വിമാനത്താവളത്തിൽ ഐശ്വര്യ മുഖമറച്ചെത്തിയത് ഇതുകൊണ്ടോ?, വൈറലായി ഐശ്വര്യയുടെ പുതിയ ചിത്രങ്ങൾ

ഇടയ്ക്ക് സിനിമയിൽ നിന്ന് ചെറിയ ഇടവേളയെടുത്ത ഐശ്വര്യ ഇപ്പോൾ ഗുരുവായ മണിരത്‌നത്തിന്റെ പുതിയ ചിത്രം പൊന്നിയിൻ സെൽവനിലൂടെ ശക്തമായ തിരിച്ചുവരവിന് ഒരുങ്ങുകയാണ്. 1950 കളിൽ പുറത്തിറങ്ങിയ കൽക്കി കൃഷ്ണമൂർത്തിയുടെ പൊന്നിയിൻ സെൽവൻ എന്ന തമിഴ് നോവലിനെ അടിസ്ഥാനമാക്കി ഒരുക്കുന്ന ചിത്രത്തിൽ നന്ദിനി രാജ്ഞിയായിട്ടാണ് ഐശ്വര്യ എത്തുന്നത്. ഐശ്വര്യയെക്കൂടാതെ വിക്രം, ജയം രവി, കാർത്തി, തൃഷ തുടങ്ങിയ വൻ താര നിര തന്നെ സിനിമയിൽ അണിനിരക്കുന്നുണ്ട്.

സെപ്റ്റംബർ 30 നാണ് ചിത്രത്തിന്റെ ആദ്യ ഭാഗം റിലീസിന് എത്തുന്നത്. തെന്നിന്ത്യൻ സിനിമാ ലോകം ഒന്നടങ്കം അണിനിരക്കുന്ന ചിത്രത്തിൽ ഇരട്ട കഥാപാത്രത്തെയാണ് ഐശ്വര്യ അവതരിപ്പിക്കുന്നത്. തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലാണ് ചിത്രം പ്രദർശനത്തിനെത്തുന്നത്. ചിത്രത്തിന്റെ ട്രെയിലർ ലോഞ്ച് ഇന്നലെ ചെന്നൈയിൽ വച്ച് നടന്നിരുന്നു.

തമിഴ് സൂപ്പർതാരങ്ങളായ രജനികാന്തും കമൽഹാസനും പങ്കെടുത്ത ചടങ്ങിൽ മണിരത്‌നം, ഐശ്വര്യ റായ് ബച്ചൻ, വിക്രം, കാർത്തി, ജയം രവി, തൃഷ, ശോഭിത ധൂലിപാല, സുഹാസിനി എന്നു തുടങ്ങിയ താരങ്ങളും പങ്കെടുത്തിരുന്നു. അതിനിടെ പരിപാടിക്ക് എത്തിയ ഐശ്വര്യയുടെ വീഡിയോയും ചിത്രങ്ങളുമാണ് ഇപ്പോൾ സോഷ്യൽ മീഡിയയിലും സിനിമാ കോളങ്ങളിലും ഇടംപിടിക്കുന്നത്.

വളരെ സിമ്പിൾ ലുക്കിൽ അതീവ സുന്ദരിയായിട്ടാണ് ഐശ്വര്യ ട്രെയിലർ ലോഞ്ചിന് എത്തിയത്. കറുത്ത നിറത്തിലുള്ള കുർത്തയും അതിന് ചേരുന്ന സിമ്പിൾ ആഭരണങ്ങളുമായിരുന്നു നടിയുടെ വേഷം. ചിത്രങ്ങൾ ആരാധകർ ഏറ്റെടുത്തു കഴിഞ്ഞു. എന്നാൽ അതിനിടെ മുംബൈ വിമാനത്താവളത്തിൽ നിന്നുള്ള ചിത്രങ്ങളും വീഡിയോയും വൈറലാവുകയാണ്.

ചെന്നൈയിലേക്ക് വരുന്നതിനായി എയർപോർട്ടിൽ എത്തിയ ഐശ്വര്യയുടെ ചിത്രങ്ങളാണ് ശ്രദ്ധനേടുന്നത്. കറുത്ത പാന്റും ജാക്കറ്റും ഒപ്പം വലിയ കണ്ണടയും മാസ്‌കും വച്ച് മുഖം ഉൾപ്പടെ മറച്ചാണ് താരം വിമാനത്താവളത്തിൽ എത്തിയത്. തന്റെ പുതിയ ലുക്ക് പുറത്താകാതെ ഇരിക്കാനാണ് നടി ഇത്തരത്തിൽ വിമാനത്താവളത്തിൽ എത്തിയതെന്നാണ് റിപ്പോർട്ടുകൾ.

അതേസമയം, ഇന്ത്യൻ സിനിമാ ലോകം ഏറെ പ്രതീക്ഷയോടെയാണ് പൊന്നിയൻ സെൽവൻ റിലീസിനായി കാത്തിരിക്കുന്നത്. അരുൾ മൊഴിവർമ്മന്റെ ചോളരാജ്യത്തിന്റെ സിംഹാസനത്തിലേക്കുള്ള ആരോഹണത്തിന്റെ കഥയാണ് ചിത്രം പറയുന്നത് എന്നാണ് വിവരം.