പ്രണവ് ഒരു പുസ്തകമെഴുതുന്നുണ്ട്; ഞാൻ ആഗ്രഹിച്ചിരുന്ന കാര്യങ്ങളൊക്കെയാണ് അയാൾ ചെയ്യുന്നത്: മോഹൻലാൽ

'പ്രണവ് ഇപ്പോൾ ഫ്രാൻസിലേക്ക് പോവുകയാണ്. 700 മൈൽ ദൂരം സഞ്ചരിക്കുന്ന ഒരു വലിയ ആത്മീയ നടത്തത്തിനായി പോയിരിക്കുകയാണ് അയാൾ. അത്രയും ദൂരം നടക്കുക എന്നൊക്കെ പറഞ്ഞാൽ അതിനിടയിൽ കിട്ടുന്ന അനുഭവങ്ങൾ ഒക്കെ അത്രയും വലുതാവും. പല രാജ്യങ്ങളിൽ ഉള്ളവരെ അവർ കാണും സംസാരിക്കും. അങ്ങനെയുള്ള കാര്യങ്ങളാണ് അവൻ നോക്കുന്നത്.'

'അയാളുടെ പ്രായത്തിൽ എനിക്കും തോന്നിയ കാര്യങ്ങളാണ് അയാൾ ചെയ്യുന്നത്. എനിക്കും ഭയങ്കര ആഗ്രഹമായിരുന്നു ഇന്ത്യ മുഴുവൻ സഞ്ചരിക്കണമെന്നത്. ഒരു പ്രത്യേക സമയത്ത് എന്റെ ജീവിതം മാറി മറിഞ്ഞില്ലായിരുന്നെങ്കിൽ ഞാൻ അങ്ങനെ വല്ലതും പോയേനെ. അത് എന്റെ മനസ്സിൽ ഇപ്പോഴും ഉണ്ട്. അതുകൊണ്ട് അയാൾ അതിലേക്ക് പോയപ്പോൾ അതല്ല, ഇതാണ് നിന്റെ വഴിയെന്ന് എനിക്ക് പറയാൻ പറ്റില്ല.

Also Read: മുരളി രാവും പകലും മദ്യപാനമായിരുന്നു, ആ നടനെ പ്രതിഫലം പോലും കൊടുക്കാതെ ചിലർ ഒതുക്കി; മാമുക്കോയ

'അയാളുടെ സുഹൃത്തുക്കളും വായിക്കുന്ന പുസ്തകങ്ങളുമൊക്കെ അയാളെ ഒരുപാട് സഹായിക്കുന്നുണ്ട്. എനിക്ക് ചെയ്യാൻ പറ്റാത്ത കാര്യങ്ങൾ അയാൾ ചെയ്യുന്നതിൽ ഞാൻ ശരിക്കും സന്തോഷിക്കുകയാണ്. അയാൾ ഇപ്പോൾ ഒരു പുസ്തകമെഴുതുന്നുണ്ട്. യാത്രയിലൂടെയാണ് അതൊക്കെ ചെയ്യുന്നത്. കുറച്ചു നാൾ അയർലണ്ടിൽ ആയിരുന്നു. ഇടയ്ക്ക് റോക്ക് ക്ലൈംബിങിന് പോകും. ആ അനുഭവങ്ങൾ ഒക്കെയാണ് പുസ്തകത്തിൽ വരുന്നത്.'

'അങ്ങനെയുള്ള ആളോട് എനിക്ക് പോയി അത് ചെയ്യാൻ പറ്റില്ല. സിനിമ ചെയ്യണം എന്നൊന്നും പറയാൻ പറ്റില്ല. ഈ യാത്രകളിലൂടെ ആകും അയാൾക്ക് പുതിയ അവസരങ്ങൾ വരുന്നത്. നല്ല സിനിമകൾ അങ്ങനെ തേടിയെത്തട്ടെ എന്ന് ആഗ്രഹിക്കുന്നു.' മോഹൻലാൽ പറഞ്ഞു.

Also Read: ഒരിക്കലും മാപ്പ് തരില്ലെന്ന് മകൻ, ഓണത്തിന് പൊട്ടിക്കരഞ്ഞ മുകേഷിനെ ചേർത്തുപിടിച്ച മോഹൻലാൽ; സംഭവമിങ്ങനെ

മകൾ വിസ്മയയെ കുറിച്ചും മോഹൻലാൽ സംസാരിക്കുന്നുണ്ട്. രണ്ടുപേരും സ്വതന്ത്ര ചിന്തകരാണ്. രണ്ടു പേർക്കും അവരുടെ ഇഷ്ടത്തിന് ജീവിക്കാം. നമ്മുക്ക് ഒന്നും അതിനുള്ള അവസരം ഉണ്ടായിരുന്നില്ല അവർക്ക് അതുണ്ട്. നമ്മൾ അറിയാതെ സിനിമയിൽ വന്നവരാണ്. അവർക്ക് വരാനുളള അവസരം ഉണ്ടയിട്ടും അത് വേണ്ടെന്ന് വെച്ചിരിക്കുന്നവരാണെന്നും മോഹൻലാൽ കൂട്ടിച്ചേർത്തു.

വിസ്മയയോ പ്രണവോ ഇതുവരെ സക്‌സസ്ഫുള്ളായി എന്ന് പറയാൻ ആയിട്ടില്ലെന്നും മോഹൻലാൽ പറയുന്നു. ഒരു സിനിമ വിജയിച്ചതുകൊണ്ടോ ഓരോ ബുക്ക് എഴുതി അത് നന്നായത് കൊണ്ടോ ഒന്നും ആയിട്ടില്ല. അവർക്ക് അവസരങ്ങളുണ്ട് അവർ അത് എങ്ങനെ ഉപയോഗിക്കുന്നു എന്ന് അനുസരിച്ചാണ്. അതിൽ നമ്മുക്ക് കാഴ്ചക്കാരായി നിൽക്കാനേ കഴിയൂ. വിസ്മയയുടെ പുസ്തകം വിജയിച്ചതിൽ സന്തോഷമുണ്ട്. മക്കളെ കുറിച്ച് ആളുകൾ നല്ലത് പറയുമ്പോൾ അഭിമാനമുണ്ടെന്നും മോഹൻലാൽ പറഞ്ഞു.