കല്യാണ ദിവസം ശ്രീയെ കണ്ട് ഞെട്ടി, ആകെ വട്ടു പിടിച്ച മട്ട്; രസകരമായ സംഭവം ഓർത്ത് സ്നേഹയും ശ്രീകുമാറും

പ്രേക്ഷകരെ ഞെട്ടിച്ചു കൊണ്ടാണ് ഇവരുടെ വിവാഹവാർത്തകൾ പുറത്തുവന്നത്. ലളിതമായി നടത്തിയ ചടങ്ങിൽ ബന്ധുക്കളും അടുത്ത സുഹൃത്തുക്കളുമാണ് പങ്കെടുത്തത്. ഇപ്പോഴിതാ വിവാഹത്തെക്കുറിച്ചും വിവാഹ ദിവസം ഉണ്ടായ രസകരമായ സംഭവത്തെ കുറിച്ചും സംസാരിക്കുകയാണ് സ്നേഹയും ശ്രീകുമാറും. വനിതാ മാസികയ്ക്കു നൽകിയ അഭിമുഖത്തിലാണ് താരങ്ങൾ വിവാഹത്തെക്കുറിച്ച് സംസാരിച്ചത്. സ്നേഹയുടെയും ശ്രീകുമാറിന്റെയും വാക്കുകളിലേക്ക്.

'കല്യാണം കഴിക്കാമെന്നു തീരുമാനിച്ചപ്പോൾ തന്നെ രജിസ്റ്റർ വിവാഹം മതിയെന്നാണ് ആലോചിച്ചത്. അതുകൊണ്ട് തലേദിവസം വരെ മറിമായത്തിന്റെ ഷെഡ്യൂൾ എടുത്തു. പക്ഷേ, അമ്പലത്തിൽ വെച്ച് താലികെട്ടെങ്കിലും വേണമെന്ന് എല്ലാവരും പറഞ്ഞതോടെ പ്ലാൻ മാറി. കല്യാണത്തലേന്ന് കട പൂട്ടും മുൻപ് പോയാണ് കല്യാണസാരി വരെ വാങ്ങുന്നത്. അങ്ങനെ ശടപടേ ശടപടേന്നായിരുന്നു കാര്യങ്ങൾ,'

തൃപ്പൂണിത്തുറ പൂർണത്രയീശ ക്ഷേത്രത്തിലായിരുന്നു കല്യാണം. അടുത്തുള്ള ഹാളിൽ ഏതാണ്ട് 250 പേർക്ക് ഇരിക്കാം. പക്ഷേ കേട്ടറിഞ്ഞു വന്നവരും ബന്ധുക്കളും മീഡിയക്കാരുമെല്ലാമായി നല്ല തിരക്കായി. പറഞ്ഞ സമയത്തിനുള്ളിൽ തിരുവനന്തപുരത്ത് ശ്രീയുടെ വീട്ടിലെത്താനുള്ള പാച്ചിലായിരുന്നു പിന്നെ. ഇതിനിടയിൽ മറ്റൊരു സംഭവമുണ്ടായി. കല്യാണത്തിനു മുൻപ് മുടിയൊക്കെ വെട്ടണമെന്ന് ശ്രീയോട് പ്രത്യേകം പറഞ്ഞിരുന്നു,'

'കല്യാണ തലേന്ന് ലൊക്കേഷനിൽ നിന്നു വിളിച്ചു ചോദിച്ചു. എന്തായെന്ന്. 'ദേ പാർലറിൽ ഇരിക്കുകയാ, മുടി അടിപൊളി ആക്കി എന്നു മറുപടിയും തന്നു. പക്ഷേ, പിറ്റേന്ന് കല്യാണപ്പന്തലിൽ വന്നിറങ്ങിയ ശ്രീയെ കണ്ടു ഞെട്ടി, മുടിയാകെ പാറിപ്പറന്ന് ആകെ വട്ടുപിടിച്ച മട്ട്. പിന്നെയാണ് സംഭവം മനസ്സിലായത്,' സ്നേഹ പറഞ്ഞു.

'ഒരു സിനിമയ്ക്കു വേണ്ടിയാണ് മുടി വളർത്തിയത്. പാർലറിൽ നിന്നു മൂടി ട്രിം ചെയ്ത് സെറ്റാക്കി ഇറങ്ങും മുൻപ് അവിടത്തെ പയ്യൻ പറഞ്ഞു. "ചേട്ടാ മുടി അധികം ചീകുകയൊന്നും വേണ്ട. പക്ഷേ, കുളിക്കരുതെന്ന് അവൻ പറഞ്ഞില്ല. നേരേ പോയി കുളിച്ചു. പിന്നെ മുടി ചീകാതെ ചെന്നാൽ എല്ലാവരും ഞെട്ടിയില്ലെങ്കിലേ അദ്ഭുതമുള്ളൂ. എന്റെ മനസ്സിൽ ഞാൻ ഹിന്ദി പരസ്യത്തിൽ കുതിരപ്പുറത്തു വരുന്ന നായകനായിരുന്നു,' ശ്രീകുമാർ കൂട്ടിച്ചേർത്തു.

വിവാഹത്തിലേക്ക് എത്തിയതിനെ കുറിച്ചും ഇരുവരും സംസാരിക്കുന്നുണ്ട്. 'മറിമായ'ത്തിന്റെ രണ്ടാം ദിവസത്തെ ഷൂട്ടിങ്ങിൽ വച്ചാണ് ശ്രീയെ ആദ്യമായി കാണുന്നത്, പത്തു വർഷം മുൻപ്. ഞങ്ങളോരോരുത്തരുടെയും ജീവിതത്തിലെ സന്തോഷങ്ങളിലും സങ്കടങ്ങളിലും മറിമായം ടീം ഉണ്ട്. ഒരിക്കൽ ജീവിതം വല്ലാതെ നോവിച്ചപ്പോഴും കൂടെ നിന്നതും തിരികെ വരാൻ പ്രേരിപ്പിച്ചതും അവരാണ് ശ്രീക്കും അതെല്ലാം അറിയാം. അങ്ങനെയാണ് കല്യാണം കഴിക്കാൻ തീരുമാനിച്ചത്,' സ്നേഹ പറഞ്ഞു. സാധാരണ പ്രണയം പോലെ പ്രപ്പോസ് ചെയ്ത്, ഇഷ്ടം അറിഞ്ഞ് കല്യാണത്തിൽ എത്തിയതൊന്നുമല്ല. എന്തൊക്കെയോ സംസാരിക്കുന്നതിനിടയിൽ വിഷയം വിവാഹത്തെ കുറിച്ചായതാണെന്ന് ശ്രീകുമാർ പറഞ്ഞു.