'അതൊരു രഹസ്യമാണ്, ആ വ്യക്തി ആരാണെന്ന് സിനിമാ പ്രവർത്തകർക്ക് പോലും അറിയില്ല'; മഞ്ജു വാര്യർ പറയുന്നു

സമ്മർ ഇൻ ബത്ലഹേമിലെ അഭിനേതാക്കളെ എപ്പോൾ കണ്ടാലും ആരാധകർ ചോദിക്കുന്ന ചോദ്യങ്ങളിൽ ഒന്ന് കൂടിയാണ് ആ അഞ്ച് സുന്ദരികളിൽ ആരാണ് രവി ശങ്കറിനെ പ്രണയിച്ചതെന്ന്. ഇപ്പോൾ മഞ്ജുവാര്യരും ആ ചോദ്യത്തെ നേരിട്ടിരിക്കകയാണ് ജാങ്കോ സ്പേസ് ടി.വിയ്ക്ക് നൽകിയ അഭിമുഖത്തിൽ. ആരാണ് ആ പെൺകുട്ടിയെന്ന് വെളിപ്പെടുത്താമോ എന്ന് ചോദിക്കുമ്പോൾ മഞ്ജുവിന്റെ മറുപടി ഇങ്ങനെയായിരുന്നു. 'സമ്മർ ഇൻ ബത്‌ലഹേം സിനിമയുടെ രണ്ടാം ഭാഗം എല്ലാവരും ചോദിക്കാറുണ്ട്. ആ സിനിമയുടെ രണ്ടാം ഭാഗം ഉണ്ടാവുമോ എന്ന് അറിയില്ല. പൂച്ചയുടെ കാര്യത്തിലുള്ള ഒരു തീരുമാനം അറിയാൻ വേണ്ടിയാണ് എല്ലാവരും ചോദിക്കുന്നത്. ആ പൂച്ചയെ അയച്ച വ്യക്തി ആരാണെന്ന് സിനിമയിൽ വർക്ക് ചെയ്തവർക്ക് തന്നെ അറിയില്ല.

'എനിക്കും അറിയില്ല. ഇപ്പോഴും അത് ഒരു രഹസ്യമായി നിൽക്കുകയാണ്. പടത്തിൽ തന്നെ രണ്ട് പേരിലേക്ക് ഷോർട്ട് ലിസ്റ്റ് ചെയ്തിരുന്നു. അതിൽ ആരാണെന്ന് ഇപ്പോഴും അറിയില്ല. ചിലപ്പോൾ ഡയറക്ടർക്ക് മാത്രമേ അറിയുകയുള്ളൂ' മഞ്ജു വാര്യർ പറഞ്ഞു. ജയറാം, സുരേഷ് ഗോപി, കലാഭവൻ മണി, മഞ്ജു വാര്യർ തുടങ്ങിയവർ പ്രധാന റോളിൽ എത്തിയ ചിത്രത്തിൽ നിരഞ്ജൻ എന്ന അതിഥി വേഷത്തിൽ മോഹൻലാലും അഭിനയിച്ചിരുന്നു. അന്ന് ചിത്രം തിയേറ്ററിൽ കണ്ടവർ ലാലേട്ടനെ കണ്ട് ഞെട്ടി. കാരണം ലാലേട്ടൻ ഈ ചിത്രത്തിൽ അഭിനയിക്കുന്ന വിവരം അണിയറക്കാർ പുറത്ത് വിട്ടിരുന്നില്ല. 50ആം ദിവസമാണ് ലാലേട്ടനെ പോസ്റ്ററിൽ ഉൾപ്പെടുത്തിയത്. മഞ്ജു വാര്യർ ഇപ്പോൾ ലളിതം സുന്ദരം സിനിമ വിജയകരമായി പ്രദർശിപ്പിക്കുന്നതിന്റെ സന്തോഷത്തിലാണ്. ലളിതം സുന്ദരം സിനിമ സംവിധാനം ചെയ്‍തത് മഞ്‍ജു വാര്യരുടെ സഹോദരനും നടനുമായ മധു വാര്യരാണ്.

Recommended Video

Gayathri Suresh about Vinayakan's statement | FilmiBeat Malayalam

പഴയ മലയാള സിനിമകളിലെ ഹിറ്റ് മെലഡികളാണ് ലളിതം സുന്ദരത്തിനായി ഉപയോഗിച്ചിരിക്കുന്നത്. ഹരിശങ്കർ, അഞ്‍ജലി വാര്യർ, ബിജു മേനോൻ, ആനി അമീ, നന്ദു കർത്ത, രഞ്‍ജിത് ജയരാമൻ എന്നിവരാണ് ഗാനങ്ങൾ പാടിയിരിക്കുന്നത്. വളരെ മനോഹരമായിട്ടാണ് ചിത്രത്തിൽ പഴയ കാല ഗാനങ്ങൾ കോർത്തിണക്കിയിരിക്കുന്നത്. മഞ്‍ജു വാര്യർ ആണ് ചിത്രം നിർമിച്ചതും. മഞ്‍ജു വാര്യർ പ്രൊഡക്ഷൻസിനൊപ്പം ചിത്രത്തിന്റെ നിർമാണത്തിൽ സെഞ്ച്വറിയും പങ്കാളിയാകുന്നു. ഇരുപത് വർഷങ്ങൾക്ക് ശേഷം ബിജു മേനോനൊപ്പം നായികയായി മഞ്‍ജു വാര്യർ അഭിനയിച്ചുവെന്ന പ്രത്യേകതയും ചിത്രത്തിനുണ്ട്.