഞ്ഞിട്ടുണ്ടായിരുന്നില്ലെന്നും പക്ഷെ ചിലരുടെ മുഖത്ത് താന്‍ അതൃപ്തി കണ്ടതു കൊണ്ടാണ് അങ്ങനെ പറഞ്ഞതെന്നുമാണ് മനീഷ പറഞ്ഞത്. ഇത് വലിയൊരു ചര്‍ച്ചയായി മാറിയതോടെ ഗോപികയെത്തുകയായിരുന്നു. തനിക്ക് പരാതിയില്ലെന്നും തനിക്ക് വിഷമം തോന്നുക മാത്രമായിരുന്നുവെന്നും ഗോപിക പറഞ്ഞു. മറ്റുള്ളവരും ഗോപികയെ ആശ്വസിപ്പിച്ചു. അങ്ങനെ ആ പ്രശ്‌നം പരിഹരിക്കപ്പെടുകയായിരുന്നു.

അതേസമയം ആദ്യത്തെ ആഴ്ചയ്ക്ക് രണ്ടാമത്തെ ആഴ്ചയിലേക്ക് കടന്നിരിക്കുകയാണ് ബിഗ് ബോസ് മലയാളം സീസണ്‍ 5. ആദ്യത്തെ ആഴ്ച ബിഗ് ബോസ് വീട്ടില്‍ എവിക്ഷന്‍ നടന്നിരുന്നില്ല. അതേസമയം രണ്ടാമത്തെ ആഴ്ചയിലേക്കുള്ള നോമിനേഷന്‍ ഇന്ന് നടന്നു. ഏഴ് പേരാണ് ഇത്തവണ എവിക്ഷനു വേണ്ടിയുള്ള നോമിനേഷന്‍ പ്രക്രിയയിലുള്ളത്. റെനീഷ, റിനോഷ്, ലച്ചു, ഗോപിക, അനിയന്‍ മിഥുന്‍, വിഷ്ണു, ഏയ്ഞ്ചലീന്‍ എന്നിവരാണ് ഇത്തവണ നോമിനേഷനുള്ളത്.