ഞാൻ എടുത്തുകൊണ്ടു നടന്ന മോളാണ്, അവൾ സർജറി ചെയ്യുന്ന ഫോട്ടോ കഴിഞ്ഞദിവസം അയച്ചുതന്നു; ദിലീപ് പറയുന്നു

ഒരിടവേളയ്ക്ക് ശേഷം വീണ്ടും സിനിമയിൽ സജീവമായിക്കൊണ്ടിരിക്കുകയാണ് ദിലീപ്. ഈ വർഷം ദിലീപിന്റേതായി രണ്ടു സിനിമകളാണ് തിയേറ്ററുകളിൽ എത്തിയത്. ബാന്ദ്രയാണ് പുതിയ ചിത്രം. കഴിഞ്ഞ ആഴ്ച തിയേറ്ററുകളിൽ എത്തിയ ചിത്രം സമ്മിശ്ര പ്രതികരണങ്ങൾ നേടി പ്രദർശനം തുടരുകയാണ്. കേസും വിവാദങ്ങളുമൊക്കെയായി മാറി നിന്ന നടൻ തുടരെ സിനിമകളുമായി എത്തുമ്പോൾ ആരാധകരും സന്തോഷത്തിലാണ്.

ദിലീപിനെ പോലെ തന്നെ നടന്റെ കുടുംബവും ആരാധകർക്ക് പ്രിയപ്പെട്ടതാണ്. ഭാര്യ കാവ്യക്കും മകൾ മഹാലക്ഷിക്കുമൊപ്പം പൊതുവേദികളിലെത്തുന്ന ദിലീപിന്റെ ദൃശ്യങ്ങൾ സോഷ്യൽ മീഡിയയിൽ വൈറലാകാറുണ്ട്. ദിലീപിന്റെ മൂത്തമകൾ മീനാക്ഷിയും ആരാധകർക്ക് പ്രിയങ്കരിയാണ്. സോഷ്യൽ മീഡിയയിലൊക്കെ നിരവധി ആരാധകരാണ് മീനാക്ഷിക്ക് ഉള്ളത്. സിനിമയിലൊന്നും മുഖം കാണിച്ചിട്ടില്ലെങ്കിലും സിനിമാ താരങ്ങളുടേതിന് സമാനമായ ജനപ്രീതിയാണ് മീനാക്ഷിക്ക് ഉള്ളത്.

അടുത്തിടെ അഭിമുഖങ്ങളിൽ എല്ലാം രണ്ടു മക്കളെ കുറിച്ചും ദിലീപ് വാചാലനാവുകയുണ്ടായി. മീനാക്ഷിയെ കുറിച്ച് അഭിമാനം തോന്നിയ കാര്യത്തെ കുറിച്ചും നടൻ സംസാരിച്ചിരുന്നു. ആ വാക്കുകൾ സോഷ്യൽ മീഡിയയുടെ ശ്രദ്ധനേടുകയാണ്. ഏതൊരു അച്ഛനും അമ്മയ്ക്കും അഭിമാനമാണ് മക്കളുടെ വിജയമെന്ന് ദിലീപ് പറയുന്നു.

'മീനാക്ഷിയും മഹാലക്ഷ്മിയുമൊക്കെ സെലിബ്രിറ്റി കിഡ്സാണ്. കാരണം പ്രേക്ഷകർ അവരെ അങ്ങനെയാണ് കാണുന്നത്. സെലിബ്രിറ്റികളുടെ കുടുംബം പ്രേക്ഷകർക്ക് എന്നും ആകാംഷയാണ്. ചില വാർത്തകളൊക്കെ കാണുമ്പോൾ എന്തിനാ അച്ഛാ ഇങ്ങനെ പറയുന്നതെന്ന് മകൾ ചോദിക്കാറുണ്ട്, അപ്പോൾ ഞാൻ പറയും അതൊക്കെ അങ്ങനെ നടക്കും ഞാൻ എന്തെല്ലാം കേൾക്കുന്നുണ്ടെന്ന്. എന്റെ മോളുടെ നല്ല സുഹൃത്താണ് ഞാൻ. രണ്ടുമക്കളിൽ ഒരാൾ സൈലന്റും മറ്റെയാൾ കുറച്ചു വയലാന്റുമാണ്,' ദിലീപ് പറയുന്നു.

'മീനൂട്ടി പ്ലസ് ടുവിന് പഠിക്കുമ്പോഴാണ് അവൾ ഏറ്റവും വലിയ ട്രോമയിലൂടെ കടന്നുപോയത്. അവളെക്കുറിച്ച് എനിക്ക് അഭിമാനം തോന്നുന്ന നിമിഷമാണത്. കാരണം ആ സമയത്താണ് അവൾ നല്ല മാർക്കോടെ എൻട്രൻസ് പാസാകുന്നത്. എനിക്ക് ഒരിക്കൽ പോലും മീനൂട്ടിയോട് പഠിക്ക് പഠിക്ക് എന്നൊക്കെ പറയേണ്ടി വന്നിട്ടില്ല. മോൾക്ക് എന്താണ് വേണ്ടത്, ട്യൂഷൻ വേണോ എന്നൊക്കെ ഞാൻ ചോദിക്കുമായിരുന്നു. കാരണം മെഡിസിൻ നമ്മുടെ ഏരിയ അല്ല. നമുക്ക് അറിയില്ല അവിടെ എന്താണ് വേണ്ടതെന്ന്,'

'ഇവൾ ഡോക്ടറാവുക എന്ന ആഗ്രഹമല്ലാതെ നമുക്ക് അതിനപ്പുറം ഒന്നുമറിയില്ല. ഇന്നിപ്പോൾ അവൾ സർജറിയുടെ കൂടെ നിക്കുന്നു, സർജറി ചെയ്യുന്നു എന്നൊക്കെ കേൾക്കുമ്പോൾ അഭിമാനമാണ്. കഴിഞ്ഞദിവസം അവൾ സർജറി ചെയ്യുന്ന ഒരു ഫോട്ടോ അയച്ചു തന്നു അതൊക്കെ അഭിമാനമാണ്. നമ്മുടെ മക്കൾ ഇങ്ങനെ ഒരു നിലയിൽ എത്തി നിൽക്കുമ്പോൾ അഭിമാനം ആണ്. അത് അവളുടെ കാര്യത്തിൽ മാത്രമല്ല, എല്ലാ മക്കളുടെയും കാര്യത്തിൽ അങ്ങനെ ആണ്,'

'എല്ലാ അച്ഛനമ്മമാരുടെയും സ്വകാര്യ അഹങ്കാരവും അഭിമാനാവുമാണ് മക്കൾ നല്ല നിലയ്ക്ക് എത്തുക എന്നുള്ളത്. അഭിപ്രായ വ്യത്യാസങ്ങളും കാര്യങ്ങളും ഒക്കെ ഉണ്ടാകും പക്ഷെ നമ്മൾ ജീവിക്കുന്നത് തന്നെ മക്കൾക്ക് വേണ്ടി അല്ലെ. ജീവിതത്തിൽ പല പല ആളുകൾ വരും എന്നാലും മക്കളാണ് എല്ലാം. എല്ലാ അച്ഛനും അമ്മയും അങ്ങനെയാണ്. മോളെ ഒരു കാര്യത്തിലും ഞാൻ ഉപേദശിക്കാൻ നിക്കാറില്ല. മോൾക്ക് എന്താണോ ഇഷ്ടം അതിനൊപ്പം നിൽക്കുക എന്നത് മാത്രമാണ് ചെയ്യാറുള്ളത്,'- എന്നും ദിലീപ് അഭിമുഖത്തിൽ പറഞ്ഞു.