ഓം ശാന്തി ഓശാനയിൽ നസ്രിയയുടെ അച്ഛനായി കാസ്റ്റ് ചെയ്തത് എന്നെ, വീട്ടുകാർ പോയി കുളമാക്കല്ലേന്ന് പറഞ്ഞു: ലാൽ ജോസ്

ഓം ശാന്തി ഓശാന, വരനെ ആവശ്യമുണ്ട് തുടങ്ങിയ ചിത്രങ്ങളിൽ ചെറുതാണെങ്കിലും ശ്രദ്ധേയമായ കഥാപാത്രങ്ങളെ അവതരിപ്പിച്ചിരുന്നു. എന്നാൽ താൻ ഒരു മോശം അഭിനേതാവാണെന്ന് പറയുകയാണ് ലാൽ ജോസ് ഇപ്പോൾ. വനിതക്ക് നൽകിയ അഭിമുഖത്തിലാണ് ലാൽ ജോസ് ഇക്കാര്യം പറഞ്ഞത്. ഓം ശാന്തി ഓശാനയിലെ നസ്രിയയുടെ അച്ഛൻ കഥാപാത്രമായി ആദ്യം കാസ്റ്റ് ചെയ്തത് തന്നെയാണെന്നും തന്റെ അഭിനയത്തെ കുറിച്ച് തിരിച്ചറിവുള്ള താൻ ആ റോൾ നിഷേധിക്കുകയായിരുന്നു എന്നും ലാൽ ജോസ് പറഞ്ഞു. സിനിമകളിൽ അഭിനയിക്കുന്നത് സൗഹൃദങ്ങളുടെ പുറത്താണോ എന്ന ചോദ്യത്തിന് മറുപടി നൽകുകയായിരുന്നു അദ്ദേഹം.

'അവർ എന്നോടുള്ള ഇഷ്ടം കൊണ്ട് തരുന്ന കഥാപാത്രങ്ങളാണ് അതൊക്കെ. എന്റെ സിനിമയിൽ ഞാൻ ഒരിക്കലും അഭിനയിച്ചിട്ടില്ലലോ എന്റെ സിനിമ ഞാൻ കുഴപ്പമാക്കില്ലല്ലോ! (ചിരിക്കുന്നു) ഞാൻ നല്ല നടനെയല്ല. എന്റെ രൂപത്തിനും ഇമേജിനും ഒക്കെ പറ്റുന്ന കഥാപാത്രങ്ങൾ വരുമ്പോഴാണ് എന്നെ കാസ്റ്റ് ചെയ്യുന്നത്.'

'പറഞ്ഞാൽ നിങ്ങൾ വിശ്വസിക്കില്ല. ഓം ശാന്തി ഓശാനയിൽ എന്നെ ആദ്യമായി കാസ്റ്റ് ചെയ്യുന്നത് ഡോ മത്തായി എന്ന കഥാപാത്രമായിട്ടാണ്. ജൂഡ് എന്നെ ഒരുപാട് നിർബന്ധിച്ചു. എന്റെ വീട്ടുകാർ വരെ പറഞ്ഞു. ആ പയ്യന്റെ ആദ്യ സിനിമയാണ് പോയി കുളമാക്കല്ലേ എന്ന്. മക്കൾ പറഞ്ഞു. അച്ഛൻ ഒരു മോശം നടനാണ്. അയാളുടെ കരിയർ കാലയല്ലെന്ന്. അങ്ങനെ ഞാൻ ജൂഡിന്റെ അടുത്ത് കാര്യം പറഞ്ഞു. ചെറിയ റോൾ എന്തെങ്കിലും ഉണ്ടെങ്കിൽ ചെയ്യാമെന്ന് പറഞ്ഞു.'

'അങ്ങനെ ഒരു നിവൃത്തിയും ഇല്ലാതെ വന്നപ്പോഴാണ് രണ്ടു മൂന്ന് സീനുകൾ മാത്രമുള്ള ജേക്കബ് തരകൻ എന്ന പബ്ലിഷറുടെ റോൾ ഞാൻ ചെയ്യുന്നത്. ഞാൻ ആണ് രൺജി പണിക്കരുടെ പേര് ജൂഡിനോട് സജസ്റ്റ് ചെയ്യുന്നത്. രൺജി പണിക്കർ അഭിനയിക്കുന്ന ആളാണ്. അഭിനയിക്കാൻ ഇഷ്ടമുള്ള ആളാണ്. പിന്നെ നസ്രിയയുടെ അച്ഛനാണ് എന്നൊക്കെ പറഞ്ഞാൽ വിശ്വസിക്കുകയും ചെയ്യും.' ലാൽ ജോസ് പറഞ്ഞു.

പൃഥ്വിരാജിന്റെ വളർച്ചയെ കുറിച്ചും ലാൽ ജോസ് സംസാരിക്കുന്നുണ്ട്. തന്റെ യാത്രയിൽ ഉടനീളം ഒരു വിദ്യാർത്ഥിയെ പോലെ എല്ലാ കാര്യങ്ങളും പഠിക്കുന്ന നടനായിരുന്നു പൃഥ്വിരാജ് എന്ന് ലാൽ ജോസ് പറഞ്ഞു. പത്തൊമ്പതാം വയസിൽ സിനിമയിൽ എത്തിയ അയാൾ ഒരു നല്ല വിദ്യാർത്ഥി ആയാണ് പോയത്. അതാണ് വളർച്ചയ്ക്ക് കാരണവും. ഇന്ന് ഒരു പാൻ ഇന്ത്യൻ താരമാകാനുള്ള ഒരുക്കത്തിലാണ് അദ്ദേഹം എന്നും പൃഥ്വിരാജിനെ വച്ച് ക്ലാസ്സ്മേറ്റ്സ്, അയാളും ഞാനും തമ്മിൽ തുടങ്ങിയ ഹിറ്റുകൾ സംവിധാനം ചെയ്ത ലാൽ ജോസ് പറഞ്ഞു.